ޔަހޫދީންގެ ބޮޑުވަޒީރުގެ ގެއަކަށް ޑްރޯންގެ ހަމަލާއެއް ދީފި

އިޒްރޭލްގެ ބޮޑުވަޒީރު ބެންޖަމިން ނަތަންޔާހޫ ޗުއްޓީ ހޭދަކުރައްވާ ގެއަކަށް ހިޒްބުﷲގެ ޑްރޯން ހަމަލާއެއް މިއަދު އަމާޒުވެއްޖެ އެވެ.

ވީ ކިހިނެއް؟ - މިދިއަ އަހަރު ގާޒާއަށް އިޒްރޭލުން ހަމަލާދޭން ފެށުމުން ލެބެނަަންގެ ހިޒްބުﷲ ޖަމާއަތުން ވަނީ އިޒްރޭލަށް ރޮކެޓް ހަމަލާތައް ދޭން ފަށައިފަ އެވެ. އެ ހަމަލާތަކާ ގުޅިގެން އުތުރު އިޒްރޭލުން 60،000އަށް ވުރެ ގިނަ މީހުން ގެދޮރު ދޫކޮށް، އެހެން ހިސާބުތަކުގައި އުޅެން މަޖުބޫރުވި އެވެ.

ތަފްސީލް - ހިޒްބުﷲ ނައްތާލަން އިޒްރޭލުން ފެށި ހަނގުރާމައަށް ފަހު ވެސް އެ ޖަމާއަތުގެ ރޮކެޓް އާއި ޑްރޯންގެ ހަމަލާތަކުން އިޒްރޭލްގެ ސަރަހައްދުތައް ސަލާމަތްކުރެވިފައެއް ނުވެ އެވެ. އެގޮތުން މިއަދު ހެނދުނު ތިން ޑްރޯންއެއް، ނަތަންޔާހޫގެ ގެއަކާއި އިޒްރޭލްގެ އަސްކަރީ މަރުކަޒަަކަށް އަމާޒުކޮށް ފޮނުވާލި އެވެ.

އިޒްރޭލްގެ ސިފައިން ބުނާ ގޮތުގައި އޭގެ ތެރެއިން ދެ ޑްރޯން ވައްޓާލެވުނެވެ. ނަމަވެސް އެއް ޑްރޯން އޭގެ އަމާޒަށް ވާސިލްވި އެވެ. އެއީ އުތުރު ސަރަހައްދުގެ ޓައުނެއް ކަމަށްވާ ސިޒޭރިއާގައި ހުރި ނަތަންޔާހޫގެ ގެ އެވެ.

އެ ވަގުތު ނަތަންޔާހޫ އެ ގޭގައި ނޫޅުއްވާ ކަމަށް، އިޒްރޭލްގެ މީޑިއާތަކުން ބުނެ އެވެ.

ނަމަވެސް ޑްރޯންގެ އެ ހަމަލާއާ އެކު ތެލް އަވީވްގައި ވެސް އިންޒާރުގެ ސައިރަން އަޅަން ފެށި އެވެ.

ހިޒްބުﷲގެ އެތައް ވެރިންނެއް އަވަހާރަކޮށްލެވިފައި ވިޔަސް، އެ ޖަމާއަތުގެ ހަމަލާތައް ހުއްޓުމަކަށް ނުގެނެވެ އެވެ. އެކަމަކު އިޒްރޭލުން ގެންދަނީ ލުބުނާންގެ އެކި ހިސާބުތަކަށް ވައިގެ މަގުން ވެސް ހަމަލާދެމުންނެވެ.

ނަތަންޔާހޫގެ ގެއަކަށް ސީދާ އަމާޒުކޮށް ޑްރޯންގެ ހަމަލާއެއް ދެވުމުގެ މާނައަކީ އިޒްރޭލްގެ ވައިގެ ދިފާއުއަށް އޮބިނޯންނަ ވަރަށް ކަންކަން ދާ ކަމެވެ. އިޒްރޭލަކީ ވައިގެ އެންމެ ވަރުގަދަ އެއް ދިފާއު އޮތް ގައުމެވެ. ނަމަވެސް ހިޒްބުﷲގެ އިތުރުން މި ފަހުން އީރާނުން ފޮނުވި ބައެއް މިސައިލްތައް ވެސް އިޒްރޭލްގެ އެކި ހިސާބުތަކަށް ވެއްޓިފައިވެ އެވެ.