އިއްޔެ ބޭއްވި ވަޒީރުންގެ މަޖިލީހުގައި ރައީސް މުހައްމަދު މުއިއްޒު(ފޮޓޯ/ރައީސް އޮފީސް)
މުލިޔާގެ ގަރާޖު ޒުވާނުންގެ މަރުކަޒަކަށް ހަދަން ރައީސް ނިންމަވައިފި
މުލިޔާގެ ގަރާޖުގެ ގޮތުގައި ބޭނުންކުރަމުން އަންނަ އިމާރާތާއި ގޯތި ޒުވާނުންގެ މަރުކަޒެއްގެ ގޮތުގައި ތަރައްގީކުރެއްވުމަށް ރައީސް މުހައްމަދު މުއިއްޒު ނިންމަވައިފި އެވެ.
ވީ ކިހިނެއް؟ - ލިލީމަގުގައި ހުންނަ މުލިޔާގޭގެ ވެހިކަލް ގަރާޖު 'ޒުވާނުންގެ ތާޑު ސްޕޭސް' ނަމުގައި ތަރައްގީކުރަން ރައީސް ނިންމެވީ ވަޒީރުންގެ މަޖިލީހުގެ ލަފާފުޅާއެކު އެވެ. މި ނިންމުން ނިންމީ އިއްޔެ އޮތް ވަޒީރުންގެ މަޖިލީހަށް ކޮންސްޓްރަކްޝަން މިިނިސްޓްރީން ހުށަހެޅުއްވި ކަރުދާހަށް މަޝްވަރާ ކުރެއްވުމަށް ފަހު އެވެ.
ތަފްސީލް - ރައީސް އޮފީހުން ބުނިގޮތުގައި އެ ގަރާޖު މުޖުތަމައަށް ފައިދާހުރި ކަންތައްތަކެއް ކުރާ ތަނަކަށް ބަދަލުކުރުމަށް ވަޒީރުންގެ މަޖިލީހަށް ހުށަހަޅާފައިވަނީ ޒުވާނުންނާ ގުޅޭ ހަރަކާތްތައް ހިންގުމަށް ދިމާވެފައިވާ ޖާގައިގެ ދަތިތަކަށް ހައްލު ހޯދައިދިނުމުގެ ގޮތުންނާއި ޒުވާނުން ބާރުވެރިކުރުވައި، ހުނަރުވެރިކުރުވައި މުޖުތަމައުގެ އެކި ފަރާތްތަކާ އެކު އިޖުތިމާއީ ގުޅުން ބަދަހިކުރުމަށް ކަމަށެވެ.
މުލިއާގޭ ވެހިކަލް ގަރާޖު ހުންނަ ސަރަހައްދަކީ ގިނަ ސްކޫލްތަކެއް ހުންނަ މަގުމަތީގެ ކާރުބާރު ބޮޑު ސަރަހައްދަކަށްވުމާ އެކު، އެ ސަރަހައްދު ބޭނުންކުރާ ފަރާތްތަކަށް ދަތިނުވާނެ ފަދަ ރަނގަޅު ޓްރެފިކް މެނެޖްމަންޓް ޕްލޭނަކާއެކު ޒުވާނުންގެ މަރުކަޒުގެ މަސައްކަތް ކުރިއަށް ގެންދިއުމަށް ވެސް ރައީސް ވަނީ ނިންމަވާފަ އެވެ. މިފަދަ ތަންތަނަކީ ޒުވާނުންގެ އީޖާދީ ވިސްނުން ހަގީގަތަކަށް ހަދައި ޒުވާނުން ބާރުވެރިކުރުވުމަށް މުހިންމު މަންސައެއްކަމުގައި ހައްދަވާނެ ކަމަށް ރައީސް ވަނީ މީގެކުރިން ވިދާޅުވެފަ އެވެ.
މި ތަނުގައި ކުރިއަށް ގެންދިއުމަށް ހުށަހަޅާފައިވާ ކަންތައްތަކަކީ:
-
އެކިކަހަލަ ބޫޓް ކޭމްޕްތައް
-
ސްކިލް އެކްސްޗޭންޖް ޕްރޮގްރާމްތައް
-
ވާޗުއަލް ރިއަލިޓީ ޓްރެއިނިން
-
ކޮމިއުނިޓީ އާޓް ވޯލް
-
އިންޓްރެކްޓިވް ކޮމިއުނިޓީ ހަބް
-
އެކިކަހަލަ މަސައްކަތު ބައްދަލުވުން
-
ކަލިނަރީ އިވެންޓްތައް
-
ރާއްޖެއަށް ހާއްސަ ކާބޯތަކެތި ވިއްކުމަށް
-
ރާއްޖޭގެ ކުދި އަދި މެދު ފަންތީގެ ކާބޯތަކެތި ވިއްކާ ފަރާތްތަކުގެ އުފެއްދުންތައް އިޝްތިހާރުކޮށް ވިއްކުމަށް
-
ސިއްހަތަށް ފައިދާހުރި ކެއުންތައް ޕްރޮމޯޓްކުރާ ކެފެޓޭރިއާ
-
ނަފްސާނީ ދުޅަހެޔޮކަމަށް މަގުފަހިކުރުމަށް މިތަނުގެ ބައެއް ހަމަޖެއްސުމަށް ވެސް ހުށަހަޅާފައިވޭ
ރައީސް އޮފީހުން ބުނިގޮތުގައި ޒުވާނުންނަށް ހާއްސަ ތާޑް ސްޕޭސް ސަރަހައްދުތަކަކީ ޒުވާނުންގެ ހުނަރުތައް އިތުރަށް ކުރިއެރުވުމަށް މަސައްކަތްކުރުމަށް ލިބޭ ވަރަށް ބޭނުންތެރި މުހިންމު ތަނެކެވެ. އެތަން ފަރުމާކުރާނީ ކަންކަން އުނގެނުމަށާއި އެކި ކަހަލަ ހުނަރުތައް ދަސްކޮށްދިނުމަށާއި އެކަކު އަނެކަކާ ބައްދަލުކޮށް ގުޅުން ބަދަހިކުރުމަށް މަގުފަހިކުރެވޭނެގޮތަށް ތިމާވެއްޓާ ރައްޓެހި ތަނެއްގެ ގޮތުގައި ކަމަށް ރައީސް އޮފީހުން ބުންޏެވެ.
އެނގުން މުހިންމު - މުލިއާގޭގެ ގަރާޖު މިހާރު ހުރި ބިން އެ އިމާރާތުގެ ބައެއްގެ ގޮތުގައި ހަމަޖެއްސީ 1990ގެ ފަހުކޮޅެވެ. އޭގެ ކުރިން އެތަން ބޭނުންކުރަމުން ދިޔައީ ވެސް ޒުވާނުންގެ މަރުކަޒެއްގެ ގޮތުގަ އެވެ. އެގޮތުން 1980ގެ ކުރީކޮޅު އެތަނުގައި ވޮލީ ކޯޓަކާއި ޓީޓީ ހޯލެއް އޮވެ އެވެ.
ކޮމެންޓް