ހައި ކޯޓުން ޖަލު ހުކުމް ބާތިލްކުރި ދުވަހު ޔާމީން ކޯޓު ބޭރުގައި ހުންނަވައި ނޫސްވެރިންނާ ވާހަކަ ދައްކަވަނީ: ހައި ކޯޓު ހުކުމުގެ ބައެއް ދައުލަތުން އިސްތިއުނާފު ކުރުމުން ސުޕްރީމް ކޯޓުގައި މައްސަލަ ފަށަނީ - (ދައުރު ފޮޓޯ/އަޒްމީ)
ޔާމީނާ ދެކޮޅަށް ހުށަހެޅި އާ ހެކި ބަލައިގަތުމުގެ މައްސަލަ ސުޕްރީމް ކޯޓުން މި މަހު ފަހުކޮޅަށް ތާވަލުކޮށްފި
ވ. އާރަށް ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ހިޔާނާތުގެ ދައުވާތައް ސާބިތު ކުރަން ދައުލަތުން ހުށަހެޅި އާ ހެކިތައް ބަލައިގަނެވޭނެ ކަމަށް ކަނޑައަޅައިދޭން ދައުލަތުން ހުށަހެޅި މައްސަލަ ސުޕްރީމް ކޯޓުގައި ތާވަލުކޮށްފި އެވެ.
ވީ ކިހިނެއް؟ - އާރަށް މައްސަލާގައި ޔާމީންއަށް އިއްވި 11 އަހަރުގެ ހުކުމް ބާތިލުކޮށް އެ މައްސަލަ އަލުން ބަލަން ކްރިމިނަލް ކޯޓަށް ހައި ކޯޓުން އެންގީ މިދިޔަ 18 އެޕްރީލްގަ އެވެ.
ދަށު ކޯޓުން މި މައްސަލަ އަލުން ބަލާއިރު ރިއާޔަތްކުރަން ޖެހޭ ކަންތައްތަކެއް ހައި ކޯޓުގެ ހުކުމުގައި ކަނޑައަޅާފައިވެ އެެވެ. އޭގެތެރެއިން އެއް ކަމަކީ:
-
ދައުލަތުން ހުށަހެޅި އާ ހެކިތައް ބަލައިގެންފައި ވަނީ އިޖުރާއަތާ ހިލާފަށް ކަމުން އެ ހެކި އެއްފަރާތްކޮށް މައްސަލާގައި ގޮތެއް ނިންމުމަށް
ތަފްސީލް - މިދިޔަ 24 ޖުލައިގައި ޕީޖީ އޮފީހުން ހައި ކޯޓު ހުކުމުގެ އެ ބައި ސުޕްރީމް ކޯޓުގައި އިސްތިއުނާފު ކުރި އެވެ. އޮގަސްޓް މަހު އެ މައްސަަލަ ކޯޓަށް ބަލައިގަތް ފަހުން އޭގެ ފަހުން ތިން މަސް ދުވަސް ހިނގި އިރު މި މަހު 20 ވަނަ ދުވަހަށް ތާވަލުކޮށްފައިވެ އެވެ.
ސުޕްރީމް ކޯޓުގެ ތާވަލުން ދައްކާ ގޮތުގައި، އަޑުއެހުން ފަށަނީ އެ ދުވަހުގެ ހެނދުނު 9 ޖަހާއިރެވެ. މައްސަލަ ބައްލަވާ ފަނޑިޔާރުންގެ ނަންތައް ވެސް ލިޔެފައިވެ އެވެ. އެއީ:
-
1-
އާއިޝާ ޝުޖޫން މުހައްމަދު
-
2-
ޑރ. އަޒްމިރާލްދާ ޒާހިރު
-
3-
ޑރ. މުހައްމަދު އިބްރާހީމް
ޕީޖީން ސުޕްރީމް ކޯޓުގައި އެދިފައިވަނީ:
-
ޖިނާއީ އިޖުރާއަތުގެ ގާނޫނުގެ 135 ވަނަ މާއްދާގެ ދަށުން ހުށަހެޅި ހެކިތަކާ ގުޅިގެން، ދިފާއުން ހުށަހެޅުމެއް އޮތް ނަމަ ހުށަހެޅުމުގެ ފުރުސަތު ދިނުން
-
އެ ހެކިތަކާ ގުޅިގެން ދެ ފަރާތުން ޝަރީއަތުގައި ބަހުސްކުރުމުގެ ފުރުސަތު ދިނުން
-
އެ ހެކިތައް ބަލައިގަތުމާ މެދު އަލުން ގޮތެއް ކަނޑައެޅުމަށް ދަށު ކޯޓަށް އަންގައިދިނުން
އެނގުން މުހިންމު - ޔާމީންގެ މައްޗަށް ކްރިމިނަލް ކޯޓުން ސާބިތުވެފައިވާ ރިޝްވަތާއި މަނީ ލޯންޑަރިންގެ ހުކުމް ހައި ކޯޓުން ބާތިލުކުރީ، ހެކިތައް ޖުމްލަކޮށް ވަޒަންކުރުމުގައި ދަށު ކޯޓުން ގޯސްތަކެއް ހަދާފައިވާ ކަމަށް ގަބޫލުކުރެވޭތީ އެވެ.
ޔާމީންއާ ދެކޮޅަށް ދައުލަތުން ހުށަހަޅާ އާ ހެކިތައް އެއް ފަރާތްކުރުމުގެ އިތުރުން މި މައްސަލަ އަލުން ބަލާއިރު ރިއާޔަތްކުރަން ޖެހޭނެ ކަންތައްތަކުގެ ގޮތުގައި ކްރިމިނަލް ކޯޓުގެ މައްޗަށް ހައި ކޯޓުން އަމުރުކުރީ:
-
ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހަޅަން ފުރުސަތު ދީ، އެއާ ގުޅޭ ގޮތުން ގޮތެއް ކަނޑައަޅަން
-
މައްސަލަ އަލުން ބަލާއިރު މި މައްސަލާގައި ކުށް ސާބިތުވެފައިވާ އޭރުގެ ނައިބު ރައީސް އަހްމަދު އަދީބު ވިދާޅުވި ވިދާޅުވުމަކަށް އެމްއެމްޕީއާރުސީގެ ފައިސާއިން ޔާމީން ފައިސާ ނެންގެވި ކަމަށް ޝައްކުކުރެވޭ ކަމަށް ދަށު ކޯޓުގެ ފަނޑިޔާރު ނިންމަވާފައިވަނީ ގޯސްކޮށް ކަމުން އެ ދޭހަ އެއް ފަރާތް ކުރުމަށް
-
މައްސަލަ އަލުން ބަލާއިރު ހެކިތައް ވަކިވަކިން ވަޒަން ކުރުމަށް
ކޮމެންޓް