ނަސްރުގެ ދުވަހުގެ މައުރަޒު ހުޅުވައިދެއްވުމަށްފަހު ރައީސް މުހައްމަދު މުއިއްޒު އެތަން ބައްލަވާލައްވަނީ(ފޮޓޯ/ރައީސް އޮފީސް)
ނަސްރު ދުވަހުގެ ސިފައިންގެ މައުރަޒު ހުޅުވައިފި
ނަސްރުގެ ދުވަހުގެ 'ސިފައިންގެ މައުރަޒު 2024' ރައީސް މުހައްމަދު މުއިއްޒު މިއަދު ހުޅުވައިދެއްވައިފި އެވެ.
ވީ ކިހިނެއް؟ - އެމަނިކުފާނު މި މައުރަޒު ހުޅުވައިދެއްވީ އެކަމަށްޓަކައި ހާއްސަކޮށްގެން މިއަދު ހެނދުނު ނޭޝަނަލް އާޓް ގެލެރީގައި ކުރިއަށްދިޔަ ރަސްމިއްޔާތެއްގަ އެވެ. މި މައުރަޒު ހުޅުވައިދެއްވުމަށްފަހު އެމަނިކުފާނު ވަނީ އެތަން ބައްލަވާލައްވާފަ އެވެ.
މި ރަސްމިއްޔާތުގައި އެމަނިކުފާނުގެ އަނބިކަނބަލުން ސާޖިދާ މުހައްމަދާއި ނައިބު ރައީސް ހުސައިން މުހައްމަދު ލަތީފްގެ އިތުރުން ސިފައިންގެ އިސްވެރިންނާއި ވަޒީރުން އަދި ދައުލަތުގެ ބައެއް އިސްވެރިން ބައިވެރިވެވަޑައިގެންނެވި އެވެ.
ތަފްސީލް - މިއަދު ހުޅުވި ސިފައިންގެ މައުރަޒުން ފެނިގެންދާނީ 3 ނޮވެންބަރު 1988 ވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި އެދުވަހު ނަސްރު ހޯދުމަށް ސިފައިން ދެއްކި ހިތްވަރެވެ. މި މައުރަޒުގެ މައިގަނޑު އެއް ބޭނުމަކީ ނަސްރުގެ ދުވަހުގެ މައުލޫމާތު އަދުގެ ޖީލަށް ބުނެދިނުމެވެ.
މި މައުރަޒުން ގާތްގަނޑަކަށް 200 އަށް ވުރެ ގިނަ ޑިސްޕްލޭ ފެންނަން ހުރިއިރު، އެހެން އަހަރުތަކާ ހިލާފަށް މިއަހަރުގެ މައުރަޒުގައި ނަސްރުގެ ދުވަހު ބޭނުންކުރި ބައެއް އަސްލު ހަތިޔާރާއި ބައެއް ތަކެތި އާންމުންނަށް ދައްކާލުމަށް ބަހައްޓާފައިވެ އެވެ.
މި މައުރަޒު ކުރިއަށްދާނީ:
-
މިއަދުން ފެށިގެން އަންނަ އާދިއްތަ ދުވަހުގެ ނިޔަަލަށް ނެޝަނަލް އާޓް ގެލެރީގައި
-
މި މައުރަޒު އާންމުންނަށް ބަލައިލުމަށް ހުޅުވާފައި ހުންނާނީ ހެނދުނު 9 އިން 12 އަށް
-
މެންދުރުފަހު 2 އިން 6 އަށް އަދި ރޭގަނޑު 8 އިން 9 އަށް
ފާހަގަކޮށްލެވޭ ކަމެއް - މިއަހަރުގެ ނަސްރުގެ ދުވަސް ފެށިގެން ދިޔައީ ބޮޑު ޖަމާއަތުގައި ކުރެއްވި ފަތިސް ނަމާދުންނެވެ. އަދި އެއަށްފަހު ރައީސްގެ ދެކަނބަލުން ވަނީ 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު ޝަރަފުވެރިކޮށްދެއްވާފަ އެވެ.
ކޮމެންޓް