ރައީސް މުއިއްޒު، ވަޒީރުންގެ މަގާމުތައް ބަދަލުކުރެއްވުމަށް ފަހު އެ ބޭފުޅުންނާ ބައްދަލުކުރައްވަނީ. (ފޮޓޯ/ރައީސް އޮފީސް)
ޒަމީރާއި ހަލީލާއި ނާޒިމަށް ރުހުން ހޯދަން މަޖިލީހަށް ފޮނުވައިފި
ފޮރިން މިނިސްޓަރާއި ހެލްތު މިނިސްޓަރު އަފި ފިނޭންސް މިނިސްޓަރުގެ މަގާމުގައި ތިއްބެވި ބޭފުޅުން ބަދަލުކުރައްވައި އާ ވަޒީރުންނަށް ރުހުން ހޯދަން ރައްޔިތުންގެ މަޖިލީހަށް ފޮނުވައިފި އެވެ.
ވީ ކިހިނެއް؟ - ފޮރިން މިނިސްޓަރާއި ހެލްތު މިނިސްޓަރު އަފި ފިނޭންސް މިނިސްޓަރުގެ މަގާމުގައި ތިއްބެވި ބޭފުޅުން ރައީސް މުހައްމަދު މުއިއްޒު ބަދަލުކުރެއްވީ މިދިޔަ މަހުގެ 30ގަ އެވެ.
ފިނޭންސް މިނިސްޓަރަކަށް ފޮރިން މިނިސްޓަރު މޫސާ ޒަމީރު އަދި ފޮރިން މިނިސްޓަރަކަށް އޭރުގެ ހެލްތު މިނިސްޓަރު ޑރ. އަބްދުﷲ ހަލީލް އައްޔަންކުރެއްވި އެވެ. އަދި ހެލްތު މިނިސްޓަރަކަށް ހަމަޖައްސާފައިވަނީ ރައީސް އޮފީހުގެ މިނިސްޓަރަކަށް އޭރު ހުންނެވި ކުރީގެ ހެލްތު މިނިސްޓަރު އަބްދުﷲ ނާޒިމެވެ.
ތަފްސީލް - މިނިސްޓަރަށް ރުހުން ދިނުމަށް އިތުރަށް ދިރާސާކުރަން އެކަމާ ބެހޭ ދާއިމީ ކޮމެޓީއަށް މިއަދު ވަނީ ފޮނުވާފަ އެވެ.
މިއީ ރައީސް މުއިއްޒުގެ ކެބިނެޓަށް ގެނައި ފުރަތަމަ ބަދަލެވެ. ބަދަލުތަކާ އެކު މިނިސްޓަރުން މަގާމުގެ ހުވާ ހަމަ އެ ދުވަހު ވަނީ ކުރައްވާފަ އެވެ.
އެ ނިންމުންތަކާ އެކު މާލީ ވަޒީރަކަށް އޭރު ހުންނެވި ޑރ. މުހައްމަދު ޝަފީގު ވަނީ އެ މަގާމުން އިސްތިއުފާ ދެއްވައިފަ އެވެ. އޭނާ އަދި މިހާތަނަށް އެހެން އެއްވެސް މަގާމަކަށް އައްޔަންކޮށްފައެއް ނުވެ އެވެ.