މޮބައިލް ބޭންކިންގެ ހިދުމަތް މީހަކު ބޭނުންކުރަނީ: ފޭކް ޓްރާންސްފާ ސްލިޕް އުފައްދަން އެޕްލިކޭޝަނެއް ބޭނުންކުރާކަން ފުލުހުންނަށް ވަނީ ފާހަގަކުރެވިފައި. (ފޮޓޯ/ބީއެމްއެލް)
އެޕަކުން ފޭކު ސުލިޕް ހަދައިގެން ވިޔަފާރިކުރުން އާންމުވެއްޖެ؛ ސަމާލުވޭ
އެޕްލިކޭޝަނެއް ބޭނުންކޮށްގެން ސައްހަ ނޫން ޓްރާންސްފާ ސްލިޕް ހަދައިގެން ވިޔަފާރި ކުރަމުންދާކަން ފުލުހުންނަށް ފާހަގަކުރެވިގެން އެ ކަމަށް ސަމާލުވުމަށް އެ އިދާރާއިން މިއަދު އެދިއްޖެ އެވެ.
ވީ ކިިހިނެއް؟ - ބޭންކު ޓްރާންސްފާގެ ސައްހަ ނޫން ސްލިޕް ބޭނުންކޮށްގެން ވިޔަފާރިކުރާ މައްސަލަތައް ފުލުހަށް ހުށަހެޅޭ މިންވަރު އިތުރުވަމުންދާކަން ފާހަގަކޮށް، ފުލުހުންގެ ރަސްމީ ވެބްސައިޓުގައި ވަނީ މިއަދު ބަޔާނެއް ނެރެފަ އެވެ.
ކީކޭ ބުނީ؟ - ފުލުހުން ބުނި ގޮތުގައި، މި ގޮތަށް އޮޅުވާލައިގެން ސައްހަ ނޫން ޓްރާންސްފާ ސްލިޕްތައް ފޮނުވާ ފަރާތްތަކުން އެ ތަކެތި ހަދަނީ ހާއްސަ އެޕްލިކޭޝަނެއް ބޭނުންކޮށްގެންކަން، ފުލުހުންގެ ތަހުގީގަށް ވަނީ ފާހަގަކުރެވިފަ އެވެ.
"ހާއްސަކޮށް، ރެސްޓޯރަންޓުތަކާއި ފިހާރަތަކުން ވިޔަފާރި ކުރުމަށް ފަހު އަގު ދެއްކުމުގެ ގޮތުން މިފަދަ ސްލިޕްތައް ފޮނުވާކަން ވަނީ ފާހަގަކުރެވިފަ އެވެ،" ފުލުހުންގެ ވެބްސައިޓުގައި ލިޔެފައިވެ އެވެ.
މިފަދަ މައްސަލަތަކުން ރައްކާތެރިވުމަށްޓަކައި، ފުލުހުން އެދިފައިވަނީ:
-
އެކައުންޓަށް ފައިސާ ޖަމާވިކަން ޔަގީން ކުރުމަށް ފަހު ނޫނީ ފައިސާގެ އެއްވެސް މުއާމަލާތެއް ނުހިންގުމަށް
-
މިފަދަ ކަމެއްގެ ޝިކާރައަކަށް ވެއްޖެ ނަމަ، ލަސްނުކޮށް ފުލުހުންނަށް ރިޕޯޓުކުރުމަށް
-
އޮންލައިންކޮށް ހިންގާ ވިޔަފާރީގެ މުއާމަލާތްތަކުގައި ވެސް އިތުރަށް ސަމާލުވުމަށް
ކޮމެންޓް