މަޝްރޫއުތައް ނުހިނގަނީ 39 ބިލިއަންގެ މަޝްރޫއުތަކަށް 3.6 ބިލިއަން ރުފިޔާ ބަޖެޓުކުރުމުން: މުއްތަލިބު

ގިނަ އަދަދެއްގެ މަޝްރޫއުތައް ނުހިންގި ހުއްޓިފައި ހުރީ ސޮއިކޮށްފައިވާ މަޝްރޫއުތަކަށް އެކަށީގެންވާ ވަރަށް މި އަހަރުގެ ބަޖެޓުގައި ފައިސާ ކަނޑައަޅާފައި ނެތުމުން ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.

ވީ ކިހިނެއް؟ - ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި މުއްތަލިބު ވަނީ ކުރީ ސަރުކާރުން ސޮއިކޮށްފައި ހުރި މަޝްރޫއުތަކާ ބެހޭ ބައެއް މައުލޫމާތު ހިއްސާކުރައްވާފަ އެވެ.

ބުނީ ކީކޭ؟ - މުއްތަލިބު ވިދާޅުވި ގޮތުގައި މި ދައުރު ފެށިއިރު ކޮންސްޓްރަކްޝަން މިނިސްޓްރީން 322 މަޝްރޫއެއްގައި ސޮއިކޮށްފައި އޮތެވެ.

އެ މަޝްރޫއުތަކުގެ އަގު 39 ބިލިއަން ރުފިޔާއަށް އެރި ނަމަވެސް، މުއްތަލިބު ވިދާޅުވީ އެ މަޝްރޫއުތައް ކުރިއަށްގެންދިއުމަށް މި އަހަރުގެ ބަޖެޓުގައި ހިމަނާފައި އޮތީ 3.6 ބިލިއަން ރުފިޔާ ކަމަށެވެ.

"މިއީ 2024ގެ މަޝްރޫއުތައް ހިންގަން ބޭނުންވާ އަދަދުގެ ބައިކުޅަ ބައި. އަޅުގަނޑުމެން ގަބޫލުކުރަނީ %15 އާއި %20އާ ދެމެދުގެ އަދަދެއް ކަމަށް،" މުއްތަލިބު ވިދާޅުވި އެވެ.

"އަޅުގަނޑުމެންނާ އެންމެ ބޮޑަށް ކުރެވޭ ސުވާލަކީ ކީއްވެގެންތޯ ޕްރޮޖެކްޓުތައް ނުހިނގަނީ. ވަރަށް ބައިވަރު ޕްރޮޖެކްޓުތަކެއް ހިންގާ. އެހެން ނަމަވެސް ވަރަށް ބައިވަރު ޕްރޮޖެކްޓުތައް ނުހިނގާ ތަން ވެސް ފެންނާނެ. އޭގެ ސާފު ޖަވާބަކީ، ސޮއިކޮށްފައި ހުރި ޕްރޮޖެކްޓުތައް ކުރިއަށްގެންދިއުމަށް ބޭނުންވާ ފައިސާ މި ދެންނެވި ގޮތަށް ބައިކުޅަ ބައެއް ބަޖެޓުގައި ހިމެނިފައި އޮތުން. އަޅުގަނޑުމެންނަށް ހަރަދުކުރެވެން އަންނަނީ ގާނޫނުގައި ވެސް ވާ ގޮތުން ބަޖެޓުން ކަނޑައަޅާފައިވާ އަދި އެ ފައިސާ ލިބޭ މިންވަރަކަށް ބަލާފައި."

ތަފްސީލު - ސޮއިކޮށްފައިވާ މަޝްރޫއުތަކަށް ބަޖެޓު ކުރި ފައިސާގެ ތެރެއިން ބޮޑު ބައެއް ހަރަދުވަނީ، މުއްތަލިބު ވިދާޅުވި ގޮތުގައި، ތިލަމާލެ ބްރިޖު، އައްޑޫ މަގު ހެދުން އަދި ފެނާއި ނަރުދަމާގެ މަޝްރޫއުތަކަށް އިންޑިއާގެ ލައިން އޮފް ކުރެޑިޓުން ހަރަދުކުރަން ކަނޑައަޅާފައިވާ ފައިސާ އެވެ.

ކޮންސްޓްރަކްޝަން މިނިސްޓްރީން ސޮއިކޮށްފައިވާ 322 މަޝްރޫއުގެ ތެރޭގައި ހިމެނޭ ބައެއް މަޝްރޫއުތަކަކީ:

އެ މަޝްރޫއުތަކުގެ ތެރެއިން އެމްޓީސީސީ އާއި އާރުޑީސީއާ އެކު 190 މަޝްރޫއުގައި ސޮއިކޮށްފައި ވާއިރު، އޭގެ ތެރެއިން ވެސް 63 މަޝްރޫއު އޮތީ މޮބިލައިޒް ނުކުރެވި އެވެ. އަދި މޮބިލައިޒް ކުރެވުނު 127 މަޝްރޫއުގެ ތެރެއިން 68 މަޝްރޫއުގެ މަސައްކަތް އޮތީ ހުއްޓިފަ އެވެ.

ބަޖެޓުގެ ދަތިކަމާ އެކު ވެސް މަޝްރޫއުތައް ނުހުއްޓާ ކުރިއަށްގެންދަން ސަރުކާރުން މަސައްކަތް ކުރި ނަމަވެސް، މުއްތަލިބު ވިދާޅުވީ ބިލުތަކަށް ފައިސާ ނުދައްކާ ހުރުމުން އެކަމުގައި ވެސް ގޮންޖެހުންތަކެއް ކުރިމަތިވި ކަމަށެވެ.

"މި ދައުރު ފެށުނުއިރު ކޮންސްޓްރަކްޝަން މިނިސްޓްރީގެ ޕެންޑިން ބިލުގެ ގޮތުގައި 1.72 ބިލިއަން ރުފިޔާގެ ބިލުތައް ހުރި. މި ދެންނެވީ ފިނޭންސް މިނިސްޓްރީއަށް ނުފޮނުވާ ހުރި ބިލުތައް،" މުއްތަލިބު ވިދާޅުވި އެވެ.

"ފިނޭންސް މިނިސްޓްރީއަށް ޕޯސްޓުކޮށްފައި ކޮންޓްރެކްޓަރުންނަށް ނުދައްކާ 300 މިލިއަނަށް ވުރެ ގިނަ ރުފިޔާ ހުރި. މިނިސްޓްރީގެ ފައިނޭންސް ޑިޕާޓްމަންޓުން ދެއްވި މައުލޫމާތަކީ މި ދެންނެވި ޕެންޑިން ބިލުތަކަށް ބޭނުންވާ ފައިސާ މިދިޔަ އަހަރުގެ ސަޕްލިމެންޓަރީ ބަޖެޓު ފާސްކުރިއިރު ހިމަނާފައި ނުވާކަން."

ބަޖެޓުގެ ދަތިކަމާ އެކު ވެސް މި ސަރުކާރު އައި ފަހުން 1.97 ބިލިއަން ރުފިޔާގެ އަގުހުރި، 37 މަޝްރޫއު ނިމިފައިވާ ކަމަށް މުއްތަލިބު ވިދާޅުވި އެވެ.