އިންޑިއާއިން ރާއްޖެ ފޮނުވި ހަކުރު ޝިޕްމަންޓެއް ލަންކާއަށް ގެންދިއުމުން ތަހުގީގު ކުރަނީ

ހާއްސަ އެއްބަސްވުމެއްގެ ދަށުން އިންޑިއާއިން ރާއްޖެއަށް ފޮނުވި 70 ޓަނުގެ ހަކުރު ރާއްޖެ ނުގެނެސް، އެ ތަކެއްޗާ ހަވާލުވެ ތިބި ބައެއް ފަރާތްތަކުން ގަވާއިދާ ހިލާފަށް ސްރީ ލަންކާއަށް ގެންދިޔަ ކަމަށް ބުނާ މައްސަލައެއް އިންޑިއާގެ ސަރުކާރުން ތަހުގީގު ކުރަން ފަށާފައިވާ ކަމަށް އިންޑިއާގެ ބައެއް ނޫސްތަކުން މިއަދު ބުނެފި އެވެ.

ވީ ކިހިނެއް؟ - އިންޑިއާގެ އިގްތިސާދީ ވުޒާރާގެ ދަށުން ހިންގާ ދި ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ)އާ ހަވާލާދީ އިންޑިއާ ޝިޕިން ނިއުސްގައި ބުނެފައިވަނީ މިދިޔަ 25 އޮކްޓޫބަރުގައި އެ މައްސަލަ ފެންމަތިވެގެން ރިޕޯޓްކޮށްފައިވާ ކަމަށެވެ.

މިއީ، މިދިޔަ 5 އޭޕްރީލްގައި ރާއްޖެ އާއި އިންޑިއާ އިން ހެދި ހާއްސަ އެއްބަސްވުމެއްގެ ދަށުން ރާއްޖެއަށް ފޮނުވަން ނިންމާފައިވާ ޖުމްލަ 64،494.33 ޓަނުގެ ހަކުރުގެ ތެރޭގައި ހިމެނޭ 70 ޓަނެވެ. އެ އެއްބަސްވުމުގެ ދަށުން، ހަކުރުގެ އިތުރުން ހަނޑޫ، ފުށް، މުގު، ބިސް، ފިޔާ އަދި އަލުވި އިންޑިއާ އިން ރާއްޖެއަށް އިމްޕޯޓްކުރަން ވަނީ ނިންމާފަ އެވެ.

ތަފްސީލް - އެ ނޫހުން ރިޕޯޓްކޮށްފައިވާ ގޮތުގައި، ޑީޖީއެފްޓީން މިހާރު އަންނަނީ އެ މައްސަލަ ތަހުގީގްކުރަމުންނެވެ. އަދި ރާއްޖެއަށް ހަކުރު އެެކްސްޕޯޓްކުުރުން ވެސް ވަނީ މަޑުޖައްސާލާފަ އެވެ.

އެ ނޫހުން ބުނެފައިވަނީ:

އެނގުން މުހިންމު - މިދިޔަ އަހަރުގެ ސެޕްޓެމްބަރުން މިދިޔަ އޮކްޓޫބަރުގެ ނިޔަލަށް އިންޑިއާ އިން އާންމު ގޮތެއްގައި ހަކުރު އެކްސްޕޯޓް ނުކުރަން ނިންމާފައިވީ ނަމަވެސް، ރާއްޖެއަށް އެ ތަކެތި ގެނައީ ދެ ގައުމުގެ ދެމެދު ހެދި ހާއްސަ އެއްބަސްވުމުގެ ދަށުންނެވެ. މި ސީޒަންގައި އިންޑިއާ އިން ހަކުރު އެކްސްޕޯޓްކުރަން ހުއްދަ ދިނީ މުންދްރާ، ޓުޓުކޮރިން އަދި ނާވާ ޝީވާ ޕޯޓު މެދުވެރިކޮށެވެ.