މީޑިއާ ކައުންސިލްގެ މެންބަރުން މިނިވަން މުއައްސަސާތަކުގެ ކޮމިޓީއަށް މިއަދު ހާޒިރުކޮށްފައި (ފޮޓޯ/ މަޖިލިސް)
އެވޯޑު މައްސަލަ ބަލަން އެމްއެމްސީ މެންބަރުން ހާޒިރުކޮށް މަޖިލިސް ކޮމިޓީ ސިއްރުކޮށްފި
މޯލްޑިވްސް މީޑިއާ ކައުންސިލް (އެމްއެމްސީ) އިން ދިން އެވޯޑުގެ މައްސަލަ ބަލަން އެ ކައުންސިލްގެ މެންބަރުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް މިއަދު ހާޒިރުކުރުމަށް ފަހު އެ ކޮމިޓީ ސިއްރުކޮށްފި އެވެ.
ވީކިހިނެއް؟ - މިނިވަން މުއައްސަސާތަކުގެ ކޮމިޓީން އެމްއެމްސީގެ މެންބަރުންނާ ބައްދަލުކުރުމަށް މިއަދު ތާވަލުކުރީ، ޕީއެސްއެމުން އެ ކައުންސިލްގެ މައްސަލައެއް ބަލައިދިނުމަށް އެދި ހުށަހެޅުމުންނެވެ. އޭގައި ބުނެފައިވަނީ:
-
ޕީއެސްއެމްއިން ލައިވް ކަވަރޭޖް ހަދާ ހަފްލާތަކުގައި ދައްކާ ވީޑިއޯ ފުޓޭޖްތަކަކީ ޕީއެސްއެމްގެ އެޑިޓޯރިއަލްއަށް ފެތޭ ކޮންޓެންޓަށް ވާން ޖެހޭ؛ ނަމަވެސް އެ ކޮންޓެންޓާ ހިލާފު ވީޑިއޯއެއް އެވޯޑު ދިނުމުގެ ހަފްލާގައި ދެއްކީ ކުރިން އެންގުމަކާ ނުލައި
-
އެމްއެމްސީއިން އެގޮތަށް އަމަލުކުރީ ގަސްތުގައި، ދުރާލާ ރާވައިގެން ކަމަށް ޕީއެސްއެމްއިން ދެކޭ؛ އަދި އެކަން ހަރުކަށި އިބާރާތުން އެ ކުންފުނިން ވަނީ ކުށްވެރިކޮށްފައި
އެނގުން މުހިންމު - ޕީއެސްއެމުން ބުނާ ވީޑިއޯއަކީ ރައީސް މުހައްމަދު މުއިއްޒުގެ ދޮންމަންމަ އަދި ސްރީ ލަންކާގެ ރައްޔިތެއް ކަމަށްވާ ޖީ ސްކީލާން ކުރާ ތުހުމަތުތަކުގެ މައްޗަށް 'އަދަދު' ނޫހުން ތައްޔާރުކުރި ވީޑިއޯ ޑޮކިއުމަންޓަރީގެ ތަންކޮޅެކެވެ. އެ ޑޮކިއުމަންޓަރީއަށް ތަހުގީގީ ދާއިރާއިން ވީޑިއޯ ކެޓަގަރީން އެވޯޑު ވަނީ ލިބިފަ އެވެ.
ތަފްސީލް - މިއަދުގެ ކޮމިޓީ ބައްދަލުވުން ސިއްރުކުރަން ހުށަހެޅުއްވީ ކޮލަމާފުށި ދާއިރާގެ މެންބަރު އިބްރާހީމް ދީދީ އެވެ. ސިއްރުކުރަން ހުށަހެޅުއްވި ސަބަބަކަށް ވިދާޅުވީ "މަސްލަހަތު ފުށުއަރާ ބައެއް ކަންކަން ހިމެނޭތީ" ކަމަށެވެ.
އެ ހުށަހެޅުއްވުމަށް ތާއީދުކުރެއްވީ ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިނެވެ. ކޮމިޓީ މެންބަރުންގެ އަގުލަބިއްޔަތުން ސިއްރުކުރަން ފާސްވި ކަމަށް ރިޔާސަތުން އިއުލާންކުރި ނަމަވެސް އޭގެ ތަފުސީލެއް ވިދާޅެއް ނުވެ އެވެ.
އިދިކޮޅުގެ ބަސް - އެ ކޮމިޓީގައި އިންނަވާ ހަމައެކަނި އިދިކޮޅު އެމްޑީޕީގެ މެންބަރު، ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ކުރެއްވި 'އެކްސް' ޕޯސްޓެއްގައި ވިދާޅުވީ އެވޯޑެއްގެ މައްސަލާގައި މި ގޮތަށް މަޖިލީހުން އަމަލަކުރުމަކީ ނޫސްވެރިކަމަށް އޮތް ބިރެއް ކަމަށެވެ.
"މުއައްސަސާތަކުގެ ބައެއް މެންބަރުން ވަކިކުރުމަށް ތައްޔާރުވަމުން އަންނަ ދަނޑިވަޅެއްގައި، ޖީ ސްކީލާން ޑޮކިއުމެންޓްރީއަށް މީޑިއާ ކައުންސިލުން ދިން އެވޯޑުގެ މައްސަލައިގައި އެ މީހުން ހާޒިރުކޮށް، މިނިވަން މުއައްސަސާތަކުގެ ކޮމިޓީ ސިއްރުކޮށްގެން ކުރިއަށްގެން ދާކަމީ ނޫސްވެރިކަމަށް އޮތް ބިރެއް،" މީކާއީލް ލިޔުއްވާފައިވެ އެވެ.
ގުޅުންހުރި ކަމެއް - އެ ވީޑިއޯގެ މައްސަލައިގައި އެމްއެމްސީގެ ރައީސް އަހްމަދު މުސްތަފާ ޕީއެސްއެމްގައި އަދާކުރައްވަމުން ގެންދެވި ޓެކްނިކަލް އޮޕަރޭޝަންސް މެނޭޖަރުގެ ވަޒީފާއިން ވަކިކޮށް، ފަހުން ވަޒީފާ އިއާދަކޮށްފައިވެ އެވެ.
ކޮމެންޓް