ރާއްޖޭގެ ފޮރިން މިނިސްޓަރު ޑރ. އަބްދުﷲ ހަލީލް (ވ) އާއި އަޒަރްބައިޖާންގެ ފޮރިން މިނިސްޓަރު ޖޭހޫން ބައިރަމޯލް މިއަދު އެއްބަސްވުމެއް ބަދަލުކުރައްވަނީ (ފޮޓޯ/ފޮރިން މިނިސްޓްރީ)
ދިވެހި ޑިޕްލޮމެޓިކް އަދި އޮފިޝަލް ޕާސްޕޯޓުގައި ވިސާއާ ނުލާ އަޒަރްބައިޖާނަށް ދެވޭ ގޮތަށް ހަމަޖައްސައިފި
ރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރާ މީހުންނަށް ވިސާއާ ނުލައި އަޒަރްބައިޖާނަށް އެތެރެވުމާއި ޓްރާންސިޓްވުން އަދި 90 ދުވަހުގެ މުއްދަތަކަށް އެ ގައުމުގައި ހުރުމުގެ ހުއްދަ ލިބޭ އެއްބަސްވުމެއްގައި މިއަދު ސޮއިކޮށްފި އެވެ.
ވީ ކިހިނެއް؟ - އަޒަރްބައިޖާންގެ ވެރިރަށް ބާކޫގައި ކުރިއަށްދާ ކޮޕް29 ސަމިޓުގެ ހަވާސާގައި ބޭއްވި ބައްދަލުވުމެއްގައި ރާއްޖެ އާއި އަޒަރްބައިޖާނުން ވަނީ ދެ އެއްބަސްވުމެއްގައި ސޮއިކޮށްފަ އެވެ.
ފޮރިން މިނިސްޓްރީން ނެރުނު ނޫސް ބަޔާނެއްގައި ބުނިގޮތުގައި ރާއްޖޭގެ ފޮރިން މިނިސްޓަރު ޑރ. އަބްދުﷲ ހަލީލް އާއި އަޒަރްބައިޖާންގެ ފޮރިން މިނިސްޓަރު ޖޭހޫން ބައިރަމޯލް ސޮއިކުރެއްވި ދެ އެއްބަސްވުމަކީ:
-
1-
ރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރާ ފަރާތްތަކަށް ވިސާއާ ނުލައި އަޒަރްބައިޖާނަށް އެތެރެވުމާއި ޓްރާންސިޓްވުން އަދި 90 ދުވަހުގެ މުއްދަތަކަށް އެ ގައުމުގައި ހުރުމުގެ ހުއްދަ ލިބޭ އެއްބަސްވުމެއް
-
2-
ދެ ގައުމަށް ފައިދާވާނެ ގޮތަށް ޓޫރިޒަމް ފުޅާކުރަން ސޮއި ކުރި އެއްބަސްވުމެއް
ތަފްސީލް - ފޮރިން މިނިސްޓްރީން ބުނީ ފުރަަތަމަ އެއްބަސްވުމަކީ ހުރިހާ ދިވެހި ރައްޔިތުންނަށް ވިސާއަކާ ނުލައި ދަތުރުކުރެވޭނެ ގޮތް މަގުފަހިކޮށްދިނުމަށް ކުރަމުން އަންނަ މަސައްކަތުގައި އެޅުނު މުހިއްމު ފިޔަވަޅެއް ކަމަށެވެ. އެކަމާ ގުޅޭ މަޝްވަރާތައް ކުރިއަށް ގެންދިއުމަށް ދެ ގައުމުން އެއްބަސްވެފައިވާ ކަމަށް ވެސް އެ މިނިސްޓްރީން ބުންޏެވެ.
ފޮރިން މިނިސްޓްރީން ބުނިގޮތުގައި ދެވަނަ އެއްބަސްވުމުގެ ދަށުން އިގްތިސޯދީ، ސަގާފީ އަދި އިޖްތިމާއީ ގޮތުން ދެ ގައުމަށް ވެސް ފައިދާވާނޭ ގޮތަށް ފަތުރުވެރިކަން ކުރިއެރުވުމަށް މަސައްކަތް ކުރާނެ އެވެ.
އެ ބައްދަލުވުމުގައި ހަލީލް ދެއްކެވި ވާހަކައިގައި:
-
ރާއްޖެ އާއި އަޒަރްބައިޖާންއާ ދެމެދު އޮންނަ ގާތް ގުޅުމުގެ މުހިންމުކަން ފާހަގަކުރައްވައި ސޮއިކުރި އެއްބަސްވުންތަކުގެ ސަބަބުން މި ގުޅުން އިތުރަށް ބަދަހިވެގެންދާނެ ކަމަށް ވިދާޅުވި
-
ދެ ގައުމުގެ ރައްޔިތުންގެ ދެމެދުގައި އޮންނަ ގުޅުން އިތުރަށް ވަރުގަދަވެ ސަގާފީ އަދި ވިޔަފާރީގެ ގުޅުން ބަދަހިވެގެންދާނެ ކަމަށް އުއްމީދުކުރައްވާ ކަަމަށް ވިދާޅުވި
-
ބައިނަލްއަގްވާމީ މަސްރަހުގައި، ދެ ގައުމަށް ފައިދާކުރަނިވި މައްސަލަތަކުގައި، ރާއްޖެއިން އަޒަރްބައިޖާންއާ އެކު ގާތުން މަސައްކަތް ކުރާނެ ކަމަށް ވިދާޅުވި
އެނގުން މުހިންމު - ރާއްޖޭގެ ޑިޕްލޮމެޓިކް ޕާސްޕޯޓް ލިބެނީ ދައުލަތުގެ އިސްވެރިންނާއި އެ ބޭފުޅުންގެ އާއިލާތަކަށް އެކަންޏެވެ. އަދި އޮފިޝަލް ޕާސްޕޯޓް ދޫކުރަނީ ރަސްމީ ހައިސިއްޔަތެއް އޮންނަ އަދި އިމިގްރޭޝަނުން ކަނޑައަޅާ ވަކި ފަރާތްތަކަކަށެވެ.
ކޮމެންޓް