ދަރުމަވަންތަ ސްކޫލް (ދައުރު ފޮޓޯ/ ހުސއިން ސުނެއިނު)
ދަރުމަވަންތަ ސްކޫލް ހޯލުގެ މަސައްކަތް އަންނަ އަހަރު ފަށާނަން: މިނިސްޓަރު
ކުރީގެ މާލޭ ޖަލު ހުރި ބިމުގައި އަޅަން ނިންމާފައިވާ ދަރުމަވަންތަ ސްކޫލްގެ ހޯލުގެ މަސައްކަތް އަދި ފަށާފައި ނުވާ ކަމަށާއި އަންނަ އަހަރުގެ ތެރޭގައި އެ މަސައްކަތް ފަށާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
ވީ ކިހިނެއް؟ - މިނިސްޓަރު އެހެން ވިދާޅުވީ އެ ސްކޫލް ހޯލުގެ މަސައްކަތް ގޮސް އޮތް ހިސާބު ބެލުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް މިއަދުގެ ޖަލްސާއަށް މިނިސްޓަރު ހާޒިރުކުރައްވައި ކުރެއްވި ސުވާލަށް ޖަވާބުދެއްވަމުންނެވެ.
މެންބަރު ކުރެއްވި ސުވާލު - ދަރުމަވަންތަ ސްކޫލް ބިނާކުރުމަށް ރާވާފައިވަނީ މާލޭ ޖަލު ހުންނަ ސަރަހައްދުގައި ހޯލެއް ވެސް ހިމެނޭ ގޮތަށެވެ. ރައީސް މުހައްމަދު މުއިއްޒު މަގާމާ ހަވާލުވެވަޑައިގަތުމަށް ފަހު، ޑިސެންބަރު 2023ގައި ވަނީ ދަރުމަވަންތަ ސްކޫލްގެ ހޯލު ހެދުމަށް އެ ސްކޫލާ ހަވާލުކުރާނެ ވާހަކަ ވިދާޅުވެފަ އެވެ.
އެހެންކަމުން، މިހާރު އެ މަސައްކަތް ގޮސްފައިވާ ހިސާބެއް އަދި އެ މަސައްކަތް ނިންމާނެ ތާރީހެއް ސާފުކޮށްދެއްވުމަށް މެމްބަރު އެދިވަޑައިގަތެވެ.
މިނިސްޓަރުގެ ޖަވާބު - ޝަފީއު ވިދާޅުވީ މި ސަރުކާރު އައިސް މިނިސްޓްރީއާ ހަވާލުވިއިރު އެ ހޯލުގެ އެއްވެސް މަސައްކަތެއް ކޮށްފައި ނުވާ ކަމަށެވެ. އަދި މި އަހަރަށް ކަނޑައަޅާފައިވާ ބަޖެޓުގައި ވެސް އެ ހޯލުގެ މަސައްކަތަށް ބަޖެޓު ކަނޑައަޅާފައި ނުވާ ކަމަށް އޭނާ ވިދާޅުވި އެވެ.
ނަމަވެސް އަންނަ އަހަރުގެ ތެރޭގައި އެ ހޯލުގެ މަސައްކަތް ފަށާނެ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ:
-
ދަރުމަވަންތަ ސްކޫލްގެ މަސައްކަތް ފަށާފައިވަނީ ޑިސެމްބަރު 2020ގައި؛ އޭރުން ފެށިގެން މި ސަރުކާރު އައުމާ ހަމައަށް ވެސް ހޯލުގެ އެއްވެސް މަސައްކަތެއް ކޮށްފައެއް ނުވޭ
-
މިނިސްޓްރީގެ ރިކޯޑުތަކުން ދައްކާ ގޮތުގައި 5 އޭޕްރީލް 2023ގައި އެޑިއުކޭޝަން މިނިސްޓްރީން ވަނީ ހޯމް މިނިސްޓްރީއަށް ސިޓީއެއް ފޮނުވާފައި
-
އެ ސިޓީގައި، މާލޭ ޖަލު ހުރި ތަނުގައި އިމާރާތަކާ އެކު ހޯލެއް އަޅަން ބޭނުންވާ ކަމަށާއި އެގޮތަށް ރައީސް އޮފީހުން ނިންމާފައިވާ ކަަމަށާއި ރަޖިސްޓްރީ ބަދަލުކުރަން ބޭނުންވާ ކަމަށް ބުނެފައިވޭ
-
ނަމަވެސް އެއިން އެއްވެސް ކަމެއް ކޮށްފައެއް ނުވޭ
-
1 ނޮވެމްބަރު 2023ގައި އިތުރު ސިޓީއެއް ހޯމް މިނިސްޓްރީއަށް ފޮނުވާފައިވޭ
-
އޭގެ ޖަވާބު 15 ނޮވެމްބަރުގައި ހޯމް މިނިސްޓްރީން ދީފައިވޭ؛ އޭގައި ބުނެފައިވަނީ ޖަލު ހުސްކުރެވޭނީ ގައިދީން ބޭތިއްބުމަށް އިތުރު އިންތިޒާމް ހަމަޖައްސައިގެން ކަމަށާއި އެކަމާ ގުޅޭ ގޮތުން ރައީސް އޮފީހާއި ފިނޭންސް މިނިސްޓްރީއާ މަޝްވަރާކުރި ނަމަވެސް ހައްލެއް ލިބިފައި ނުވާތީ ޖަލު ހުސްކުރަން ދަތިވާ ކަމަށް
-
ޖަލު ހުސްކޮށްފައިވަނީ މި ސަރުކާރުން މި އަހަރުގެ ކުރީކޮޅު
މިނިސްޓަރު ވިދާޅުވީ ދަރުމަވަންތަ ސްކޫލަށް ބިން ލިބިފައިވަނީ މާލޭގެ ތަނަކުން ވަރަށް ބޮޑުކޮށް ކަމަށާއި ރަނގަޅަށް ޕްލޭން ކުރި ނަމަ އެ ބިމުގައި ހޯލަކާއި ކުޅޭނެ ބިމަކާއި މިހާރު ހުރި ވަރުގެ 40 ކްލާހުގެ އިމާރާތެއް އެ ބިމުގައި އެޅުނީސް ކަމަށެވެ.
"ނަމަވެސް ސުވާލުގައި ބުނެފައިވާ ފަދައިން ދަރުމަވަންތަ ސްކޫލަށް ހޯލެއް ބޭނުންވާތީ ޖަލު ހުސްކުރުމަކީ އޮޕްޝަނެއް ކަމަށް އަޅުގަނޑު ގަބޫލުކުރަނީ. އަޅުގަނޑުމެން މިދަނީ އެ މަސައްކަތައިގެން ކުރިއަށް. އިރާދަކުރެއްވިއްޔާ 2025 ވަނަ އަހަރުގެ ތެރޭގައި އަޅުގަނޑުމެންނަަށް މަސައްކަަތް ފެށޭވަރު ވާނެ،" މިނިސްޓަރު ވިދާޅުވި އެވެ.
ކޮމެންޓް