ދުނިޔޭގެ ސުލްހައިގެ އިނާމު އެޓޮމިކް ބޮމުން ސަލާމަތްވި މީހުންގެ ޖަމިއްޔާއަށް

ދެވަނަ ބޮޑު ހަނގުރާމައިގައި ޖަޕާންގެ ހިރޯޝިމާ އާއި ނަގަސާކީއަށް އެމެރިކާއިން ދިން އެޓޮމިކް ބޮމުގެ ހަމަލާއިން ސަލާމަތްވި މީހުންގެ ގްރޫޕަކުން 'ނިހޮން ހިޑަންކްޔޯ' ނަމަކަށް ކިޔާ ޖަމިއްޔާއެއް އުފެއްދި އެވެ.

މި އަހަރުގެ ދުނިޔޭގެ ސުލްހައިގެ އިނާމު ނުވަތަ ނޮބެލް ޕީސް ޕްރައިޒް ލިބޭނީ އެ ގްރޫޕަށް ކަމަށް މިއަދު މިވަނީ އިއުލާންކޮށްފަ އެވެ.

ދުނިޔޭގެ ސުލްހައިގެ އިނާމު ދޭ ނޯވޭޖިއަން ނޮބެލް ކޮމިޓީން ބުނީ ނިހޮން ހިޑަންކްޔޯއަށް އެ އިނާމު ދޭން ނިންމީ ދުނިޔެއިން ނިއުކްލިއަ ހަތިޔާރު ނައްތާލަން މިދިއަ އަހަރުތަކުގައި ކުރަމުން އައި މަސައްކަތަށެވެ.

ނިއުކްލިއަ ހަތިޔާރުގެ ނުރައްކާތެރިކަން އެންމެ ބޮޑަށް އެނގޭނީ 6 އޮގަސްޓް 1945ގައި ހިރޯޝިމާއަށް އެމެރިކާއިން ވައްޓާލި ޔޫރެނިއަމް ބޮމާއި އޭގެ ތިން ދުވަސް ފަހުން ނަގަސާކީއަށް ދިން ނިއުކްލިއަ ހަމަލާއިން ސަލާމަތްވި މީހުންނަށެވެ.

ހިރޯޝިމާގެ ހަމަލާގައި އެކަނި ވެސް 140،000އަށް ވުރެ ގިނަ މީހުން މަރުވި އެވެ.

ބޮން އެޅިތާ ދެ ހަފުތާ ފަހުންނެ ޖަޕާނުން ހަނގުރާމައިން އަމާންދިނެވެ.

ނިހޮން ހިޑަންކްޔޯ އުފެއްދީ އޭގެ 10 އަހަރު ފަހުންނެވެ. އެހާ ހިސާބުން ފެށިގެން ގްރޫޕްގެ މީހުން އަންނަނީ ދުނިޔޭގެ އެކި ހިސާބުތަކަށް ދަތުރުކޮށް ނިއުކްލިއަ ހަތިޔާރުގެ ނުރައްކާތެރިކަން ބުނެދީ އެއާ ދެކޮޅުހަދަން ބާރު އަޅަމުންނެވެ.

ނިހޮން ހިޑަންކްޔޯއިން ވިސްނައިދެނީ އިތުރު ނިއުކްލިއަ ހަމަލާއެއް ދުނިޔޭގެ އެއްވެސް ބަޔަކު ދީގެން ނުވާނެ ކަމަށެވެ.

"މިކަން މިހެން ވެދާނެއެކޭ އަހަރެން ހުވަފެނުން ވެސް ނުދެކެން،" ސުލްހައިގެ އިނާމު ލިބޭކަން އިއުލާންކުރި ފަހުން ޖަޕާންގައި ނޫސްވެރިންނާ ވާހަކަ ދައްކަމުން ޖަމިއްޔާގެ އެއް ބާނީ ޓޮޝިޔުކީ މިމާކީ، ކަރުނައާ އެކު، ބުންޏެވެ.

ނިއުކްލިއަ ހަތިޔާރަކީ ދުނިޔޭގެ ސުލްހައަށް ބޭނުންކުރެވިދާނެ އެއްޗެއްކަމަށް ބައެއް މީހުން ދެކޭތީ އެކަމަށް އޭނާ ފާޑު ވެސް ކިޔެވެ.

"ޓެރަރިސްޓުން ވެސް ނިއުކްލިއަ ހަތިޔާރު ބޭނުންކޮށްފާނެ،" އޭގެ ނުރައްކާތެރިކަން ބުނެދެމުން މިމާކީ ބުންޏެވެ.

ހިރޯޝިމާއަށް އެޓޮމިކް ބޮން އެޅިއިރު މިމާކީގެ އުމުރަކީ އެންމެ ތިން އަހަރެވެ. އެކަމަކު އެ ހަމަލާގައި ފިހުނު އެތައް ބަޔަކު އޭނާގެ ގޭ ކުރިމަތިން ދިޔަ ހަނދާން މިހާރު ވެސް ހުރެ އެވެ.

ނުހޮން ހިޑަންކްޔޯއަށް ދުނިޔޭގެ ސުލްހައިގެ އިނާމު ލިބިދާނެ ކަމަށް ބައެއް މީހުން މީގެ ކުރިން ވެސް އައީ ލަފާކުރަމުންނެވެ. އެގޮތަށް ދެކެން ފެށީ އެ ޖަމިއްޔާގެ ނަން ސުލްހައިގެ އިނާމު ކޮމިޓީން ކުރިން ފާހަގަކުރުމުންނެވެ.

ދުނިޔޭގެ ސުލްހައިގެ އިނާމު ދިނުމުގެ ރަސްމިއްޔާތު އޮންނާނީ ނޯވޭގެ ވެރިރަށް އޮސްލޯގައި ޑިސެމްބަރު މަހު އެވެ. އެއީ ނޮބެލް އިނާމުތަކުގެ ބާނީ އަދި ސައިންސްވެރިޔާ އަލްފްރެޑް ނޮބެލް އަވަހާރަވި ދުވަހާ ދިމާކޮށެވެ.