ޒަމީރު މާލީ ވަޒީރަކަށް ހަމަޖައްސައި ހަލީލް ހާރިޖީ ވަޒީރު ކަމަށް އައްޔަންކޮށްފި

ފިނޭންސް މިނިސްޓަރަކަށް ފޮރިން މިނިސްޓަރު މޫސާ ޒަމީރު ހަމަޖައްސައި ފޮރިން މިނިސްޓަރަކަށް މިހާރުގެ ހެލްތް މިނިސްޓަރު ޑރ. އަބްދުﷲ ހަލީލު ރައީސް މުހައްމަދު މުއިއްޒު މިއަދު ބަދަލުކުރައްވައިފި އެވެ. 

ފާހަގަކޮށްލެވޭ - މިއީ ރައީސް މުއިއްޒުގެ ކެބިނެޓަށް ގެނައި ފުރަތަމަ ބަދަލެވެ. 

ވީ ކިހިނެއް؟ - އެ ބަދަލުތައް ގެންނަން ނިންމާފައި ވަނީ މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގައިކަން ކަށަވަރުވެފައިވެ އެވެ.

ތަފްސީލް - ހެލްތް މިނިސްޓަރަކަށް މިހާރު ރައީސް އޮފީހުގެ މިނިސްޓަރު އަދި ކުރީގެ ހެލްތް މިނިސްޓަރު އަބްދުﷲ ނާޒިމް ވަނީ ހަމަޖައްސައިފަ އެވެ. 

އާ ވަޒީރުން ހުވާކުރުމުގެ ރަސްމިއްޔާތު އޮތީ މިއަދު މެންދުރުފަހު ރައީސް އޮފީހުގަ އެވެ. 

ފިނޭންސް މިނިސްޓަރަކަށް ހުންނެވި ޑރ. މުހައްމަދު ޝަފީގު ހަމަޖައްސަނީކޮން މަގާމަކަށް ކަމެއް އަދި ސާފެއް ނުވެ އެވެ. 

އެ ނިންމުންތަކާ އެކު މާލީ ވަޒީރަކަށް ހުންނެވި ޑރ. މުހައްމަދު ޝަފީގު ވަނީ އެ މަގާމުން އިސްތިއުފާދެއްވައިފަ އެވެ.