ފުލުހުންތަކެއް: ފުލުހުން ބުނީ މިދިޔަ މަހު ރިޕޯޓްކޮށްފައިވާ ކުށުގެ އަދަދު ކުރީ މަހާ އަޅާބަލާއިރު މަދު ކަމަށް. (ދައުރު ފޮޓޯ/ އަބްދުﷲ އަނޫފް ޖުނައިދް)
މަގުތަކަށް ނުކުތުމުން ކުށް މަދުވެއްޖެ: ފުލުހުން
ފުލުހުން މަގުތަކަށް ނުކުމެ ފްރޮންޓްލައިންގައި މަސައްކަތް ކުރަން ފެށުމުން ކުށް މަދުވެފައިވާ ކަމަށް ފުލުހުން މިއަދު ބުނެފި އެވެ.
ވީ ކިހިނެއް؟ - ފުލުހުން މިއަދު ވަނީ މިދިޔަ އޯގަސްޓް މަހާއި މިދިޔަ މަހު ރިޕޯޓްކޮށްފައިވާ ކުށްތަކުގެ ތަފާސްހިސާބު އާންމުކޮށްފަ އެވެ.
ތަފްސީލް - ފުލުހުންގެ ތަރުޖަމާނު، އެސިސްޓަންޓް ކޮމިޝަނާ އޮފް ޕޮލިސް އަހުމަދު ޝިފާން އެ ތަފާސްހިސާބުތައް 'އެކްސް'ގައި ޕޯސްޓުކުރައްވަމުން ވިދާޅުވީ ވަށްކަމާއި ފޭރުމާއި އެހެނިހެން ކުށްތައް ވެސް މިދިޔަ މަހު މަދުވެފައިވާ ކަމަށެވެ. އެއީ މަގުތަކަށް ފުލުހުން ނުކުމެ ކުރާ މަސައްކަތްތަކުގެ ހެޔޮ ނަތީޖާކަން އޭނާ ފާހަަގަކުރެއްވި އެވެ.
އެ ތަފާސްހިސާބުތަކުން ދައްކާ ގޮތުގައި:
-
ވައްކަމުގެ 327 މައްސަލަ އޮގަސްޓް މަހު ރިޕޯޓްކޮށްފައިވޭ، މިދިޔަ މަހު އެ އަދަދު ހުރީ 230ގައި
-
ފޭރުން: އޮގަސްޓްގައި 46 މައްސަލަ؛ މިދިޔަ މަހު 32 މައްސަލަ
-
އެކްސިޑެންޓް: އޮގަސްޓުގައި 204 މައްސަލަ؛ މިދިޔަ މަހު 143 މައްސަލަ
-
މަސްތުވާތަކެތި: އޮގަސްޓުގައި 134 މައްސަލަ؛ މިދިޔަ މަހު 111 މައްސަލަ
Statistics show a reduction in theft, robbery, and overall crime in the Maldives during September compared to August. The new initiatives in Local Frontline Policing, implemented under the Strategic Plan, are yielding positive results. pic.twitter.com/vLn41CPAUp
— Ahmed Shifan (@Shifan4040) October 1, 2024
އެނގުން މުހިންމު - މަގުމައްޗަށް ނުކުމެ އުޅޭއިރު ކޮންމެ 5 މިނެޓަކުން ފުލުހަކު ފެންނާނެ ގޮތަށް އުސޫލު ބަދަލުކުރަން ނިންމާފައިވާ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވަނީ މި ހަފްތާގައި ވިދާޅުވެފަ އެވެ.
މިހާރު ޓްރޭނިން ހަދަމުން އަންނަ ފުލުހުން ޓްރޭނިން ނިމުމުން ފްރޮންޓް ލައިންގައި ހިދުމަތްދީ، ދުވާލުގެ ބޮޑު ބައެއްގައި ފުލުހުން އެގޮތަށް މަގުތަކުގައި ހަރަކާތްތެރިވާނެ ކަމަށް އޭނާ ވިދާޅުވެފައިވެ އެވެ.
އޭގެ އިތުރުން، ޝުޖާއު ވިދާޅުވީ:
-
މަގުތަކުގެ ބާރު ބޮޑުވާ ޕީކް ގަޑިތަކުގައި މާލެއަށް ބެލި ކަމުގައި ވިޔަސް 21 ސަރަހައްދެއްގައި ފުލުހުން ހަރަކާތްތެރިވަމުން ގެންދާނެ
-
އެ މަސައްކަތްތައް މޮނިޓާކޮށް ވިލަރެސް ކުރުމަށް ޒަމާނީ ކޮމިއުނިކޭޝަން ސެންޓަރެއް މާލެ އަދި ހުޅުމާލޭގައި ގާއިމްކޮށްފައިވާނެ؛ އެ ސެންޓަރުގައި ސީނިއާ ފުލުހަކު 24 ގަޑިއިރު ޑިއުޓީ ކުރަމުން ގެންދާނެ
-
އޭރުން ފުލުހުން ހަރަކާތެރިވަމުން އަންނަ ސީދާ ސަރަހައްދު އެ ސެންޓަރުން ވަގުތުން ބަލައިލެވޭނެ
-
ފުލުހުންގެ މަސައްކަތްތަކަށް ބޭނުންވާ މައުލޫމާތު ޓެކްނޮލޮޖީގެ އެހީގައި މި ސެންޓަރުގައި ވަގުތުން އެއްކޮށް، އެނަލައިޒް ކުރެވޭނެ
ޝުޖާއު ވިދާޅުވީ މަސްތުވާތަކެއްޗާއި ގޭންގު ކުށްތައް ހުއްޓުވަން ވެސް ގިނަ ކަންތައްތަކެއް ކުރަމުން އަންނަ ކަމަށެވެ. އެގޮތުން:
-
ގޭންގް ކުށްތަކާ ދެކޮޅަށް މަސައްކަތް ކުރުމަށް ވަކިން ހާއްސަ ވިންގެއް ގާއިމްކޮށްފައިވޭ
-
މިހާރު ފަށާފައިވާ މަސައްކަތްތަކުގެ ތެރެއިން މާލެ އާއި ހުޅުމާލޭގައި ގޭންގްތައް ހަރަކާތްތެރިވާ ސަރަހައްދުތަކުގައި ސްޓެޓިކްކޮށް ފުލުހުން ތިބެގެން ބަލަހައްޓަމުން ގެންދާނެ
-
އެ މަސައްކަތްތައް ހަރުދަނާ ކުރުމަށް ގޭންގް ކުށްތަކާ ދެކޮޅަށް މަސައްކަތްކުރާ ބަޔާއި މަސްތުވާތަކެއްޗާ ދެކޮޅަށް މަސައްކަތް ކުރާ ބައިގެ އިސް ފުލުހަކު ކޮމިއުނިކޭޝަން ސެންޓަރުގައި މަސައްކަތް ކުރާނެ
-
މާލެ އާއި ހުޅުމާލޭގެ އާންމު ހާލަތު ވެސް ސީދާ މޮނިޓާކޮށް، ދިމާވާ އެކި ކަންކަމަށް ރިއާޔަތްކޮށް، ނިންމަން ޖެހޭ ނިންމުންތައް ވަގުތުން ވަގުތަށް ނިންމުމުގައި މިހާރު އަވަސް ވާނެ
ގުޅުން ހުރި - މާލެ ސަރަހައްދުގައި މި ފަހުން ކައިރިކައިރީ ނުރައްކާތެރި އެކްސިޑެންޓުތައް ހިނގާފައިވާތީ، މަގުމަތި ރައްކާތެރިކުރުމުގެ މަސައްކަތްތައް ހަރުދަނާކުރަން ޓެކްނިކަލް ކޮމިޓީއެއް އުފައްދަން ޓްރާންސްޕޯޓު މިނިސްޓްރީން ނިންމި އެވެ.
މީގެ އިތުރުން، އެންމެ ގިނައިން އެކްސިޑެންޓްތައް ހިނގާ ސަރަހައްދުތަކުގައި ފުލުހުން 24 ގަޑިއިރު ފޯރި މަރަން ވެސް ވަނީ ނިންމައިފަ އެވެ.
ކޮމެންޓް (2)
ސަމީރު
ނޯވަން