އެމްޑީޕީގެ މުޒާހަރާ ތެރެއަށް ޕީއެންސީގެ ސިޔާސީ މުވައްޒަފުން ވަދެގެންފި

ގާނޫނުއަސާސީ ދިފާއު ކުރުމުގެ ނަމުގައި އިދިކޮޅު އެމްޑީޕީއިން މިހާރު ކުރަމުންދާ މުޒާހަރާގެ ތެރެއަށް ސަރުކާރު ހިންގާ ޕީއެންސީގެ ސިޔާސީ މުވައްޒަފުން ވަދެގެންފި އެވެ.

ވީ ކިހިނެއް؟ - މިއީ ސަރުކާރުން ގާނޫނުއަސާސީއަށް ގެންނަން ހުށަހަޅާފައިވާ އިސްލާހުތަކާ ދެކޮޅަށް އަޑުއުފުލުމުގެ ގޮތުން އެމްޑީޕީއިން ބާއްވާ މުޒާހަރާއެކެވެ.

ތަފްސީލު - މުޒާހަރާގެ ބައިވެރިން ރައްޔިތުންގެ މަޖިލީހުގެ އިދާރާ ދޮށަށް އެއްވެ ޝުއޫރު ފާޅުކުރަން މަސައްކަތް ކުރި ނަމަވެސް، ފުލުހުން ވަނީ އެ މީހުން އެ ސަރަހައްދުން ފަހަތަށް ޖައްސާފަ އެވެ.

މުޒާހަރާ ފެށިތާ މާ ގިނައިރުތަކެއް ނުވަނީސް ޕީއެންސީގެ ސިޔާސީ މުވައްޒަފުންތަކެއް ވަނީ އެމްޑީޕީ ސަޕޯޓަރުންގެ ފަހަތުން އެ ސަރަހައްދަށް ގޮސް، ހަމަނުޖެހުން އުފައްދަން މަސައްކަތް ކޮށްފަ އެވެ.

އެމްޑީޕީ ސަޕޯޓަރުންނާއި ޕީއެންސީގެ ސިޔާސީ މުވައްޒަފުންގެ މެދުގައި ބަހުގެ ހަމަލާތަކެއް ބަދަލުކުރި ނަމަވެސް، އަދި މިހާތަނަށް އެއްވެސް ހަމަނުޖެހުމެއް ހިންގިކަން އެނގިފައެއް ނުވެ އެވެ.

އެފަދަ ކަމެއް ހިނގާފާނެތީ އެ ސަރަހައްދު ކޮންޓްރޯލް ކުރަން ތިބި ފުލުހުން ވަނީ ދެ ޕާޓީގެ މީޙުންގެ ދެމެދަށް ވަދެ، އެމީހުން ދުރުކޮށްފަ އެވެ.