ފިިނިފެންމާ މައްސަލާގައި ސިފައިންގެ ވަޒީފާއިން ވަކިކުރި މޫސާ ޒަމީރު އެ މައްސަލަ ކްރިމިނަލް ކޯޓުގައި ކުރިއަށްދިޔައިރު ކޯޓަށް ހާޒިރުވަނީ؛ (ފައިލް ފޮޓޯ/މިހާރު)
ފިނިފެންމާ ލޯންޗު މައްސަލާގައި ސިފައިންގެ ވަޒީފާއިން ވަކިކުރި ޒަމީރަށް ބަދަލުދޭންޖެހޭ ކަމަށް ކަނޑައަޅައިފި
ރިޔާސީ ލޯންޗު "ފިނިފެންމާ"ގައި ބޮންް ގޮއްވާލާފައިވަނިކޮށް، ލޯންޗުގައި ހުރި މުހިންމު ހެކިތަކެއް ހުއްދަ ނެތި ގެންދިޔަ ކަމަށް ތުހުމަތުކޮށް ސިފައިންގެ ވަޒީފާއިން ވަކިކުރި މޫސާ ޒަމީރަށް ގެއްލުމުގެ ބަދަލު ދޭންޖެހޭ ކަމަށް އިއްޔެ ހައި ކޯޓުން ކަނޑައަޅައިފި އެވެ.
މައްސަލައިގެ ފެށުން - ކުރީގެ ރައީސް އަބްދުﷲ ޔާމީން އަވަހާރަކޮށްލަން 2015 ވަނަ އަހަރު ފިނިފެންމާ ލޯންޗުގައި އެއްޗެއް ގޮއްވާލީ އެ އަހަރުގެ ސެމްޓެމްބަރު މަހުގެ ތެރޭގައި ޔާމީން ހައްޖަށް ކުރެއްވި ދަތުރަށް ފަހު އެނބުރި މާލެ ވަޑައިގަތް ދުވަހު އެވެ. އެ ހާދިސާގައި ޔާމީންގެ އަނބިކަނބަލުންނާއި ބޮޑީގާޑެއްގެ އިތުރުން ސެކްރެޓަރީއަށް އަނިޔާތަކެއް ލިބުނެވެ.
މި މައްސަލާގައި:
-
ޒަމީރު ވަޒީފާއިން ވަކިކުރީ އެ ލޯންޗުގައި ހުރި މުހިންމު ހެކިތަކެއް ހުއްދަ ނެތި ލޯންޗުން ބޭރުކުރި ކަމަށް ބުނެ
-
އެ މައްސަލާގައި އަދުލު އިންސާފު ގާއިމްކުރުމަށް ހުރަސްއެޅުމުގެ ކުށުގެ ދައުވާ ޒަމީރުގެ އިތުރުން އޭރު ސިފައިންގެ ވަޒީފާ އަދާކުރަމުންދިޔަ އަހުމަދު ތިހާމްގެ މައްޗަށް ކުރި
-
19 ޖޫން 2016 - އެ ދެ މީހުންގެ މައްޗަށް ވެސް ކުށް ސާބިތުވެ ހަތަރު މަހާއި 24 ދުވަހަށް ޖަލަށްލާން ކްރިމިނަލް ކޯޓުން 2016ވަނަ އަހަރުގެ ޖޫން މަސްތެރޭ ހުކުމް ކުރި
-
30 އެޕްރީލް 2019 - ޒަމީރުގެ ފަރާތުން އެ ހުކުމް ހައި ކޯޓުގައި އިސްތިއުނާފް ކުރުމުން އޭނާގެ މައްޗަށް ކުށް ސާބިތުނުވާ ކަމަށް ނިންމައި ކްރިމިނަލް ކޯޓުގެ ހުކުމް ބާތިލުކޮށްފައިވޭ
ވީ ކިހިނެއް؟ - ކުށް ސާބިތުނުވާ ކަމަށް ނިންމުމުން ވަޒީފާ އަލުން އިއާދަކޮށްދިނުމާ އެކު، ގެއްލުމުގެ ބަދަލުގެ ގޮތުގައި 1 މިލިއަން ރުފިޔާގެ ބަދަލެއް ހޯދަން ޒަމީރުގެ ފަރާތުން ސިވިލް ކޯޓަށް ހުށަހެޅި އެވެ.
ނަމަވެސް ސިވިލް ކޯޓުން ނިންމީ އޭނާ ވަޒީފާއިން ވަކިކޮށްފައިވަނީ ސިފައިންކުރާ ކުށްތަކަށް އަދަބު ދިނުމުގެ ގަވައިދާ އެއްގޮތަށް ކަމުން ވަޒީފާ އިއާދަކުރަން އަންގާނެ ތަނެއް ނެތް ކަމަށެވެ. އަދި މީހެއްގެ މައްޗަށް އަންނަ ހުކުމަކާ ގުޅިގެން ވަޒީފާއިން ވަކިކުރާ ސިފައިންނަށް، އެ ހުކުމް ފަހުން ބާތިލުކުރިޔަސް އެ ވަޒީފާއަށް ރުޖޫއަ ކޮށްދޭންޖެހޭނެ ކަމަށް ސިފައިންގެ ގާނޫނު ބުނެފައިނުވާތީ ގެއްލުުމުގެ ބަދަލު ނަގައިދެވެން ނެތް ކަމަށް ވެސް ސިވިލް ކޯޓުން ނިންމާފައިވެ އެވެ.
ސިވިލް ކޯޓުގެ މި ނިންމުން ޒަމީރުގެ ފަރާތުން ހައި ކޯޓުގައި އިސްތިއުނާފް ކޮށްފައިވެ އެވެ.
ހައި ކޯޓުގެ ނިންމުން - މި މައްސަލަ ހައި ކޯޓުގައި ބެއްލެވި ތިން ފަނޑިޔާރުންގެ އިއްތިފާގުން އިއްޔެ ނިންމާފައިވަނީ މޫސާ ޒަމީރަށް ނަގައިދެވޭނެ ގެއްލުމުގެ ބަދަލުގެ މިންވަރު ކަނޑައެޅުމަށް އަމުރުކޮށް ސިވިލް ކޯޓަށް މައްސަލަ ފޮނުވުމަށެވެ.
ހުކުމުގައި ވަނީ:
-
ޒަމީރު ވަޒީފާއިން ވަކިކޮށްފައިވަނީ ސިފައިން ކުރާ ކުށްތަކަށް އަދަބު ދިނުމާބެހޭ ގަވާއިދާ ހިލާފަށް ކަމަށް ކަނޑައަޅާފައި
-
ނަމަވެސް ވަޒީފާ އިއާދަކޮށްދޭން އަންގާނެ ތަނެއް ނެތް ކަމަށް ކަނޑައެޅި
-
ވަޒީފާ އިއާދަކޮށްދެވެން ނެތް ކަމަށް ނިންމީ މައްސަލާގައި ހިނގާފައިވާ މުއްދަތަށާއި މިމުއްދަތުގައި ސިފައިންގެ މުއައްސަސާއަށާއި ވަޒީފާތަކުގެ ކޮލިފިކޭޝަނަށާއި ހުނަރަށް އައިސްފައިވާ ބަދަލުތަކަށް ރިއާޔަތްކޮށް ވަޒީފާ ރުޖޫއަކުރަން އެންގުމަކީ އެންމެ މަސްލަހަތު ހުރި ގޮތް ކަމުގައި ނުދެކޭތީ
-
އެހެންކަމުން ވަޒީފާ އަނބުރާ ރުޖޫއަކުރަން އެންގުމުގެ ބަދަލުގައި މި މައްސަލާގައި މެދުވެރިވެފައިވާ ހާލަތަށް ރިއާޔަތްކުރާ އިރު އެންމެ އަދުލުވެރި ހައްލަކީ ގެއްލުމުގެ ބަދަލު ނަގައިދިނުން ކަމަށް
މައްސަލައިގެ ހުލާސާ
މޫސާ ޒަމީރަކީ 2 މެއި 2000 އިން ފެށިގެން އެމްއެންޑީއެފްގައި ވަޒީފާއަދާ ކުރަމުން ދިޔަ މީހެކެވެ. ފިނިފެންމާ މައްސަލާގައި ހައްޔަރުކޮށް ދައުވާކުރި އިރު އޭނާ މަސައްކަތް ކުރަމުންދިޔައީ އެމްއެންޑީއެފްގެ އެކްސްޕްލޯސިވް އޯޑިނަންސް ޑިސްޕޯސަލް ޔުނިޓުގަ އެވެ.
-
އޭރުގެ ރައީސް ޔާމީން ދަތުރުކުރެއްވި ފިނިފެންމާ ލޯންޗުކޮޅުގައި އެއްޗެއް ގޮވީ 28 ސެޕްޓެމްބަރު 2015ގައި
-
މި ހާދިސާއާ ގުޅިގެން އެމްއެންޑީއެފްގެ އިސްވެރިން ކުރެއްވި ކޮމާންޑަކާ އެއްގޮތަށް އެ ދުވަހު ފިނިފެންމާ ލޯންޗު ޗެކްކުރުމަށާއި، ގޮވާޒާތުގެ ޑިވައިސްއެއް އޮތްތޯ ބެލުމަށް ހަރަކާތްތެރިވި ސިފައިންގެ ތެރޭގައި ޒަމީރު ހިމެނޭ
-
ޒަމީރުގެ މައްޗަށް ދައުވާކުރީ ބަލައި ފާސްކުރުމުގެ ތެރޭގައި ލޯންޗުގައި ހުރި މުހިންމު ހެކިތަކެއް ހުއްދަނެތި ގެންދިޔަ ކަމަށް ބުނެ؛ އެ މައްސަލާގައި އޭނާ ހައްޔަރުކުރީ 5 އޮކްޓޫބަރު 2015ގައި
-
ކްރިމިނަލް ކޯޓުން އޭނާގެ މައްޗަށް ކުށް ސާބިތުވެ ހަތަރު މަހުގެ ޖަލު ހުކުމެއް އައިނަމަވެސް އެ މުއްދަތު ބަންދުގައި ހޭދަކޮށްފައިވާތީ އޭނާ މިނިވަންވި
-
އެދުވަހު އޭނާގެ ވެރިއަކަށް ހުރި ކެޕްޓަން އަހުމަދު ފަޔާޒަށް ވެސް ދެ އަހަރުގެ ޖަލު ހުކުމެއް އައިސްފައިވޭ
-
ލޯންޗު ގޮއްވާލުމުގެ އަޑީގައި ހުރީ އޭރުގެ ނައިބު ރައީސް އަހުމަދު އަދީބުކަން ސާބިތުވެ، އޭނާގެ މައްޗަށް 15 އަހަރުގެ ޖަލު ހުކުމެއް އިއްވި؛ އެ ހުކުމް މިހާރު ވަނީ ބާތިލުކޮށްފައި
-
ލޯންޗުގައި ގޮވާއެއްޗެއް ހަރު ކުރުމުގައި އަމަލީ ގޮތުން ބައިވެރިވިކަން ސާބިތުވެ، އަދީބުގެ ދެ ބޮޑީގާޑުންނަށް 10 އަހަރުގެ ޖަލު ހުކުމެއް އައިސްފައިވޭ