ސައިކަލުގެ ހުންގާނު ކުޑަކުއްޖެއްގެ އަތަށް ދީގެން ދުއްވަނީ.
ކުޑަކުއްޖަކަށް ސައިކަލުގެ ހުންގާނު ދިން މައްސަލާގައި ފިޔަވަޅު އަޅަން ފޮނުވައިފި
ސިނަމާލެ ބްރިޖްއާ ގުޅޭ ހައިވޭގައި ކުޑަކުއްޖެއްގެ އަތަށް ހުންގާނު ދީގެން ސައިކަލު ދުއްވި މައްސަލާގައި ފިޔަވަޅު އެޅުމަށް ފުލުހުންގެ ފަރާތުން ޓްރާންސްޕޯޓް މިނިސްޓްރީއަށް މިއަދު ހުށަހަޅައިފި އެވެ.
ވީ ކިހިނެއް؟ - ފުލުހުން މިއަދު މީޑިއާތަކަށް ފޮނުވި މެސެޖެއްގައިވާ ގޮތުން، ޓްރެފިކް ގާނޫނާ ހިލާފުވެފައިވާތީ، އެ މައްސަލާގައި ފިޔަވަޅު އެޅުމަށް ޓްރާންސްޕޯޓް މިނިސްޓްރީއަށް މިއަދު ވަނީ ފޮނުވާފަ އެވެ.
ނަމަވެސް، އޭނާއަށް އަޅަނީ ކޮން ފިޔަވަޅެއް ކަމެއް އަދި ނޭނގެ އެވެ.
ފަސްމަންޒަރު - އެ މައްސަލަ ފުލުހުންގެ ސަމާލުކަމަށް އައީ މިދިޔަ ހަފްތާގައި ސޯޝަލް މީޑިއާގައި ދައުރުވި ވީޑިއޯއަކުންނެވެ. އެ ވީޑިއޯ އިން ފެންނަނީ ކުޑަ ފިރިހެން ކުއްޖެއްގެ އަތަށް ބޮޑު މީހަކު، ސައިކަލުގެ ހުންގާނު ދީގެން ދުއްވާތަނެވެ.
ޕްރީ ސްކޫލެއްގެ ޔުނީފޯމުގައި އިން ކުޑަކުއްޖާ ހުންގާނުގައި ހިފަހައްޓާލައިގެން އިން އިރު، ފިރިހެން މީހާ އިނީ ސައިކަލްގެ ކޮންޓްރޯލް ކުޑަކުއްޖާއަށް ދީގެން، އެއް އަތް ވެސް ދޫކޮށްލައިގެންނެވެ. އެކަމަކު އަނެއް އަތުން ހުންގާނުގައި ފިރިހެން މީހާ ހިފަހައްޓައިގެން ހުރިތަން ފެނެ އެވެ.
ފާހަގަކޮށްލެވޭ - އެ މައްސަލައާ ގުޅިގެން، ސައިކަލުގައި އިން ބޮޑު މީހާ ފުލުހަށް ހާޒިރުކޮށް ސުވާލުކޮށްފައިވާކަމަށް ފުލުހުން ވަނީ މީގެ ކުރިން ބުނެފަ އެވެ. އަދި، އޭނާ ގަސްތުގައި ކުޑަ ކުއްޖަކު ނުރައްކަލަށް ހުށަހެޅި މައްސަލަ ވަކި މައްސަލައެއްގެ ގޮތުގައި ފުލުހުން ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.
"މި މައްސަލައާ ގުޅިގެން އަޅަން ޖެހޭ ފިޔަވަޅުތައް އަޅާނެ ކަމުގެ ޔަގީންކަން ދެން،" ފުލުހުން މީގެ ކުރިން މީޑިއާތަކަށް ފޮނުވި މެސެޖެއްގައިވެ އެވެ.