މާފުށީގެ ގެސްޓުހައުސްއެއް. (ދައުރު ފައިލް ފޮޓޯ)
ގެސްޓްހައުސްތަކުގެ އިންސްޕެކްޝަނެއް 2 ހަފްތާ ތެރޭ ފަށަނީ
ރާއްޖޭގައި އެންމެ ފުޅާކޮށް ލޯކަލް ޓޫރިޒަމް ހިންގާ ހިސާބުތަކުގައި ގަވާއިދާ ހިލާފަށް، ރަޖިސްޓްރީ ނުކޮށް ހިންގާ ގެސްޓްހައުސްތައް ހޯދުމަށް ކުރިއަށް އޮތް ދެ ހަފްތާގެ ތެރޭގައި ހާއްސަ އިންސްޕެކްޝަނެއް ކުރިއަށް ގެންދަން ނިންމާފައިވާ ކަމަށް ޓޫރިޒަމް މިނިސްޓްރީން މިއަދު ބުނެފި އެވެ.
ވީ ކިހިނެއް؟ - ރާއްޖެ އަންނަ ފަތުރުވެރިންގެ ސަލާމަތާއި ރައްކާތެރިކަން ކަށަވަރު ކުރުމަށް އެކުލަވާލަން ޖެހޭ ގަވާއިދުތަކާ ގުޅިގެން ހުށަހަޅާފައިވާ މައްސަލައާ ގުޅޭ ގޮތުން ސުވާލު ކުރުމަށް ޓޫރިޒަމް މިނިސްޓްރީގެ އިސްވެރިން މިއަދު ވަނީ މަޖިލީހުގެ ގަވާއިދު ކޮމެޓީއަށް ހާޒިރުކޮށްފަ އެވެ.
ތަފްސީލް - އެ ކޮމެޓީގައި މެންބަރަކު ކުރެއްވި ސުވާލަކަށް ޖަވާބުދެއްވަމުން ޓޫރިޒަމްގެ ސްޓޭޓް މިނިސްޓަރު އަހްމަދު ނާޒިމް މުހައްމަދު ވިދާޅުވީ ރަޖިސްޓްރީ ނުކޮށް ހިންގާ ގެސްޓްހައުސްތައް ހޯދައި ގަވާއިދަށް ފައްތަން މަސައްކަތް ކުރާނެ ކަމަށެވެ. އޭނާ ވިދާޅުވީ:
-
އިންސްޕެކްޝަން ހިންގާނީ ފުލުހުންނާ ގުޅިގެން
-
އިންސްޕެކްޝަން ހިންގަން ނިންމާފައިވަނީ ކ.، އއ.، އދ. އަދި ވ. އަތޮޅުގައި
-
ސަލާމަތީ މިންގަނޑުތައް ފުރިހަމަތޯ ބަލާނެ
ނާޒިމް ވިދާޅުވީ އެފަދަ އިންސްޕެކްޝަނެއް ހިންގަން ނިންމީ ހުއްދަ ނުނަގާ ހިންގާ ގެސްޓްހައުސްތަކުގައި ހިތާމަވެރި ހާދިސާތައް ހިނގާ މިންވަރު ވަރަށް ބޮޑަށް އިތުރުވެފައިވާތީ އެވެ.
މިދިޔަ މަހު އއ. ރަސްދޫގައި ފަތުރުވެރިޔަކު ސްނޯކްލިންއަށް ގޮސް އުޅެނިކޮށް ވަނީ މަރުވެފަ އެވެ. ނާޒިމް ވިދާޅުވި ގޮތުގައި، އެ ހާދިސާ ހިނގިއިރު އޭނާ ހުރި ގެސްޓްހައުސްގެ ލައިސެންސް އޮތީ މުއްދަތު ހަމަވެފަ އެވެ. އަދި އެ ހާދިސާ ހިނގި ފަހުން ލައިސަންސް އާކުރަން އެ ތަނުން ހުށަހެޅީ ކަމަށް ވެސް އޭނާ ވިދާޅުވި އެވެ.
އޭގެ އިތުރުން މާފުށީގައި ވެސް ވަނީ އެފަދަ ހާދިސާއެއް ހިނގާފަ އެވެ.
"އަޅުގަނޑުމެންނަށް މިނިސްޓްރީގެ ޑޭޓާބޭސްތަކުގައި ހުންނާނީ ހަމައެކަނި ލައިސެންސަށް އެދި ހުށަހަޅައި ލައިސަންސް ދީފައި ހުންނަ ތަންތަން. އެހެންވީމަ މިސާލަކަށް ލައިސަންސް ނުދީ ބަޔަކު ތަނެއް ހިންގިޔަސް ބަޔަކު ޝަކުވާއެއް ނުކުރާ ކަމަށް ވަންޏާ އަދި ކައުންސިލަކުން ވެސް އެ މައުލޫމާތު ހިއްސާ ނުކުރާ ކަމަށް ވަންޏާ މިނިސްޓްރީއަށް އާންމު ގޮތެއްގައި މި އޮންނަނީ ނޭނގިފައި. ދެން ގިނަ ފަހަރަށް އޭގެ މައުލޫމާތެއް އަޅުގަނޑުމެންނަށް މި އެނގެނީ ހާދިސާއެއް ހިނގައިގެން އެ ތަނެއްގެ ސްޓޭޓަސް ބަލާއިރު މި އޮންނަނީ ހުއްދަ ނުނަގާ،" ނާޒިމް ވިދާޅުވި އެވެ.
އެފަދަ ހާދިސާތައް ހިނގުމުން ގާނޫނުގެ ތެރެއިން އެޅެން ހުންނަ ފިޔަވަޅުތައް އަޅަމުން އަންނަ ކަމަށް ނާޒިމް ވިދާޅުވި އެވެ.
ތިން މަސް ތެރޭ ގަވާއިދު އަލުން ނެރެނީ
ކުރިއަށް ތިން މަސްދުވަހުގެ ތެރޭގައި ފަތުރުވެރިކަމުގެ ވިޔަފާރި ހިންގާ ތަންތަނުގައި ހުންނަން ޖެހޭ ސަލާމަތީ މިންގަނޑުތަކާ ބެހޭ ގަވާއިދު އަލުން ނެރޭނެ ކަމަށް ވެސް މިއަދުގެ ކޮމެޓީގައި ނާޒިމް ވިދާޅުވި އެވެ. އެ ގަވާއިދު ނެރެފައި އޮތަސް އެއަށް އަމަލު ނުކުރެވޭ ކަމަށް އެނާ ވިދާޅުވި އެވެ.
-
އެ ގަވާއިދު އެންމެ ފުރަތަމަ ނެރެފައި އޮތީ 17 އޭޕްރިލް 2020ގައި
-
ގެސްޓްހައުސްތައް އެ ގަވާއިދަށް ފައްތަން ހަ މަސްދުވަސް އޭރު ދިން
-
31 އޮގަސްޓު 2021ގައި އެ މުއްދަތު ވަކި މުއްދަތެއް ނެތް ގޮތަށް އިތުރުކޮށްދިން
-
އޭރުއްސުރެ އެ ގަވާއިދަށް އަމަލެއް ނުކުރޭ
-
ފަތުރުވެރިންގެ ސަލާމަތާއި ރައްކާތެރިކަން ކަށަވަރު ކުރުމަށް އެކުލަވާލަން ޖެހޭ ގަވާއިދުތަކުގެ ފައިނަލް ޑްރާފްޓް ނިމިފައިވާ ކަމަށް، އެ ޕްރޮޖެކްޓްގެ ދަށުން އެކި އެކި ގައިޑްލައިންތައް ހަދާނެ؛ އޭގައި މީގެ ކުރިން ޓޫރިޒަމް ސެކްޓާގައި ނަހަދާ ހުރި ގައިޑްލައިންތައް ވެސް ހިމެނޭނެ
-
މިހާރު އޮތް ގަވާއިދުތަކުގައި ހުރި ކަންކަން މުރާޖައާކޮށް ބަދަލު ގެންނަން ޖެހޭ ގަވާއިދުތަކަށް ބަދަލު ގެނައުމުގެ މަސައްކަތް ދަނީ ކުރަމުން
އޭގެ އިތުުރުން، ހެލްތު މިނިސްޓްރީއާ ގުޅިގެން ހިންގާ ޕްރޮޖެކްޓެއްގައި ގެސްޓްހައުސް ހިންގާ ރަށްތަކުގައި ދިރިއުޅޭ ފަރާތްތަކަށް ސީޕީއާރް ދިނުން ފަދަ ކަންކަމަށް ޓްރެއިން ކުރުމުގެ މަސައްކަތް ކުރަމުން އަންނަ ކަމަށްވެސް ވިދާޅުވި އެވެ. އޭގެ އިތުުރުން ކުރަމުން އަންނަ ކަންކަމުގެ ގޮތުގައި:
-
ރިސޯޓްތަކުގައި ހިންގާ ކްލިނިކްތައް ހެލްތު ކެއާ ސިސްޓަމާ ގުޅާލުމުގެ މަސައްކަތް ކުރަނީ
-
ކުރިން އެ ކްލިނިކްތައް ހުންނަނީ ސިސްޓަމުން ބޭރުގައި
-
އޭރުން އެ ތަނުގައި ތިބޭ ޑޮކްޓަރުންނަށް އެމަޖެންސީ އަދި އެހެނިހެން ވަގުތުތަކުގައި ބޭނުންވާ ލަފާ ހޯދަން ފަސޭހަވާނެ
ކޮމެންޓް