ވޯލްޑް ކްލީންއަޕް ދުވަސް 2024ގައި ޓީސީސީއެފް އާއި ވެމްކޯ އަދި މޯޕާ ގުޅިގެން ކުރިއަށް ގެންދިޔަ ޕްރޮޖެކްޓްގައި ހުސްފުޅި ރިސައިކަލް ކުރުމަށް ފުޅި ކޮންޓޭނަރެއްވަނީ އެކްސްޕޯޓްކޮށްފައި.
ޕްލާސްޓިކް ރިސައިކަލް ކުރަން ހުސްފުޅި އެކްސްޕޯޓްކޮށްފި
ރާއްޖޭގައި ބޭނުންކުރާ ޕްލާސްޓިކް ރިސައިކަލް ކުރުމަށް ބޭނުންކޮށްފައިވާ ޕްލާސްޓިކް ފުޅި (ޕެޓް)ގެ ބޭލްޑްގެ ކޮންޓެއިނަރެއް އެކްސްޕޯޓްކޮށްފި އެވެ.
ވީ ކިހިނެއް؟ - މިއީ ދަ ކޮކާ-ކޯލާ ފައުންޑޭޝަން (ޓީސީސީއެފް) އާއި ވެމްކޯ އަދި މޯލްޑިވްސް އޯޝަން ޕްލާސްޓިކްސް އެލަޔަންސް (މޯޕާ) ގުޅިގެން ކުރިއަށް ގެންދާ މި ހަރަކާތް ކުރިއަށް ގެންގޮސްފައިވަނީ މިދިޔަ މަހުގެ 20ގައި ފާހަގަކުރި 'ވޯލްޑް ކްލީންއަޕް ދުވަސް 2024'ގަ އެވެ. އެ ހަރަކާތުގައި ޓީސީސީއެފް އިން ހަރަދުކޮށްގެން، ޕިކަޕް އާއި ބެލާ ހިމެނޭ ސާމާނު ވަނީ ވެމްކޯއާ ހަވާލުކޮށްފަ އެވެ.
ތަފްސީލް - މޯޕާ އިން ބުނީ 'އައިލެންޑް ޕެޓް ކަލެކްޝަން ޕްރޮޖެކްޓް'ގެ ނަމުގައި ކުރިއަށް ގެންދާ އެ ޕްރޮޖެކްޓަކީ ރާއްޖޭގެ ރަށްރަށުގައި ދެމެހެއްޓެނިވި ގޮތެއްގައި ޕްލާސްޓިކް ކުނި ބޭނުކޮށް އަލުން ބޭނުންކުރުމުގެ އަމާޒުގެ ކުރިއަށްގެންދާ ޕްރޮޖެކްޓެއް ކަމަށެވެ. އަދި އެއީ ޕްލާސްޓިކް ފުޅި އެއްކުރުން ހަރުދަނާކޮށް، ރާއްޖޭގައި ޕްލާސްޓިކް ކުނީގެ މައްސަލަ ހައްލުކުރުމަށް އަދި އެކަމަށް ބޭނުންވާ އާލާތްތަކާއި ނިޒާމުތައް ވެސް ގާއިމްކޮށްދިނުމަށް ކުރިއަށް ގެންދާ މުހިންމު މަސައްކަތެއް ކަމަށް ވެސް އެ ތަނުން ބުންޏެވެ.
މި ޕްރޮޖެކްޓާ ގުޅޭ ގޮތުން އެ ތަނުން ބުނީ:
-
ރީސައިކަލް ކުރުމަށް ބެލްޑް ޕެޓް ފުޅި މެލޭޝިއާ އާއި ޗައިނާއަށް އެކްސްޕޯޓް ކުރާނެ
-
ގިނަ އަދަދެއްގެ ކުނި ބެލްޑް ކުރުމުން ދަތުރުފަތުރަށް ވަރަށް ބޮޑަށް ރަނގަޅުވެ، މި މަސައްކަތުގައި ކުރިއެރުންތަކެއް ލިބިގެންދާނެ
-
މި ޕްރޮޖެކްޓްގައި ބޮޑަށް ބަލަނީ ޕްލާސްޓިކް ފުޅި އެއްކުރުމުގެ ނިޒާމުތައް ފުޅާކޮށް، ރީސައިކަލް ކުރުން ހަރުދަނާކޮށް ތަރައްގީ ކުރެވެންދެން މުޅި ރާއްޖޭގައި ޕްލާސްޓިކް ކުނި އެއްކުރެވޭ މިންވަރު ރަނގަޅުކުރުމަށް
-
އޮޕަރޭޝަންތައް ރަށްރަށާ ގުޅުވައިދިނުމާއި ކުނި ވަކިކުރުމާ ބެހޭ ގޮތުން ހޭލުންތެރިކުރުވުމާއި ޕްލާސްޓިކް އެއްކުރުމުގެ މަސައްކަތް ފުޅާކުރުމުގައި މޯޕާ އިން މުހިންމު ދައުރެއް އަދާކުރާނެ
"މި މަޝްރޫއަކީ ޕްލާސްޓިކް ކުންޏާ ދެކޮޅަށް އަޅުގަނޑުމެން ކުރާ މަސައްކަތުގައި ރާއްޖެއަށް ލިބުނު އިންގިލާބީ ކުރިއެރުމެއް،" މޯޕާގެ ރައީސް އަހުމަދު މައުމޫން ވިދާޅުވި އެވެ.
"މުޖުތަމައުތަކަށް ތައުލީމު ދިނުމާއި ވެމްކޯ ފަދަ ގައުމީ ބައިވެރިންނާ ގުޅިގެން ކުނި މެނޭޖްކުރާ ގޮތް ރަނގަޅު ކުރުމުގެ އިތުރުން، ދިގު މުއްދަތަކަށް ދެމެހެއްޓެނިވި ގޮތެއްގައި ކުރިއަށް ގެންދިއުމާއި ތިމާވެށީގެ ރައްކާތެރިކަމަށްމަގުފަހިކޮށްދިނުމަކީ އަޅުގަނޑުމެންގެ އަމާޒެއް."
އޭގެ އިތުރުން، މޯޕާ އިން ބުނީ:
-
ވެމްކޯއާ ގުޅިގެން މުޖުތަމައުތަކުގެ ހޭލުންތެރިކަން އިތުރުކުރުމުގެ ޕްރޮގްރާމްތައް ތައާރަފްކުރުމަށް އެހީތެރިވެދީފައިވާނެ
-
ޓީސީސީއެފްގެ ހަރަދުގައި ގެންނަ ކޮމްޕެކްޓަރާއި ޕިކަޕް ފަދަ ވަސީލަތްތައް މާލޭ ސަރަހައްދާއި އެހެން ރަށްރަށުގައި ވެސް ފައިދާ ހުރި ގޮތެއްގައި ބޭނުންކުރެވޭނެ ގޮތް ހެދުމަށް މަސައްކަތްކޮށްފައިވާނެ