ސަރުކާރުގެ އެންމެ ބޮޑު ހޮސްޕިޓަލް، އައިޖީއެމްއެޗް: އެތަނުގެ މާބަނޑު އަދި ޅަދަރިިމައި މުވައްޒަފުންނަށް ލުއި ދުނިނުން އުވާލި މައްސަލަ ވަނީ ހޫނުވެފައި
މައްސަލަ ބޮޑުވުމުން އައިޖީއެމްއެޗްގެ މާބަނޑު މުވައްޒަފުންނަށް ލުއިދޭ އުސޫލު އިއާދަކޮށްފި
ސަރުކާރުގެ މައި ހޮސްޕިޓަލް، އައިޖީއެމްއެޗްގައި މަސައްކަތްކުރާ މާބަނޑު އަދި ޅަދަރިމައި މުވައްޒަފުންނަށް ޑިއުޓީގެ ލުއި ގޮތްތަކެއް ހަމަޖައްސައިދިނުމާ ގުޅޭ އުސޫލު ބަދަލުކުރުމުން ފާޑުކިޔުން އަމާޒުވުމުން ކުރިން އޮތް ގޮތަށް އުސޫލު ބަދަލުކޮށްފި އެވެ.
ވީ ކިހިނެއް؟ - އައިޖީއެމްއެޗުން ބުނީ މާބަނޑު އަދި ޅަދަރިމައި މުވައްޒަފުންނަށް ޑިއުޓީގައި ލުއި ގޮތްތަކެއް ހަމަޖައްސައިދިނުން ހުއްޓާލުމާ ގުޅޭގޮތުން ނެރުނު މެމޯއާ ގުޅިގެން މުވައްޒަފުން ކަންބޮޑުވުން ފާޅުކޮށްފައި ވާތީ އެކަންބޮޑުވުންތަކަށް ރިއާޔަތްކޮށް ނިންމުން ބަދަލުކުރަން މިހާރު ނިންމާފައިވާ ކަމަށެވެ.
ތަފްސީލް - އެކަމާ ގުޅޭގޮތުން އައިޖީއެމްއެޗުން ނެރުނު ބަޔާނެއްގައި ބުނީ އެ މެމޯގައި ޑިއުޓީއަށް ލުއި ދިނުން އެއްކޮށް ހުއްޓާލާ ކަހަލަ ގޮތަކަށް ދޭހަވާ ގޮތަށް އިބާރާތްކުރެވިފައިވާ ކަމަށެވެ. ނަމަވެސް މާބަނޑު މުވައްޒަފުންނަށް މިހާރުވެސް ދެމުންގެންދާ ލުއިތަކަށް ބަދަލެއް ނުގެންނަން ނިންމާފައިވާ ކަމަށް ބަޔާނުގައި ބުންޏެވެ.
އޭގެ އިތުރުން ބަޔާނުގައި ބުނީ:
-
އައިޖީއެމްއެޗަކީ 24 ގަޑިއިރު ހިދުމަތް ދޭ ހޮސްޕިޓަލެއްކަމުން ޝިފްޓް ޑިއުޓީގެ ގޮތުގައި މަސައްކަތްކުރާ މުވައްޒަފުންގެ މަސައްކަތު ގަޑި ކުރުކުރުމުން ބަލި މީހުންނަށް އެކަށީގެންވާ ގޮތެއްގައި ހިދުމަތް ނުދެވޭ ކަމަށް
-
އެހެންވެ ފްލެކްސިބަލް ޑިއުޓީ ދިގުމުއްދަތަކަށް ދޭ ދިނުމަށް ކޮންމެވެސް ވަރެއްގެ ހަރުދަނާކަމެއް ގެންނަން ޖެހޭ ކަމަށް ބުނި
-
އެހެންވެ ނިންމީ އެކަމަށް ހުށަހަޅާ މުވައްޒަފުންނަށް އެ މީޖުން ހުށަހަޅާ ހާލަތްތަކަށް ރިއާޔަތްކޮށް އެކަށީގެންވާ ގޮތަކަށް ޑިއުޓީގެ ލުއި ހަމަޖައްސައިދޭން
-
އެފަދަ މުވައްޒަފުން ވަގުތީ ގޮތުން ލުއި ޑިޕާޓްމަންޓުތަކަށް ބަދަލުވާން އެދޭ ނަމަ އެގޮތަށް ބަދަލު ގެނެސްދޭނެ ކަމަށް ވެސް ބުނި
"ރައްޔިތުންނަށް މި ހޮސްޕިޓަލުންދޭ ހިދުމަތްތަކަށް ދަތިނުވާނޭހެން، މުވައްޒަފުން މަސައްކަތްކުރުމުގައި ފަސޭހަގޮތްތައް ހަމަޖައްސައިދީ އެކަށީގެންވާ މާހައުލެއް ގާއިމްކޮށްދޭން އިސްކަންދޭނެ އެވެ." އައިޖީއެމްއެޗްގެ ބަޔާން ނިންމާލަމުން ބުނެފައިވެ އެވެ.