ހައުސިން މިނިސްޓްރީ އިމާރާތުގައި ރޯވި އަލިފާންގަނޑު ނިއްވަން ސިފައިން ހަރަކާތްތެރި ވަނީ (ދައުރު ފޮޓޯ/ އަބްދުﷲ އަނޫފް ޖުނައިދު)
ހައުސިން މިނިސްޓްރީގައި ރޯވި އަލިފާން ކޮންޓްރޯލްކޮށްފި؛ ތަކެތި ސަލާމަތްކުރަނީ
އެޗުޕީއޭގެ އިލްތިމާސްއެއް
އަލިފާނުގެ ހާދިސާއާ ގުޅިގެން އެޗްޕީއޭގެ އިލްތިމާސްއެއް:
- ދުމުގެ އަސަރުކޮށްފައިވާ ސަރަހައްދަކަށް ނުނިކުތުން
- ދުމުގެ އަސަރުކޮށްފައިވާ ސަރަހައްދަކަށް ނުކުތުމުގެ ކުރިން އަނގައާއި ނޭފަތް ނިވާކުރުން
- ނޭވާލާ ނިޒާމް އަދި ހިތުގެ ބަލިތައް ހުންނަ ފަރާތަތްކަށް ދުމުގެ ސަބަބުން ކުރާ ނޭދެވޭ އަސަރު ބޮޑުވުން އެކަށީގެންވޭ
- ގޭގެ ދޮރުތަކާއި ކުޑަދޮރުތައް، އަދި ފެންލައިޓްތައް ދުން ނުވަންނާނެހެން ބަންދުކުރުން
- ނޭވާ ކުރުވުން، ނުވަތަ ނޭވާލާން އުނދަގޫވުން، ގަދަޔަށް ކެއްސުން އަދި ބޯ އެނބުރުން ފަދަ އަލާމާތެއް ފެނިއްޖެ ނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯއްދުން
ހައުސިން މިނިސްޓްރީގައި ރޯވި އަލިފާންގަނޑު ބޮޑުވެ، އެ އިމާރާތުގައި ހިންގަމުން އަންނަ ކޮންސްޓްރަކްޝަން މިނިސްޓްރީގައި ވެސް އަނދަނީ.
އެންވާރަމެންޓް މިނިސްޓްރީ ހިންގަމުންދާ "ގްރީން ބިލްޑިން"ގައި ވެސް ހުޅުހިފައިފި
އިމާރާތުން ކުރިން ފެނުނު އަލިފާނުގެ ހުޅުގަނޑު މިހާރު ބޭރަކަށް ނުފެނޭ. އެހެންކަމުން އަލިފާންގަނޑު މިހާރު ވަނީ ކޮންޓްރޯލްވެފައި ކަމަށް ބެލެވޭ. ދެ ގަޑިއިރުގެ ތެރޭގައި މުޅި އިމާރާތް ވަނީ ބޭނުންނުކުރެވޭ ވަރަށް އަނދާފައި
އިމަންޖެންސީ އިވެކިއުއޭޝަން ސެންޓަރެއް ގާއިމުކޮށްފި
ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ދެންމެ ބުނީ އިމަންޖެންސީ އިވެކިއުއޭޝަން ސެންޓާއެއް ސޯޝަލް ސެންޓަރުގައި ގާއިމްކޮށްފައިވާ ކަމަށް. އެހީތެރިކަން ބޭނުންވާ ފަރާތްތަކުން 115 އަށް ގުޅައި ނުވަތަ އިވެކިއުއޭޝަން ސެންޓަރަށް އައުމަށް އެ އޮތޯރިޓީން އެދިފައިވޭ
މިއީ ސަރުކާރުގެ އޮފީހެއްގައި ހިނގި އަލިފާނުގެ ބޮޑު ހާދިސާއެއް
މާލޭގައި ހުންނަ ސަރުކާރުގެ ބޮޑު އޮފީހެއްގައި މިވަރުގެ ބޮޑު އަލިފާންގެ ހާދިސާއެއް ފަހުގެ ތާރީހެއްގައި ހިނގާފައެއް ނުވޭ. އަލިފާނުގައި ހައުސިން މިނިސްޓްރީގެ އިމާރާތް ވަނީ ބޭނުންނުކުރެވޭ ވަރަށް އަނދާފައި.
އެ ހިސާބުގަނޑުގެ މީހުން ސޯޝަލް ސެންޓަރަށް ގެންދަނީ
ހައުސިން މިނިސްޓްރީގެ ކުރިމައްޗަށް ވާ ގޮތަށް ހުރި ގެތަކުގައި ދިރިއުޅޭ މީހުން ސޯޝަލް ސެންޓަރަށް ދާން، ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިހާރު ވަނީ އަންގާފައި.
އެމްއެންޑީއެފުން މީގެ އިރުކޮޅެއް ކުރިން މީޑިއާތަކަށް މައުލޫމާތު ދެމުން ބުނީ އަލިފާން އަދި ކޮންޓްރޯލް ނުކުރެވޭ ކަމަށް. މިނިސްޓްރީ ހުންނަ މުޅި އިމާރާތުގައި ވެސް މިހާރު އަލިފާން ރޯވެފައިވާ ކަމަށް ބުނި.
އަލިފާން ނިއްވަން ސިފައިން ބޭނުންކުރާ އުޅަނދުތައް ބަހައްޓާ ގަރާޖު ހުންނަނީ ހައުސިން މިނިސްޓްރީއާ ވަރަށް ކައިރީގައި، ބޮޑުތަކުރުފާނު މަގުގައި.
އަލިފާން ނިއްވަން ސިފައިންގެ އެންމެ ބޮޑު ފަޔާ ވެހިކަލްތައް ވެސް އަންނަނީ ބޭނުންކުރަމުން. އޭގެ ހަރުގަނޑަށް އަރައިގެން ވެސް އަލިފާންގަނޑަށް ފެން ޖެހުމުގެ މަސައްކަތް އެބަ ކުރޭ.
އެއްވެސް ވަރަކަށް ކޮންޓްރޯލެއް ނުވޭ
އެ ހިސާބުގައި ތިބި 'ދައުރު'ގެ ރިޕޯޓަރުން ބުނާ ގޮތުގައި އަދި ފެންނަ ގޮތުން އަލިފާންގަނޑު ކޮންޓްރޯލްވާހެން ހިއެއްނުވޭ.
"ވަރަށް ވަރުގަދައަށް އަދަމުންދާ ތަން ފެންނަނީ. ކޮންޓްރޯލެއްނުވޭ. ހިއެއްނުވޭ އިމާރާތް ސަލާމަތްވާނެހެންނެއް،" ރިޕޯޓަރަކު ބުންޏެވެ.
ރައީސް މުހައްމަދު މުއިއްޒު މިހާރު ވަނީ އެ ހިސާބަށް ވަޑައިގެންފައި. އެމަނިކުފާނު ހުންނެވީ ވިޔަފާރިވެރިންގެ މިސްކިތް ކައިރީގައި
ހައުސިން މިނިސްޓްރީ ހުންނަ އިމާރާތުގައި އަލިފާން ރޯވެއްޖެ އެވެ.
ވީ ކިހިނެއް؟ - އަމީނީ މަގަށް ވާ ގޮތަށް މާފަންނުކޮޅުގައި ހުންނަ އިމާރާތުގައި އަލިފާން ރޯވިކަން އެނގުނީ މިއަދު ހެނދުނު ގާތްގަނޑަކަށް 7:30 ހާއިރު އެވެ.
ތަފްސީލް: އެމްއެންޑީއެފްގެ މީޑިއާ ގްރޫޕަށް ފޮނުވި މެސެޖެއްގައި ހަމައެކަނި ބުނީ ހައުސިން މިނިސްޓްރީ ހުންނަ އިމާރާތުގައި އަލިފާނުގެ ހާދިސާއެއް ހިނގައިގެން ފަޔާ އެންޑް ރެސްކިއު ސާވިސް (އެފްއާރުއެސް) އިން ހަރަކާތްތެރިވަމުން އަންނަ ކަމަށެވެ.
ބައެއް ފޮޓޯތަކުން ފެންނަ ގޮތުގައި އަލިފާނުގެ ސަބަބުން ވަރަށް ބޯ، ކަޅު ދުއްގަނޑެއް އެ ހިސާބުން މައްޗަށް އަރަމުން ދެ އެވެ. ދުންގަނޑު ބޯކަމުން އެ ހިސާބުގަނޑު ފެންނަ ވަރެއް ވެސް ނުވެ އެވެ.'
މާފަންނު ސްޓޭޑިއަމްއާ ހަމައިން އަމީނީ މަގު މިހާރު ވަނީ ބަންދުކޮށްފަ އެވެ.
'ދައުރު'އަށް އެނގިފައިވާ ގޮތުގައި އެ ހިސާބުގަނޑުގެ ގޭގެއިން މީހުން ނެރެ މިހާރު ވަނީ ކައިރީގައި ހުރި ވިޔަފާރިވެރިންގެ މިސްކިތަށް ގެންގޮސްފަ އެވެ.
"ވަރަށް ބޯ ދުންގަނޑު. ދުންގަނޑު ކުޑަވާހެނެއް ހިއެއް ނުވޭ،" އެ ހިސާބުގައި ދިރިއުޅޭ މީހަކު ބުންޏެވެ.
"އަހަރެމެންގެ ގެއިން މީހުން ނެރުނީ ދެންމެ."
ދަގަނޑުން ހުރި ބައިގައި އެއްކޮށް ރޯވެފައި
ހައުސިން މިނިސްޓްރީ ހުންނަ އިމާރާތުގެ އެއްބައި ހަދާފައި ހުންނަނީ ދަގަނޑު ޓިނުންނެވެ. ބައެއް ވީޑިއޯތަކުން ފެންނަ ގޮތުގައި އެ ބައިގައި ރޯވެފައި ހުރި އަލިފާންގަނޑު ވަރުގަދަކަމުން އިމާރާތް ސަލާމަތްކުރެވިދާނެ ކަމާ މެދު ވެސް އުވާލު އުފެދެ އެވެ.
މަންޒަރު ދުށް ބައެއް މީހުން ބުނި ގޮތުގައި ފުރަތަމަ އަލިފާން ރޯވީ ހައުސިން މިނިސްޓްރީގެ ދޮރު ހުންނަ ހިސާބުގަ އެވެ.
"އޭރު ވަރަށް ކުޑަކޮށް ފެނުނީ. އެކަމަކު ކުއްލިއަކަށް އަލިފާންގަނޑު ބޮޑުވެ ފެތުރުނީ،" އެ ހިސާބުގައި ދިރިއުޅޭ މީހަކު ބުންޏެވެ.
ކޮމެންޓް (2)
ރިސިމިސް
އަމީނާ ހަސަން