ޖުޑީޝަލް ސާވިސް ކޮމިޝަން (ޖޭއެސްސީ): ޖޭއެސްސީން ފަނޑިޔާރުން ވަކިކުރަން ނިންމާ ނިންމުން އިސްތިއުނާފު ނުކުރެވޭ މާއްދާގެ މައްސަަލަ ހައި ކޯޓުން ބަަލަނީ (ދައުރު ފޮޓޯ/އަބްދުﷲ އަނޫފް ޖުނައިދު)
ފަނޑިޔާރުން ވަކިކުރުން އިސްތިއުނާފު ނުކުރެވޭ މައްސަލަ ހައި ކޯޓުން ބަލަނީ
ފަނޑިޔާރުން ވަކިކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމާ ނިންމުންތައް އިސްތިއުނާފު ނުކުރެވޭނެ ކަމަށް ގާނޫނުގައި ބުނާ މާއްދާގެ މައްސަލަ ހައި ކޯޓުން ބެލުމަށް އިއްޔެ ނިންމައިފި އެވެ.
ވީ ކިހިނެއް؟ - ޖޭއެސްސީގެ ގާނޫނުގެ އެ މާއްދާއަކީ ގާނޫނުއަސާސީއާ ހިލާފު މާއްދާއެއް ކަމަށް ބުނެ ހައި ކޯޓަށް ދުސްތޫރީ މައްސަލައެއް ހުށަހެޅުއްވީ ވ. ޖުޑީޝަލް ދާއިރާގެ މެޖިސްޓްރޭޓް އަލީ ނަސީރެވެ. ނަމަވެސް އެ މައްސަލަ ހައި ކޯޓަށް ނުބެލޭނެ ކަމަށް ދައުލަތުން ބުންޏެވެ.
ތަފްސީލް - ދައުލަތުން ހުށަހަޅާފައިވާ އިޖުރާއީ ނުކުތާގައި ފާހަގަކޮށްފައިވަނީ:
-
ފަނޑިޔާރުންގެ މަސްލަހަތު ހިމެނޭ މައްސަލައެއް ކަމަށް ވާތީ އެފަދަ މައްސަލަތައް ފަނޑިޔާރުންނަށް ނުބެލޭނެ
-
އެއްވެސް ބާރެއްގައި ހިމެނޭ މަގާމަކަށް މީހަކު އައްޔަންކުރުމާއި ވަކިކުރުމުގައި ހަމަ އެ ބާރަކަށް ނިންމުމެއް ނިންމުމުގެ އެއްވެސް ދައުރެއް ގާނޫނުއަސާސީން ދީފައެއް ނުވޭ
ކޯޓުގެ ނިންމުން - ހައި ކޯޓުގެ ނިންމުމުގައި ވަނީ އެ މައްސަލައަކީ ދުސްތޫރީ ގޮތުން އުފެދިފައިވާ ސުވާލެއްގެ މައްސަލައެއް ކަމަށެވެ. އޭގައި އެއްވެސް ވަރަކަށް ފަނޑިޔާރުންގެ މަގާމާ ގުޅޭ ނިންމުންތަކަށް ފަނޑިޔާރުން ވަންނަން ޖެހޭ އެއްވެސް ކަމެއް ނެތް ކަމަށް ވެސް ކޯޓުން ނިންމި އެވެ. އެގޮތުން:
-
މައިގަނޑު ބަހުސަކަށް އޮތީ، ފަނޑިޔާރުންގެ އިސްތިއުނާފު މަޖިލީހަށް ވަކިކުރުމުގެ ނިންމުން އިސްތިއުނާފު ނުކުރުމަކީ ހައްގެއް ގެއްލުންކަން ނުވަތަ ނޫންކަން
-
ފަނޑިޔާރުންގެ އިސްތިއުނާފު މަޖިލީހަކީ ޖޭއެސްސީގެ ގާނޫނުން އުފައްދާފައިވާ ގާނޫނީ ޝަހުސެއް
-
މީގައި ކޯޓުން ބަސް ބުނުމުގެ ފުރުސަތު ފަހިވާނެ ކަމަށް ބުނާ ބުނުމަކީ ގަބޫލު ކުރެވޭ ބުނުމެއް ނޫން
-
އެއްވެސް ފަނޑިޔާރަކަށް އެފަދަ މައްސަލަތައް ނުބެލޭނެ ކަމަށް ނިންމައިފި ނަމަ ހައްގު ހޯދުމަށްޓަކައި މައްސަލަ ހުށަހަޅާނެ އެހެން މުއައްސަސާއެއް ނެތިދާނެ
ހައި ކޯޓުން މި އިޖުރާއީ ނިންމުން ނިންމީ ފަސް ފަނޑިޔާރުންގެ ބެންޗަކުން، ހުރިހާ ފަނޑިޔާރުންގެ އިއްތިފާގުންނެވެ. އެ ބެންޗުގައި ތިއްބެވީ:
-
1-
ފާތިމަތު ފަރުހީޒާ (ރިޔާސަތު)
-
2-
ހުސައިން ޝަހީދު (ހައި ކޯޓުގެ އިސް ފަނޑިޔާރު)
-
3-
މުހައްމަދު ފައިސަލް
-
4-
ހުސައިން މަޒީދު
-
5-
ހުޒައިފާ މުހައްމަދު
އެނގުން މުހިންމު - ފަނޑިޔާރުން ވަކިކުރަން ޖޭއެސްސީން ނިންމާ ނިންމުންތައް އިސްތިއުނާފު ނުކުރެވޭ ގޮތަށް ގާނޫނަށް ބަދަލު ގެނައީ 2019 ވަނަ އަހަރު، މިދިޔަ 19 ވަނަ ރައްޔިތުންގެ މަޖިލީހުންނެވެ.