މޯލްޑިވިއަން ހިންގާ އައިލެންޑް އޭވިއޭޝަނުގެ ޑީއެމްޑީގެ މަގާމުގައި ކުރިން ހުންނެވި ޖެނިފާ. އޭނާ މަގާމުން ވަކިކުރީ ގާނޫނާ ހިލާފަށް ކަމަށް ވަޒީފާ އާ ބެހޭ ޓްރައިބިއުނަލުން ވަނީ ކަނޑައަޅާފައި (ފޮޓޯ/މޯލްޑިވިއަން)
ޖެނިފާ ވަޒީފާއިން ވަކިކުރުން ދިފާއުކުރަން އައިއޭއެސްއިން ހައި ކޯޓަށް
އައިލެންޑް އޭޭވިއޭޝަން (އައިއޭއެސް)ގެ ޑެޕިއުޓީ މެނޭޖިން ޑިރެކްޓަރު (ޑީއެމްޑީ)ގެ މަގާމުން އާއިޝަތު ޖެނިފާ ވަކިކުރީ ގާނޫނާ ހިލާފަށް ކަމަށް ކަނޑައަޅައި މުސާރަ އާއި މާލީ ގެއްލުމުގެ ބަދަލު ދިނުމަށް ވަޒީފާއާ ބެހޭ ޓްރައިބިއުނަލުން ކުރި ހުކުމް އެ ކުންފުނިން ހައި ކޯޓުގައި އިސްތިއުނާފުކޮށްފި އެވެ.
މައްސަލައިގެ ފެށުން - އައިއޭއެސްގެ ޑީއެމްޑީގެ މަގާމަށް ޖެނިފާ އައްޔަންކުރީ މިދިޔަ ސަރުކާރުގައި، 28 ޑިސެމްބަރު 2018ގަ އެވެ. އޭނާ މަގާމުން ވަކިކުރީ މި ސަރުކާރު އައުމަށް ފަހު، 28 ޑިސެމްބަރު 2023ގައި ބޭއްވި ބޯޑު ބައްދަލުުވުމަކުން އެގޮތަށް ނިންމައިގެނެވެ.
އައިއޭއެސްގެ ޑީއެމްޑީގެ މަގާމުގެ މުސާރައިގެ ގޮތުގައި ޖެނިފާއަށް މަހަކު 34،304ރ. ލިބިވަޑައިގެންނެވިއިރު، އެ މަގާމުގެ އެހެން އިނާޔަތްތަކުގެ ގޮތުގައި 21،867ރ.އޭނާއަށް ދިނެވެ.
އެ މައްސަލާގައި މިދިޔަ މަހު 13 ވަނަ ދުވަހު ޓްރައިބިއުނަލުން ނިންމާފައިވަނީ:
-
ޖެނިފާ މަގާމުން ވަކިކުރީ ވަޒީފާއާ ބެހޭ ގާނޫނާ ހިލާފަށް
-
ޖެނިފާ އަދާކުރަމުންދިޔަ ވަޒީފާ އަނބުރާ ދިނުމަށް
-
އޭނާ ވަޒީފާ އިން ވަކިކުރި ތާރީހުން ފެށިގެން ޓްރައިބިއުނަލުން މައްސަލަ ނިންމުމާއި ހަމައަށް އޭނާ ވަޒީފާގައި ދެމިހުރި ނަމަ ލިބިވަޑައިގަންނަވާނެ މުސާރަ އާއި އިނާޔަތަށްވާ ފައިސާ ދިނުމަށް
-
ގެއްލުމުގެ ބަދަލުގައި އެއް މަހުގެ މުސާރަ ކަމަށްވާ 56،717ރ. ދިނުމަށް
ވީކިހިނެއް؟ - ހައި ކޯޓުގެ ރަޖިސްޓްރީން ދައްކާ ގޮތުގައި، މިދިޔަ ހަފްތާގެ އަންގާރަ ދުވަހު އެ ހުކުމް އެ ކޯޓުގައި ވަނީ އިސްތިއުނާފުކޮށްފަ އެވެ. އިސްތިއުނާފުގެ މައްސަލަ ބަލައިގަތުމާ މެދު ކޯޓުން ވަކި ގޮތެއް އަދި ނުނިންމާ ކަމަށް ވެސް ރަޖިސްޓްރީން ދައްކަ އެވެ.
ތަފްސީލް - ޖެނިފާ ޓްރައިބިއުނަލަށް ހުށަހެޅުއްވި މައްސަލާގައި ވަނީ:
-
ޖެނިފާ މަގާމުން ވަކިކުރުމަށް 28 ޑިސެމްބަރު 2023ގައި އައިއޭއެސްގެ ބޯޑުން ނިންމި ނިންމުމަކީ ބާތިލް ނިންމުމެއް ކަމަށް ކަނޑައަޅައިދިނުމަށް
-
އޭނާ މަގާމުން ވަކިކުރަން ނިންމައި އެންގި އެންގުމާއި ވަޒީފާ އިން ވަކިކުރިކަން އަންގައި ދިން ޗިޓަކީ ބާތިލް އެއްޗެއް ކަމަށް ކަނޑައަޅައިދިނުމަށް
-
އޭނާ އަކީ ވަޒީފާ އިން ވަކިވެފައިވާ ފަރާތެއް ކަމަށް ނުބެލުމަށް
-
ވަޒީފާއާ ބެހޭ ޓްރައިބިއުނަލުން މައްސަަލަ ނިންމާތާ ހަތް ދުވަސް ތެރޭ އޭނާއަށް އައިއޭއެސްގެ ޑީއެމްޑީގެ މަގާމު ދިނުމަށް ކަނޑައަޅައިދިނުމަށް
-
ވަޒީފާ އިން ވަކިކުރި ތާރީހުން ފެށިގެން ޓްރައިބިއުނަލުން މައްސަލަ ނިންމަން ހޭދަވި މުއްދަތުގައި އޭނާ ވަޒީފާގައި ދެމިހުރެއްޖެ ނަމަ، ލިބޭނެ މުސާރަ އާއި އިނާޔަތްތައް އަދި ވަޒީފާގެ ކުރިއެރުންތައް އަދި ވަޒީފާ އިން ވަކިކުރުމުން ލިބުނު މާލީ ގެއްލުމުގެ ބަދަލުގައި ތިން މަހުގެ މުސާރަ ނަގައިދިނުމަށް
-
ޓްރައިބިއުނަލަށް މައްސަލަ ހުށަހެޅުމަށް ގާނޫނީ ވަކީލުން އައްޔަންކުރުމާއި މައްސަލަ ކުރިއަށް ގެންދަން ހޭދަވި ހަރަދު އައިއޭއެސް އިން ނަގައިދިނުމަށް
-
އެ މައްސަލާގައި އޭނާއަށް ބަދަލު ނަގައިދީ، އެ ފައިސާ އެކީ އެއްފަހަރާ ހަތް ދުވަހުގެ ތެރޭ އޭނާއަށް ދިނުމަށް ކަނޑައަޅައިދިނުމަށް
ކޮމެންޓް