މަޖިލީހުގެ ޖަލްސާއެއްގައި ވޯޓުލުން ކުރިއަށްދަނީ (ފޮޓޯ/ މަޖިލިސް)
5 ބިލިއަން ރުފިޔާގެ ސަޕްލިމެންޓަރީ ބަޖެޓު ދިރާސާކުރަން ކޮމިޓީއަށް ފޮނުވައިފި
ދައުލަތުގެ ހަރަދުތައް ހަމަޖައްސަން މިދިޔަ އަހަރު ފާސްކުރި ބަޖެޓަށް އިތުރު 5 ބިލިއަން ރުފިޔާ ހިމަނަން ހުށަހެޅި ސަޕްލިމެންޓަރީ ބަޖެޓް ދިރާސާކުރުމަށް ބަޖެޓު ކޮމިޓީއަށް މިއަދު ފޮނުވައިފި އެވެ.
އެނގުން މުހިންމު - ސަޕްލިމެންޓަރީ ބަޖެޓާ އެކު، މި އަހަރުގެ ބަޖެޓުގެ ޖުމްލަ އަދަދު 55 ބިލިއަން ރުފިޔާއަށް އަރާނެ އެވެ.
ވީކިހިނެއް؟ - ސަރުކާރުން މި ބަޖެޓު ހުށަހެޅީ މިއަދު ހެނދުނުގެ ޖަލްސާއަށެވެ. ބަޖެޓުގެ ބަހުސް ފެށީ މެންދުރުފަހު 1:00 ގަ އެވެ. ބަހުސް ނިމެންދެން މިއަދުގެ ޖަލްސާ ކުރިއަށް ގެންދިޔަ އެވެ.
ބަހުސްގެ ވަގުތު ނިމުމާ އެކު ބަޖެޓު ދިރާސާކުރާ ކޮމިޓީއަށް ފޮނުވާފައިވާ ކަން، މަޖިލީހުގެ ރައީސް އަބްދުއްރަހީމް އަބްދުﷲ އިއުލާން ކުރެއްވުމަށް ފަހު ޖަލްސާ ނިންމާލެއްވީ އެވެ.
ތަފްސީލް - މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ހުށަހަޅުއްވައިގެން ފާސްކުރީ ބަހުސްގައި ބައިވެރިވާން ބޭނުން ކޮންމެ މެންބަރަކަށް ފަސް މިނެޓުގެ ފުރުސަތު ދޭ ގޮތަށެވެ.
ބަޖެޓް ދިރާސާކުރާ ކޮމިޓީއަށް އެކަން ކުރަން ދިނީ އެންމެ ދުވަހެއްގެ މުއްދަތެވެ. ބަޖެޓް ކޮމިޓީ އެކުލެވިގެންވަނީ މާލިއްޔަތު ކޮމިޓީ އާއި އިގުތިސާދީ ކޮމިޓީއަށެވެ.
ކީކޭ ބުނީ؟ - ބަޖެޓު ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ މި އަހަރަށް ފާސްކުރީ ނިމިދިޔަ ސަރުކާރުން އެކުލަވާލި ބަޖެޓެއް ކަމަށެވެ.
ރައީސް މުހައްމަދު މުއިއްޒުގެ ސަރުކާރުގެ ތަސައްވުރާއި ވިސްނުން އެ ބަޖެޓުގައި ފުރިހަމައަށް ހިމެނިފައި ނެތް ކަމަށް ވެސް ވިދާޅުވި އެވެ.
އޭނާ ވިދާޅުވީ މިދިޔަ އަހަރު ބަޖެޓު ފާސްކުރިއިރު ވެސް މި އަހަރަށް ގާތްގަނޑަށް 60 ބިލިއަން ރުފިޔާ ހަރަދުވާނެ ކަން އެނގެން އޮތް ކަމަށެވެ.
ސަޕްލިމެންޓްރީ ބަޖެޓް ޒަމީރު ވިދާޅުވި ގޮތުގައި އެ ބަޖެޓަށް ބޭނުންވާ ފައިސާ ހޯދަން ރާވާފައިވަނީ ޕްރޮޖެކްޓް ލޯނުތަކުންނާއި، ރާއްޖޭގެ އެތެރެއިން ލޯނު ހޯދައިގެންނާއި ޓީ ބިލު ވިއްކައިގެންނެވެ.
"މިގޮތުން މި ސަޕްލިމެންޓަރީ ބަޖެޓް ފައިނޭންސްކުރަން ރާވާފައިވަނީ ބޭރުގެ ފަރާތްތަކުން 1 ބިލިއަން ރުފިޔާ، އަދި ރާއްޖޭގެ ފަރާތްތަކުން 3 ބިލިއަން ރުފިޔާ ހޯދައިގެން،" އޭނާ ވިދާޅުވި އެވެ.
މިއަދުު ހުށަހެޅި ސަޕްލިމެންޓްރީ ބަޖެޓް ބަހާލާފައިވަނީ:
-
ޕީއެސްއައިޕީ މަޝްރޫއުތަކަށް: 2 ބިލިއަން ރުފިޔާ
-
އެސްއޯއީތަކަށް: 441.1 މިލިއަން ރުފިޔާ
-
ކޮންޓިންޖެންސީ ބަޖެޓަށް: 650 މިލިއަން ރުފިޔާ
-
ސްޓޫޑެންޓް ލޯނަށް: 458 މިލިއަން ރުފިޔާ
-
މެޑިކަލް ކޮންސިއުމެބަލްސްއަށް: 200 މިލިއަން ރުފިޔާ
-
ބޭސް ފަރުވާގެ އެހީއަށް: 262.6 މިލިއަން ރުފިޔާ
-
ސަބްސިޑީއަށް: 1.02 ބިލިއަން ރުފިޔާ
-
މުސާރަ އާއި އުޖޫރައަށް: 24.4 މިލިއަން ރުފިޔާ
ޒަމީރު ވިދާޅުވީ ޕީއެސްއައިޕީގެ މަޝްރޫއުތަކަށް 2 ބިލިއަން ރުފިޔާ ހިމަނާފައިވަނީ އެ މަޝްރޫއުތައް ހުއްޓުމެއްނެތި ކުރިއަށް ގެންދަން ކަމަށެވެ.
ޒަމީރު އިތުރަށް ވިދާޅުވި ގޮތުގައި:
-
ސަޕްލިމެންޓަރީ ބަޖެޓުގެ އާމްދަނީ ހިމަނައިގެން އާމްދަނީ އާއި ހިލޭ އެހީގެ ގޮތުގައި މި އަހަރު ލިބޭނެކަމަށް ލަފާކުރަނީ 34 ބިލިއަން ރުފިޔާ
-
ސަޕްލިމެންޓަރީ ބަޖެޓުގެ އޯވަރޯލް ޑެފިސިޓަކީ 4 ބިލިއަން ރުފިޔާ
-
މި އަހަރުގެ ބަޖެޓުގެ ޑެފިސިޓް، މި ސަޕްލިމެންޓަރީ ބަޖެޓާ އެކު 18 ބިލިއަން ރުފިޔާއަށް މައްޗަށް ދާނެ
-
މިއީ އުފެއްދުންތެރިކަމުގެ ނިސްބަތުން %16
-
އަހަރު ނިމޭއިރު ދައުލަތުގެ ދަރަނި ހުންނާނީ އުފެއްދުންތެރިކަމުގެ ނިސްބަތުން %118ގައި ކަމަށް ލަފާކުރެވޭ
ކޮމެންޓް