އެމްޓީސީސީއަށް ހިދުމަތްކޮށްގެން ސަރުކާރުން ދިން އިނާމު ހޯދި މުވައްޒަފުންނާ އެ ކުންފުނީގެ މެނޭޖިން ޑިރެކްޓަރު އަހުމަދު ސައުދީ ބައްދަލު ކުރައްވަނީ
އިނާމާ އެކު މި މުވައްޒަފުންގެ ޝުކުރު އެމްޓީސީސީއަށް
ދިވެހި ދައުލަތަށް ގިނަ ދުވަހު ހިދުމަތް ކުރުމުން، ސަރުކާރުން ދޭ ގައުމީ އިނާމު ލިބުނު އެމްޓީސީސީގެ މުވައްޒަފުން، އެ ކުންފުންޏަށް ޝުކުރު އަދާކޮށްފި އެވެ.
ވީ ކިހިނެއް؟- ދައުލަތަށް 35 އަހަރަށް ވުރެ ދިގު މުއްދަތަކަށް ހިދުމަތް ކުރައްވާފައިވާ މުވައްޒަފުންގެ ތެރެއިން ގާބިލިއްޔަތަށާއި އިހުލާސްތެރިކަމަށް ބަލައި މިދިޔަ ޖުމްހޫރީ ދުވަހު ދިން އިނާމު، އެމްޓީސީސީގެ ފަސް މުވައްޒަފަކަށް ލިބުނެވެ.
އޭގެ ތެރޭގައި ހިމެނެނީ:
-
ހަސަން ހަލީލް، ހިދުމަތުގައި 41 އަހަރު
-
އަބްދުއްލަތީފް، ހިދުމަތުގައި 42 އަހަރު
-
މުހައްމަދު ޝަމީމް، ހިދުމަތުގައި 40 އަހަރު
-
އަހުމަދު ސާޖިދު، ހިދުމަތުގައި 39 އަހަރު
-
މޫސާ ފަތުހީ، ހިދުމަތުގައި 38 އަހަރު
މިހާރު ވެސް އެމްޓީސީސީގައި މަސައްކަތް ކުރަމުން އަންނަ ހަސަން ހަލީލް ބުނިގޮތުގައި، އެހާ ގިނަ ދުވަހު އޭނާ ވަޒީފާގައި ދެމިހުރުމުގެ ސިއްރަކީ ގަޑިއަށް ފަރުވާތެރިވުމެވެ. އެހެންވެ އެހެން މުވައްޒަފުންނަށް ވެސް އޭނާ ދިނީ އެ ނަސޭހަތެވެ.
"ހުރިހާ މުވައްޒަފުންނަށް ވެސް އަޅުގަނޑު ދަންނަވާލަން އޮތް ވާހަކަ އަކީ، ހިތްވަރާ އެކު ކެރިގެން، ގަޑިއަށް [އޮފީހަށް] އަންނާށޭ، ގަޑިއަށް ފަރުވާތެރިވާށޭ،" ހަލީލް ބުންޏެވެ.
"މިއީ އަޅުގަނޑު ގިނަ ދުވަހު އުޅުމުގެ ތަޖުރިބާ."
އިނާމު ލިބުނު އެހެން މުވައްޒަފުން ވަނީ، އެ މީހުންގެ އަގުވަޒަންކޮށް ސަރުކާރުން އެ ފަދަ އިނާމެއް ދިނީތީ ޝުކުރު އަދާކޮށްފަ އެވެ. އަދި މަސައްކަތުގައި އެހާ ގިނަ ދުވަހު ތިބެވުނީ، ކުރި އިތުބާރާއި ދިން އެހީތެރިކަމުގެ ސަބަބުން ކަމަށް ބުންޏެވެ. އަދި އާއިލާއިން ދިން އެއްބާރުލުމަށް ވެސް ޝުކުރު އަދާކުރި އެވެ.
ކޮމެންޓް