ސައުދި އަރަބިއްޔާއާ އެކު ވިޔަފާރީގެ އެއްބަސްވުމުގައި ސޮއިކުރަން އިއްޔެ އެ ގައުމުގެ ރިޔާދުގައި ބޭއްވި ރަސްމިއްޔާތުގެ ތެރެއިން. (ފޮޓޯ/އިކޮނޮމިކް މިނިސްޓްރީ)
ރާއްޖޭން ސައުދީއާ އެކު ވިޔަފާރީގެ އެމްއޯޔޫއެއްގައި ސޮއިކޮށްފި
ރާއްޖޭން ސައުދީ އަރަބިއްޔާއާ އެކު ވިޔަފާރީގެ އާ އެމްއޯޔޫއެއްގައި އިއްޔެ ސޮއިކޮށްފި އެވެ.
ވީ ކިހިނެއް؟ - މި އެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދު މިހާރު ސައުދީއަށް ކުރައްވަމުން ގެންދަވާ ދަތުރުގަ އެވެ.
ތަފްސީލް - އެ އެއްބަސްވުމާ ގުޅޭ ގޮތުން އިކޮނޮމިކް މިނިސްޓްރީން މިއަދު ނެރުނު ބަޔާނެއްގައި ބުނީ މި އެއްބަސްވުމުގެ ދަށުން ދެ ގައުމުގެ ވިޔަފާރީގެ ގުޅުން މިހާރަށް ވުރެ ކުރިއަރައި އިންވެސްޓްމެންޓް ފުރުސަތުތައް ލިބިގެންދާނެ ކަމަށެވެ. އޭގެ ތެރޭގައި:
-
ވިޔަފާރީގެ ދާއިރާ ކުރިއެރުވުން
-
ފަތުރުވެރިކަމުގެ ދާއިރާ މިހާރަށް ވުރެ ކުރިއަރުވަން ފުރުސަތުތައް ހޯދައިދިނުން
-
ތަރައްގީގެ މަޝްރޫއުތަކަށް އެހީތެރިކަން ފޯރުކޮށްދިނުން
މި އެއްބައްވުމުގައި ސޮއިކުރެއްވުމަށް ފަހު އެ ގައުމުގެ ކޮމާސް މިނިސްޓަރު އަދި ފޮރިން ޓްރޭޑް އޮތޯރިޓީގެ ޑިރެކްޓަރުންގެ ބޯޑުގެ ޗެއާމަން ޑރ. މަޖީދް ބިން އަބްދޫﷲ އަލްކައްސާބީއާ ވާހަކަދައްކަވަމުން ސައީދު ވިދާޅުވީ މި އެއްބަސްވުމަކީ ދެ ގައުމުގެ ދެމެދުގައި އޮތް އެކުވެރިކަމުގެ ގުޅުން ދައްކައިދޭ ކަމެއް ކަމަށެވެ.
އެނގުން މުހިންމު - ފިނޭންސް މިނިސްޓަރު މޫސާ ޒަމީރު މިދިޔަ އޯގަސްޓު މަހު ވަނީ ސައުދީއަށް ރަސްމީ ދަތުރެއް ކުރައްވާފަ އެވެ.
ފޮރިން މިނިސްޓަރަކަށް ހުންނެވިއިރު ޒަމީރު ކުރެއްވި އެ ދަތުރުގައި ސައުދީގެ ގަވަރަނަރު އައިމަން އަލް ސަޔާރީއާ ބައްދަލުކުރައްވައި ރާއްޖެއަށް ކުރިމަތިވެފައިވާ ދަރަނީގެ ގޮންޖެހުންތައް ނައްތާލުމަށްޓަކައި ވިޔަފާރީގެ ގުޅުން ފުޅާކުރުމުގެ ފުރުސަތުތަކާ ބެހޭ ގޮތުން މަޝްވަރާކުރައްވާފައިވެ އެވެ.