މެއި 6 ހަމަލާއާ ގުޅިގެން ހައްޔަރުކޮށް ބަންދުގައި ތިބި މީހުން (ފޮޓޯ/ޕޮލިސް)
ނަޝީދު އަވަހާރަކޮށްލަން ދިން ހަމަލާ: ދައުވާކުރާ މީހުންގެ ފައިސާގެ މުއާމަލާތްތައް ކިޔައިދީފި
ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގެ މައްސަލާގައި ދައުވާކުރާ މީހުން ފައިސާގެ މުއާމަލާތްތަކެއް ހިންގި ގޮތް ތަހުގީގުގައި ބައިވެރިވި ފުލުސް އޮފިސަރަކު މިއަދު ޝަރީއަތުގެ މަޖިލީހުގައި ކިޔައިދީފި އެވެ.
ވީކިިހިނެއް؟ - އޭރު ރައްޔިތުންގެ މަޖިލީހުގެ ރައީސްގެ މަގާމުގައި ހުންނެވި ނަޝީދު އަވަހާރާކޮށްލަން 6 މެއި 2021 ވަނަ ދުވަހުގެ ރޭ ދިން ހަމަ ލާގެ ތުހުމަތުގައި ދައުވާކޮށް މި ވަގުތު ހަ މީހެއްގެ ޝަރީއަތް ކުރިއަށް އެބަދެ އެވެ. އެއީ:
-
1-
ތަހުމީން އަހުމަދު، ފޮޅޭމާ/ގއ. ކޮނޑޭ
-
2-
މުޖާޒު އަހުމަދު، މއ. ފޭރުގެ/ކ. މާލެ
-
3-
އަލީ ހައިޝަމް، ނޫރީގެ/ނ. މަނަދޫ
-
4-
އިސްހާގު، މއ. ކުދެހިގެ/ކ.މާލެ
-
5-
ފަހުމީ އަލީ، ހުދުރުވާގެ/ގއ. ވިލިނގިލި
-
6-
މުހައްމަދު ނާޒިމް، އަސަރީގެ/އއ. މާޅޮސް
މި ޝަރީއަތުގައި މިއަދު އޮތީ ދައުވާކުރާ މީހުންގެ ދެމެދުގައި ފައިސާގެ މުއާމަލާތްތައް ހިނގި ގޮތް ދިރާސާކުރި އޮފިސަރުގެ ހެކިބަސް ނެގުމެވެ.
ތަފްސީލް - އޮފިސަރު ޝަރީއަތުގައި ބުނި ގޮތުގައި އޭނާ ވަނީ އިސްހާގާއި ތަހުމީނާއި ނާޒިމް އަދި މުޖާޒު ފައިސާގެ މުއާމަލާތްތަކެއް ހިންގާފައިވާކަން ދެނެގަނެފަ އެވެ. އިސްހާގާއި ނާޒިމާ ދެމެދު އެކަނި ވެސް 2021ވަނަ އަހަރު ހަތް ފަހަރު މުއާމަލާތްކޮށްފައިވާ ކަމަށް ބުންޏެވެ.
ހެކިވެރިޔާ ކިޔައިދިން ގޮތުގައި އެ މުއާމަލާތްތައް އުޅެނީ 100ރ. އާއި 20،000ރ.އާ ދެމެދުގަ އެވެ.
އޭގެ ތެރެއިން ކުށާ ގުޅުން ހުރި ކަމަށް ބެލެވޭ މުއާމަލާތުގެ ގޮތުގައި ހެކިވެރިޔާ ފާހަގަކުރީ ނަޝީދު އަވަހާރަކޮށްލަން ތައްޔާރުކުރި ބޮން ހަރުކޮށްފައިވާ ސައިކަލުގެ މަރާމާތަށް ފައިސާ ދައުރުކޮށްފައިވާ ގޮތެވެ. އެގޮތުން:
-
މި މުއާމަލާތް ހިނގީ 17 މާޗު 2021ގައި
-
އިރުއޮއްސި 6:31ގައި، އިސްހާގުގެ އެކައުންޓުން ތަހުމީންގެ އެކައުންޓަށް 180ރ. ފޮނުވި
-
ރޭގަނޑު 7:34ގައި ތަހުމީންގެ އެކައުންޓުން ނާޒިމްގެ އެކައުންޓަށް ހަމަ އެ އަދަދަށް ފައިސާ ފޮނުވި
-
ރޭގަނޑު 7:24ގައި ނާޒިމްގެ އެކައުންޓުން، ސައިކަލު މަރާމާތުކޮށްދިން ބިދޭސީ މީހާއަށް ހަމަ އެ އަދަދަށް ފައިސާ ފޮނުވި
-
ބިދޭސީ މީހާއަށް ނާޒިމް ފައިސާ ފޮނުވި އިރު ވެސް އެ އަދަދަށް ވުރެ މާ ގިނަ ފައިސާ އޭނާގެ އެކައުންޓުގައި ހުރި
-
ނާޒިމް ސައިކަލުގެ މަރާމާތަށް ފައިސާ ފޮނުވިތާ އިރުކޮޅެއް ތެރޭގައި ހަމަ އެ އަދަދަށް ތަހުމީން ފައިސާ ފޮނުވީ އެއީ ތަހުމީން ބުނެގެން ކުރި ކަމަކަށް ވާތީ
އެނގުން މުހިންމު - ޝަރީއަތް ކުރިއަށްދާ ހަ މީހުންގެ މައްޗަށް ކޮށްފައިވާ ދައުވާތަކަކީ:
-
ތަހުމީން އަހުމަދު: ޓެރަރިޒަމްގެ އަމަލެއް ކުރުމުގައި ބައިވެރިވުމުގެ ދައުވާ އާއި ގޮވާތަކެތި އެހެން ތަނަކަށް ގެންދިއުމަށް އެހީތެރިވެދިނުމުގެ ދައުވާ އަދި ޓެރަރިސްޓް ޖަމާއަތަކަށް ތާއިދުކުރުމުގެ ދައުވާ.
-
މުޖާޒު އަހުމަދު: ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ އަދި ކުށެއްކޮށްފައިވާ މީހަކު ފިލުވުމަށް އެހީތެރިވެދިނުމުގެ ދައުވާ. މުޖާޒްގެ މައްޗަށް ދައުވާ ކުރަނީ އައިއީޑީ ގޮއްވާލުމަށް ފަހު އަދުހަމް ފިލުވަން މަސައްކަތް ކުރިކަމަށް ތުހުމަތުކޮށް.
-
އަލީ ހައިޝަމް: ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ އާއި ގޮވާ ތަކެތި އެހެން ތަނަކަށް ގެންދިއުމަށް އެހީތެރިވެދިނުމުގެ ދައުވާ އަދި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ
-
އިސްހާގު: ގޮވާތަކެތި އެހެން ތަނަކަށް ގެންދިއުމުގެ ދައުވާ، ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ އަދި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ. އިސްހާގަށް ތުހުމަތު ކުރަނީ އެކި ފަހަރުމަތިން ނަޝީދަށް ފާރަލި ކަމަށް.
-
ފަހުމީ އަލީ: ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ. ފަހުމީއަށް ތުހުމަތު ކުރަނީ ގޮއްވާލި ސައިކަލުގައި ބޮން ހަރުކުރި ވަގުތު ފާރައަށް ހުރި ކަމަށް.
-
މުހައްމަދު ނާޒިމް: ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ. ނާޒިމަށް ތުހުމަތު ކުރަނީ ބޮން ގޮއްވި އަދުހަމް އަހުމަދަށް ބޮން ގޮއްވަން ބޭނުން ކުރި ރިމޯޓު ދިން ކަމަށް.
ގުޅުން ހުރި - ނަޝީދު އަވަހާރާކޮށްލަން ދިން ހަމާލާގެ ތުހުމަތުގައި ހައްޔަރުކޮށް ދައުވާކުުރި މީހުންގެ ތެރެއިން ހަމަލާ ދިނުމުގައި އަމަލީ ގޮތުން ބައިވެރިވި އަދުހަމް އަހުމަދު ރަޝީދު އިއުތިރާފްވެ ދައުލަތާ އެކު އެއްބަސްވުމެއް ހެދި އެވެ. އޭނާ ވަނީ 23 އަހަރަށް ޖަލަށްލައިފަ އެވެ.
ކޮމެންޓް (2)
ސިކުނޑި
ފަންޑުކުރީ