15 ސެޕްޓެމްބަރު 2024: ނޯ ސްމޯކިން ނިޝާންތައް. (ދައުރު ފޮޓޯ/ އަބްދުﷲ އަނޫފް ޖުނައިދް)
އާ ގަވާއިދާ އެކު ދުންފަތުގެ ބާވަތްތައް ވިއްކޭނީ ލައިސެންސެއް ހޯދައިގެން: ހެލްތު މިނިސްޓްރީ
ދުންފަތުގެ ގާނޫނަށް ގެނައި ބަދަލާ އެކު ހަދާ ގަވާއިދުތައް ހެދުމުން ދުންފަތުގެ ވިޔަފާރި ކުރެވޭނީ އެކަމަށް ހާއްސަ ލައިސެންސެއް ނަގައިގެން ކަމަށް ހެލްތު މިނިސްޓްރީން މިއަދު ބުނެފި އެވެ.
ވީ ކިހިނެއް؟ - ދުންފަތުގެ ގާނޫނަށް ގެނައި އިސްލާހަށް އަމަލު ކުރަން ފަށާފައިވަނީ މިދިޔަ ހުކުރު ދުވަހު އެވެ. އެ ގާނޫނުގެ ދަށުން މި މަހު 15 އިން ފެށިގެން ވޭޕް ބޭނުން ކުރުމާއި ވިއްކުން އަދި ބެހުން މަނާވާނެ އެވެ. އަންނަ މަހު 15ގެ ފަހުން އެކަންކަން ކޮށްފި ނަމަވެސް ބޮޑެތި ޖޫރިމަނާ އަންނާނެ އެވެ. އެގޮތުން:
-
ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރެވޭނެ؛ އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ.ގެ މަގުން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ، 20،000ރ. އިން ޖޫރިމަނާ ކުރެވޭނެ؛ ވިއްކި ކޮންމެ އެއްޗަކަށް 10،000ރ.ގެ މަގުން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ހިލޭ ބަހައިފި ނަމަ، 10،000ރ. އިން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ކަމަށްވާ ނަމަ، އިތުރު 50،000ރ. އިން ޖޫރިމަނާ ކުރެވޭނެ
-
އެފަދަ އުފެއްދުމެއް ބޭނުންކޮށްފި ނަމަ، 5،000ރ. އިން ޖޫރިމަނާ ކުރެވޭނެ
ތަފްސީލް - ހެލްތު މިނިސްޓްރީން މިއަދު ކުރި އިއުލާނެއްގައި ބުނީ އެ ގާނޫނަށް އަމަލު ކުރަން ފެށުމާ އެކު ދުންފަތުގެ ބާވަތްތައް ރާއްޖެއަށް އެތެރެކުރާ އަދި ރާއްޖޭން ބޭރުކުރާ ކޮންމެ ފަރާތަކާއި ދުންފަތުގެ ބާވަތްތައް ގަނޑުކޮށް ނުވަތަ ވަކިވަކިން ރާއްޖޭގައި ވިއްކާ ކޮންމެ ފަރާތެއްގެ ކިބައިގައި ސަރުކާރުގެ ކަމާ ބެހޭ އިދަރާތަކުން ދޫކުރާ ސައްހަ ލައިސެންސެއް އޮންނަންވާނެ ކަމަށެވެ.
އެ ލައިސެންސް ހޯދަން ލާޒިމްވާނީ ގާނޫނުގައި ބަޔާންކޮށްފައިވާ ފަދައިން އެ ހުއްދަތައް ދިނުމުގެ އުސޫލާއި އިޖުރާއަތްތައް ކަނޑައަޅާ ބަޔާންކުރާ ގަވާއިދު އާންމުކުރުމުން އެ އެ ގަވާއިދުގައި ކަނޑައަޅާ މުއްދަތެއްގައި ކަމަށް ވެސް އެ އިއުލާނުގައި ބުނެފައިވެ އެވެ.
އެ ލައިސެންސް ދޫކުރުމަށް އެ ގާނޫނަށް އަމަލުކުރަން ފަށާތާ 60 ދުވަހުގެ ތެރޭގައި ވަކި ގަވައިދެއް ހަދަން ޖެހޭނެ އެވެ.
އެނގުން މުހިންމު - ދުންފަތުގެ ގާނޫނަށް ގެނައި އަނެއް ބޮޑު ބަދަލަކީ ސަރުކާރުން ނިންމާފައިވާ ގޮތަށް، ދުންފަތުގެ ބާވަތްތައް ވިއްކޭނެ އެންމެ ހަގު އުމުރަކީ ގާނޫނުގައި އޭރު އޮތް 18 އަހަރުގެ ބަދަލުގައި 21 އަހަރަށް މަތިކުރުމެވެ.
އޭގެ އިތުރުން، މަނާ ތަންތަނުގައި ދުންފަތުގެ އިސްތިއުމާލުކޮށްފި ނަމަ، ހަރުކަށި ފިޔަވަޅު އެޅުމަށް ވެސް މި އިސްލާހުގައި ހިމަނާފައިވެ އެވެ.
ފާހަގަކޮށްލެވޭ ކަމެއް - ކުރީގެ ރައީސް މުހައްމަދު ނަޝީދުގެ ސަރުކާރުގައި އޭރު އޮތް 16 ވަނަ މަޖިލީހުން ފާސްކޮށް، އޮގަސްޓު 2010ގައި އަމަލު ކުރަން ފެށި ދުންފަތް ކޮންޓްރޯލް ކުރުމުގެ ގާނޫނަށް މިވީ 14 އަހަރުގެ ތެރޭގައި އެއްވެސް އިސްލާހެއް ގެނެެސްފައެއް ނުވެ އެވެ. މިއީ މިވީ 14 އަހަރު ތެރޭ މި ގާނޫނަށް ގެނައި ފުރަތަމަ އިސްލާހެވެ.
ވޭޕް އެތެރެ ކުރުން މަނާ ކުރިއިރު، ސަރުކާރުން ވަނީ ދުންފަތުގެ ބާވަތްތަކުން ނަގަމުން އައި ޑިއުޓީ ވެސް ބޮޑުތަނުން ބޮޑުކޮށްފަ އެވެ. އެއާ އެކު، ކުރިން 100ރ.އަށް ގަންނަން ލިބޭ ސިނގިރޭޓު ފޮއްޓެއްގެ އަގު މިހާރު ލިބެން ހުރީ 230ރ. އިން މަތިންނެވެ.
ކޮމެންޓް