ގައުމުން އިންޗިއެއް ވެސް ދޫކޮށްލެވެން ވާނީ ރައްޔިތުންގެ ވޯޓަކުން، މަޖިލީހަށް އެ ބާރު ދިނުން ގޯސް: ޔާމީން

ގައުމުން އިންޗިއެއް ވެސް ދޫކޮށްލެވެން ވާނީ ރައްޔިތުންގެ ވޯޓަކުން ކަމަށާއި ރައްޔިތުންގެ މަޖިލީހުގެ ވޯޓަކުން ގައުމުގެ ސަރަހައްދަށް ބަދަލެއް ގެނެވޭ ގޮތަށް އޮތުމަކީ އެތައް އަހަރެއް ފަހަތަށް ދިޔުން ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.

ވީކިހިނެއް؟ - ރައްޔިތުންގެ ހިޔާލު ހޯދުމުގެ މާ ބޮޑު މަސައްކަތެއް ވެސް ނުހިނގާ، ގާނޫނު އަސާސީއަށް އިސްލާހުތަކެއް ގެންނަން 19 ނޮވެމްބަރުގައި މަޖިލީހަށް ހުށަހަޅައި ހަމަ އެ ދުވަހު މަޖިލީހުން ފާސްކޮށް، ރައީސް މުހައްމަދު މުއިއްޒު ބިލު ތަސްދީގު ކުރެއްވި އެވެ.

ގެނައި އިސްލާހުތަކުގެ ތެރޭގައި މައިގަނޑު ގޮތެއްގައި ހިމެނެނީ:

ބުނީ ކީކޭ؟ - ޕީއެންއެފުން ބޭއްވި ޖަލްސާގައި ވާހަކަ ދައްކަވަމުން އެ ޕާޓީގެ ލީޑަރު ޔާމީން ވިދާޅުވީ ގާނޫނު އަސާސީގައި ހިމެނޭ އަސާސީ ހައްގުތަކާއި ގައުމާއި ދައުލަތުގެ މަސްލަހަތު އިސްވުމާއި ރައްޔިތުންގެ ބާރު ބަޔާންކޮށްދީފައިވާއިރު މިއިން އެއްވެސް ކަމަކަށް ބަދަލެއް ގެނެވެން ވާނީ ވެސް ރައްޔިތުންގެ ހިޔާލު ފުޅާ ދާއިރާއެއްގައި ހޯދައިގެން ކަމަށެވެ.

"ގާނޫނު އަސާސީގައި އެބަ އޮވޭ އަސާސީ ހައްގުތަކުގެ ބާބު ވެސް. އޭގައި ލައްކަ ގިނަ ވާހަކަތައް އެބަ އޮތް. އެއިން ކަމަކަށް ބަދަލު ގެންނަންޏާ ވެސް ޕާޓީން ބުނާ ގޮތް މި ހަދަން ޖެހެނީ. ރައްޔިތުންނާ މަޝްވަރާ ކުރުމެއް ނޯވޭ. ރައްޔިތުންގެ މަޖިލީހުގެ މެންބަރުންގެ ޒިންމާއަކީ ދާއިރާގެ ރައުޔު ހޯދައިގެން ބަދަލުތައް ގެނައުން،" އެ މަނިކުފާނު ވިދާޅުވި އެވެ.

ގާނޫނު އަސާސީއަށް ގެނައި އިސްލާހުތަކުގެ ތެރެއިން، މަޖިލީހަށް ގައުމުގެ ސަރަހައްދު ބަދަލު ގެނެވޭ ގޮތަށް ހެދި އިރު ރާއްޖޭގެ ހަގީގަތަކީ އެހާ ބޮޑު މެޖޯރިޓީއެއް އެއް ޕާޓީއަށް ލިބޭ ކަން ޔާމީން ފާހަގަ ކުރެއްވި އެވެ. މިހާރު ވެސް މަޖިލީހުގެ ބޮޑު މެޖޯރިޓީއެއް އޮތީ ރައީސް މުއިއްޒަށް ކަން ވެސް ފާހަގަ ކުރެއްވި އެވެ.

"ގާނޫނު އަސާސީގައި މި އޮންނަނީ ގައުމުގެ ސަރަހައްދު ޑިފައިންކޮށްފައި، އެއަށް ބަދަލެއް ގެންނަންޏާ ދާން ޖެހޭނީ ރައްޔިތުންގެ ވޯޓަކަށް. ރައީސް މުއިއްޒަށް ވެސް އެކަން ކުރަން ފެނިވަޑައިގަންނަވާ ނަމަ ރައީސުލްޖުމްހޫރިއްޔާއަށް ލިބިދޭ ބާރުތަކުގެ ތެރެއިން ހަމަ ރެފެންޑަމަކަށް ވަޑައިގަންނަވާ." ޔާމީން ވިދާޅުވި އެވެ.

ބޭރުގެ ސިފައިން ތިބުމަށް ދިވެހިން ނޭދޭ ކަން އިންތިހާބުތަކުން ފެންނަ އިރު އެއީ ވެސް މަޖިލީހުގެ ދައުރު އޮންނަން ޖެހޭ ކަމެއް ނޫން ކަމަށް އެ މަނިކުފާނު ވިދާޅުވި އެވެ.

ގުޅުން ހުރި - ގާނޫނުއަސާސީއަށް މި ފަހުން ގެނައި ބަދަލުތައް ބާތިލުކުރަން ސުޕްރީމް ކޯޓަށް ވަނީ މައްސަލައެއް ވެސް ހުށަހަޅައިފަ އެވެ. އެ މައްސަލަ ހުށަހެޅުއްވީ ގާނޫނީ ވަކީލު އަދި ރައްޔިތުންގެ މަޖިލީހުގެ ކުރީގެ މެންބަރު އަލީ ހުސައިނެވެ. 

އެ މައްސަލަ ސުޕްރީމް ކޯޓުން މިހާރު ވަނީ ބަލައިގެންފަ އެވެ. އެނގިފައިވާ ގޮތުގައި އެ މައްސަލަ ސުޕްރީމް ކޯޓުގައި ބައްލަވާނީ ހަތް ފަނޑިޔާރުންގެ ފުލް ބެންޗަކުންނެވެ.