އިންޑިއާއާ އެކު ގުޅުން ބަދަހިކުރަނީ ކެމްޕޭނުގައި ވެސް ބުނި ގޮތަށް: ރައީސް

މި ސަރުކާރުން އިންޑިއާއާ އެކު ގުޅުން ބަދަހިކުރަމުންދަނީ، މެނިފެސްޓޯ ލޯންޗު ކުރުމާއެކު ފުރަތަމަ ދުވަހު ވެސް އިއުލާނު ކުރެއްވި ހާރިޖީ ސިޔާސަތާ އެއްގޮތަށްކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.

ވީ ކިހިނެއް؟ - އެމަނިކުފާނު މިހެން ވިދާޅުވީ، އިންޑިއާއަށް މިވަގުތު ކުރައްވަމުންދާ ދަތުރުފުޅުގައި ބެންގަލޫރުގައި ދިރިއުޅެމުންދާ ދިވެހިންނާ އެކު މިރޭ ބޭއްވި ބައްދަލުވުމެއްގައި ވާހަކަދައްކަވަމުންނެވެ.

ބުނީ ކީކޭ؟ - "އަޅުގަނޑުމެންނާ އެހެން ގައުމުތަކާ ދޭތެރޭ އޮންނާނީ ކޮން ކަހަލަ ގުޅުމެއްކަން، ހާރިޖީ ސިޔާސަތު އޮންނާނީ ކިހިނެއްކަން އަޅުގަނޑު އެންމެ ފުރަތަމަ ރިޔާސީ އިންތިހާބުގެ ކެމްޕޭނު ފަށަން، މެނިފެސްޓޯ ލޯންޗު ކުރަން ބޭއްވި ޖަލްސާގައި އިއުލާނު ކުރިން،" ރައީސްގެ ވާހަކަފުޅުގައި ވިދާޅުވި އެވެ.

"އެ ސިޔާސަތު އެއީ އަޅުގަނޑު އަބަދުވެސް ކުރިއަށް ގެންދާނެ ސިޔާސަތަކީ."

އެމަނިކުފާނު ފާހަގަކުރެއްވި ގޮތުގައި:

"އެ ސިޔާސަތުގެ މަތިން އެދުވަހުން ފެށިގެން މިއަދާ ހަމައަށް ވެސް، އަދި ކުރިއަށް އޮތްތަނުގައި ވެސް އަޅުގަނޑު މަސައްކަތް ކުރަނީ،" އެކަމާ މެދު އެއްވެސް ދިވެހި ރައްޔިތެއްގެ ހިތުގައި ޝައްކެއް ނުބޭއްވުމަށް އެދިވަޑައިގެން، ރައީސް ޔަގީންކަން ދެއްވި އެވެ.

"އަޅުގަނޑު މަސައްކަތް ކުރާ ގޮތް ފެންނާނެ. ދައްކާ ވާހަކައާ އެއްގޮތަށް ހާރިޖީ ސިޔާސަތު މި ގެންދަނީ. އިންޑިއާ އަކީ އަޅުގަނޑުމެންނާ ވަރަށް ގާތް ގުޅުމެއް އޮތް ބައެއް."

އެއާއެކު، އިންޑިއާ އިން ރާއްޖެއަށް އެހީތެރިވި ހާލަތްތަކުން މިސާލު ނަންގަވައި، ރާއްޖެއާ އިންޑިއާއާ މެދު އޮތް ޒަމާންވީ ގުޅުމުގެ ވާހަކަ އެމަނިކުފާނު ދެއްކެވި އެވެ.

"އެހެންވީމަ، އަޅުގަނޑުމެންގެ ރާއްޖެއަށް، އަޅުގަނޑުމެންގެ ރައްޔިތުންނަށް، އަޅުގަނޑުމެންގެ ގައުމަށް އެކި ކަންކަމުގައި އެންމެ ފަހިވާނެ ގޮތަށް ކަންކަން ބައްޓަން ކުރުމުގައި ދެ ގައުމުގެ ގުޅުން ވަރުގަދަ ވެގެން ދިޔުމަކީ، އަދި އަބަދުވެސް އެގޮތުގައި އޮތުމަކީ ރައްޔިތުންގެ ހައްގުގައި، އަޅުގަނޑު އެދުވަހު [ކެމްޕޭން ލޯންޗު ކުރި ދުވަހު] އިއުލާނު ކުރި ސިޔާސަތުގެ ދަށުން ކުރިއަށް ދާނަމަ، އެކަން އޮންނަންވާނެ ގޮތް،" އަނެއްކާ ވެސް އެމަނިކުފާނު ތަކުރާރު ކުރެއްވި އެވެ.

މި ދަތުރަކީ، ރާއްޖެއިން ކަނޑައެޅި މަގުސަދު ހާސިލްކުރެވުނު ކާމިޔާބު ދަތުރެއްކަން ފާހަގަކުރައްވާ، ރައީސް ވިދާޅުވީ، އިންޑިއާއާ ގުޅިގެން ކުރެވެމުންދާ މަސައްކަތްތަކުން ރާއްޖެއަށް ބޮޑެތި ފައިދާތަކެއް ކުރާނެ ކަމަށެވެ. ދެ ގައުމުގެ ގުޅުން ވަރުގަދަވުމުން މި ސަރަހައްދުގެ އަމާންކަމާ ރައްކާތެރިކަން އިތުރުވާނެ ކަމަށް ވެސް ވިދާޅުވި އެވެ.

އެމަނިކުފާނު އިތުރަށް ވިދާޅުވި ގޮތުގައި:

"އަޅުގަނޑުމެންގެ ގައުމުގައި އިންޑިއާ ސިފައިންނެއް ދެން ނުތިބޭނެ،" އެކަމަށް މިހާރު ދާއިމީ ހައްލެއް އައިސްފައިވާ ކަމަށާއި، އެކަންކަމާ ގުޅުވައިގެން ބައެއް ނޫސްތަކުން ފަތުރަމުންދަނީ ހަގީގަތާ ހިލާފު ވާހަކަތަކެއް ކަމަށް ވެސް އެމަނިކުފާނު ވިދާޅުވި އެވެ. 

މި ދަތުރުގައި ސޮއި ކުރެވުނު މެރިޓައިމް ސެކިއުރިޓީ އެގްރިމެންޓަކީ ސިޔާސަތާ އެއްގޮތަށް ބައްޓަން ކޮށް، އެންމެންނަށް ފެންނަ ގޮތަށް އޮތް އެއްބަސްވުމެއް ކަމަށް ވިދާޅުވި އެވެ. އެހެން ބައެއްގެ އަތް މައްޗަށް ކަންކަން ދޫކޮށްލާ ވާހަކައެއް އޭގައި ނޯންނާނެ ކަމަށް ވިދާޅުވި އެވެ.

"އަޅުގަނޑު އެދިވަޑައިގަންނަވަނީ ހުރިހާ ބޭފުޅުން ވެސް މިކަންކަމުގެ ހަގީގަތް ބައްލަވައިގެން، އަޅުގަނޑުމެންގެ މި ދެގޮތެއް ނުވާ ދެފުށްފެންނަ، އަބަދުވެސް އެންމެ ފުރަތަމަ ދުވަހު އިއުލާނުކޮށްގެން މިއަދާ ހަމައަށް މިއައި ހާރިޖީ ސިޔާސަތުގެ ކަންކަން އަމިއްލަފުޅަށް ދެނެވަޑައިގަތުން،" ރައީސް އެދިވަޑައިގެންނެވި އެވެ.

"އެހެން ބަޔަކު ދައްކާ ވާހަކައަކަށް، އަޅުގަނޑުމެންގެ ގައުމުގެ ކަންކަމުގައި ފިކުރު ނުކުރައްވާ. ހަގީގަތް ސާފުކޮށް ފެންނަން އޮތީ."