ބ. އޭދަފުށި މަތިން. (ފޮޓޯ/މޯލްޑިވްސް ވާޗުއަލް ޓުއާ)
އޭދަފުށީގައި 1،000 ހައުސިން ޔުނިޓުގެ 12ޓަވަރު އަޅަނީ
ބ. އޭދަފުށީގައި 1،000 ހައުސިން ޔުނިޓު އަޅަން ޗައިނާގެ ސައިނޯ ހައިޑްރޯ ކޯޕަރެޝަން ލިމިޓެޑާ ހަވާލުކޮށްފި އެވެ.
ވީ ކިހިނެއް؟ - ރައީސް އޮފީހުގައި މިއަދު ބޭއްވި ރަސްމިއްޔާތެއްގައި އެކަމާ ގުޅޭ އެއްބަސްވުމުގައި ސޮއިކުރެއްވީ:
-
ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު
-
ސައިނޯ ހައިޑްރޯ ކޯޕަރޭޝަންގެ ކަންޓްރީ މެނޭޖަރު ޕެން ގުއަންޝޫ
އެ ރަސްމިއްޔާތުގައި ރައީސް މުހައްމަދު މުއިއްޒާއި ސަރުކާރުގެ ބައެއް އެހެނިހެން ވަޒީރުން ވެސް ބައިވެރިވެވަޑައިގެންނެވި އެވެ.
ތަފްސީލު - އެ މަޝްރޫއުގެ ތަފްސީލު ދެއްވަމުން މުއްތަލިބު ވިދާޅުވީ މިއީ މިދިޔަ މެއި މަހު ސައިނޯ ހައިޑްރޯ ކޯޕަރޭޝަނާ އެކު ވެފައިވާ ފަހުމުނާމާއެއްގެ ދަށުން ހިންގާ މަޝްރޫއެއް ކަމަށެވެ.
މުއްްތަލިބު ވިދާޅުވި ގޮތުގައި އެ މަޝްރޫއުގެ ދަށުން 15 ފަންގިފިލާގެ 12 ޓަވަރު އެޅުމަށް ވަނީ ނިންމާފަ އެވެ. އެ ޓަވަރުތަކުގައި ހުންނާނީ ޖުމްލަ:
-
ތިން ކޮޓަރީގެ 336
-
ދެ ކޮޓަރީގެ 672 ފްލެޓު
ބުނީ ކީކޭ؟ - މިގޮތަށް ޓަވަރުތަކެއް އަޅަން ނިންމި ސަބަބަކީ، އޭނާ ވިދާޅުވި ގޮތުގައި އޭދަފުއްޓަކީ ސަރުކާރުން ކަނޑައަޅާފައިވާ އާބަން ސެންޓަރަކަށް ވުމާއި އެ ރަށަށް ބިން އިތުރުކުރެވެން ނެތުމުންނެވެ.
"އޭދަފުއްޓަކީ އާބަން ސެންޓަރެއްގެ ގޮތުގައި ކަނޑައަޅާފައިވާ ރަށަކަށް ވާތީ މި ރަށަކީ އާބާދީ އާއި ތަރައްގީ އެއްފަސްކުރުމުގެ ނާރެހަކަށް ވެގެންދާނެ، ބ. އަތޮޅުގައި،" މުއްތަލިބު ވިދާޅުވި އެވެ.
"އެއާ އެކު ވަށައިގެން ގިނަ އަދަދެއްގެ ރިސޯޓުތައް ހުރުމާ އެކު ރައީސްގެ ވަރަށް މުހިންމު ވައުދުފުޅެއްގެ ތެރޭގައި ހިމެނޭ ޓޫރިޒަމް ދާއިރާގައި މަސައްކަތްކުރާ ފަރާތްތަކަށް އެ މަސައްކަތްކުރާ ސަރަހައްދުން އާއިލާއަށް ދިރިއުޅެވޭނެ ގޮތަށް ބޯހިޔާވަހިކަމުގެ ފުރުސަތު ހޯދައިދެއްވުމުގެ ވައުދުގެ ތެރެއިން، އޭދަފުއްޓަކީ މިކަން ކުރުމަށް އެންމެ ރަނގަޅު އެއް ރަށް ކަމަށް އަޅުގަނޑުމެންނަށް ފާހަގަކުރެވެނީ."
އެ މަޝްރޫއު ނިންމާނެ ވަކި ދުވަހެއް މުއްތަލިބު ވިދާޅެއްނުވެ އެވެ.
"ކޮންޓްރެކްޓަރު މި އެއްބަސްވުމުގައި ސޮއިކުރުމާ އެކު ފައިނޭންސް ހަމަޖެއްސުމަށް މަސައްކަތްތަކެއް ކުރާނެ. އަދި އެއާ އެކު ކުރަންޖެހޭ ސާވޭ މަސައްކަތްތަކާއި އެހެނިހެން މަސައްކަތްތައް ވެސް ކުރެވިގެންދާނެ،"
"އަޅުގަނޑުމެންގެ މިހާރު އެންމެ ބޮޑު އުންމީދަކީ 2025 ވަނަ އަހަރުގެ ތެރޭގައި މި މަޝްރޫއަށް ފައިސާ ހަމަޖެހި، މަޝްރޫއުގެ އަމަލީ މަސައްކަތް ފެށިގެންދާނެ ކަމަށް. އެހެންކަމުން މި މަޝްރޫއު ނިމިގެންދާއިރު މި ދައުރު ތެރޭގައި މި ދެންނެވި ގޮތަށް މި މަޝްރޫއުގެ ތެރެއިން އެޅޭ ބޯހިޔާވަހިކަމުގެ ފްލެޓްތަކުގައި މީހުންނަށް ދިރިއުޅެެވޭނެ ކަމާ މެދު އަޅުގަނޑަށް ޔަގީންކަން އެބައޮތް."
މުއްތަލިބު ވިދާޅުވީ މި މަޝްރޫއުގެ ސަބަބުން އޭދަފުށީގެ އާބާދީ އާއި ވަޒީފާގެ ފުރުސަތުތައް އިތުރުވާނެ ކަމަށެވެ.
ކޮމެންޓް