ބޭރު ދުނިޔޭގައި ސަރުކާރުގެ އިތުބާރު ގެއްލިއްޖެ: ޝާހިދު

ބޭރު ދުނިޔޭގެ ކުރިމަތީގައި ރާއްޖެއަށާއި މި ސަރުކާރަށް އޮތް އިތުބާރު ގެއްލިފައިވާ ކަމަށް އެމްޑީޕީގެ ރައީސް އަދި މިދިޔަ ސަރުކާރުގެ ފޮރިން މިނިސްޓަރު އަބްދުﷲ ޝާހިދު އިއްޔެ ވިދާޅުވެއްޖެ އެވެ.

ވީ ކިހިނެއް؟ - މި ސަރުކާރަށް މިދިޔަ އާދިއްތަ ދުވަހު އެއް އަހަރު ފުރުމާ ގުޅިގެން ޝާހިދު އާއި މިދިޔަ ސަރުކާރުގައި ޑިފެންސް މިނިސްޓަރުކަން ކުރެއްވި މާރިޔާ އަހްމަދު ވަނީ ރާއްޖެ ޓީވީއަށް އިންޓަވިއުއެއް ދެއްވާފަ އެވެ.

ބުނީ ކީކޭ؟ - ޝާހިދު ވިދާޅުވީ ހުރިހާ ގައުމެއްގެ ކުރިމަތީގައި ރާއްޖޭގެ އިތުބާރު ގެއްލިފައިވާ ކަމަށެވެ. އެހެން ދިމާވީ އަވަށްޓެރި އިންޑިއާގެ ވެރިންނަށް އަމާޒުކޮށް މި ސަރުކާރުގެ އިސްވެރިންތަކެއް ދެއްކެވި ވާހަކަތަކާ ގުޅިގެން ކަމަށް އޭނާ ވިދާޅުވި އެވެ.

"ހަމައެކަނި އަޅުގަނޑުމެންގެ އަވަށްޓެރި ގައުމުތަކުގެ ކުރިމަތީގައެއް ނޫން މި ސަރުކާރުގެ އިތުބާރު ގެއްލިގެން ގޮސްފައިވަނީ. ދުނިޔޭގެ ހުރިހާ ގައުމުތަކެއްގެ ކުރިމަތީގައި ވެސް، ހުރިހާ ގައުމެއް ވެސް މި ސަރުކާރާ ދޭތެރޭ ދެކެމުން ދަނީ، މި ސަރުކާރުގެ ވެރިންނަކީ އަދި އެހެން އައިސް ވާހަކައެއްް ދައްކާލިޔަސް އެތެރެ ނުބައި، ހަސީލަތް ގޯސް އިތުބާރު ނުކުރެވޭ ބައެއްގެ ގޮތުގައި،" ޝާހިދު ވިދާޅުވި އެވެ.

ރާއްޖެއަށް ބޭރު ދުނިޔޭގެ އިތުބާރު ގެއްލިފައިވާ ކަމަށް ވިދާޅުވެ ޝާހިދު ވަނީ މިސާލުތަކެއް ދައްކަވާފަ އެވެ. އެގޮތުން، މިދިޔަ އެމްޑީޕީ ސަރުކާރުގައި ދިވެހިންނަށް ވިސާ ނެތި ތުރުކީއަށް ދެވޭނެ އިންތިޒާމް ހަމަޖެއްސި ކަމަށާއި ނަމަވެސް މިހާރު ވިސާ ނަގަން ޖެހޭ ކަމަށް އޭނާ ވިދާޅުވި އެވެ.

"މި ސަރުކާރުން އާދަޔާ ހިލާފު ގާތް ކަމެއް އުފެއްދީމޭ ބުނެ އެމްބަސީ ވެސް އުފެއްދި. އެކަމަކު މިހާރު ވިސާ ނަގަން ޖެހޭ، މިހާރު 25 ޔޫރޯ ދައްކަން ޖެހޭ އޮންލައިންކޮށް. އެ ދައްކައިގެން އީ-ވިސާ ނަގައިގެން ނޫނިއްޔާ ދިވެއްސަކަަށް ތުރުކީއަކަށް ނުދެވޭ،" މިދިޔަ ސަރުކާރުގައި، އދ.ގެ އާންމު މަޖިލީހުގެ ރައީސްކަން ވެސް ކުރެއްވި ޝާހިދު ވިދާޅުވި އެވެ.

"އެ ހިސާބަށް އެ ދަނީ ކީއްްވެތޯ. އެއީ އެއްކަލަ އިތުބާރު ގެއްލެމުން، ކެނޑެމުން އެހެރަ ދަނީ."

އިތުރު މިސާލެއްގެ ގޮތުގައި، ވެރިކަމަށް ވަޑައިގަންނަވަން ކުރެއްވި މަސައްކަތްތަކުގައި ރައީސް މުހައްމަދު މުއިއްޒު ދެއްކެވި ވާހަކަފުޅުތަކުގެ ތެރެއިން އެކި ގައުމުތަކުން ފެހި ސިގްނަލް ލިބިވަޑައިގަންނަވާ ކަމަށް ވިދާޅުވެ ދެއްކެވި ވާހަކަތައް ޝާހިދު ފާހަގަކުރެއްވި އެވެ.

"ވެރިކަމަށް ވަޑައިގަންނަވަމުން ވިދާޅުވި ފެހި ކުލައިގެ ސިގްނަލްތައް ފެންނަނީއޭ، ފެންނަނީއޭ. މިވެނި ކަމަކަށް ސިގްނަލް ލިބިއްޖޭ، މިވެނި ކަމަކަށް ސިގްނަލް ލިބިއްޖޭ. އަހަރުވީއިރު ބައްލަވާ ކޯޗެއްތޯ ލިބުނީ، ކޮން ކަމެއްތޯ ކުރެވުނީ؟،" އޭނާ ސުވާލު ކުރެއްވި އެވެ.

އޭގެ އިތުރުން ޝާހިދު ވިދާޅުވީ:

ގުޅުން ހުރި - ޝާހިދުގެ އެ ވާހަކައަށް ތާއީދުކުރައްވައި މާރިޔާ ވެސް ވިދާޅުވީ މި ސަރުކާރަށް ލޯނެއް ފަސްކޮށްދިނުން ފިޔަވާ އިތުރުކަމެއް ގައުމަކުން ކޮށްދީފައި ނުވާ ކަމަށެވެ.

އެމްޑީޕީ ނޫން ސަރުކާރުތަކުން އަބަދު ވެސް ބޭރު ދުނިޔޭގައި ރާއްޖެއަށް ކުރާ އިތުބާރު ގެއްލުވަމުންދާ ކަމަށް މާރިޔާ ވިދާޅުވި އެވެ. އެކަމުގެ ސަބަބުން އެމްޑީޕީން ވެރިކަމަށް އައިސް، އެ އިތުބާރު ހޯދަން އެތައް މަސައްކަތް ކުރަން ޖެހޭކަން އޭނާ ފާހަގަކުރެއްވި އެވެ.