ބާ ކައުންސިލްގެ ހިންގާ ކޮމިޓީގެ ބައެއް ބޭފުޅުން: ބާ ކައުންސިލްގެ ހިންގާ ކޮމިޓީގައި ހުސްވި މަގާމަށް ތަރުހީބު ކުޑަ - (ފޮޓޯ/ ބާ ކައުންސިލް)
ބާ ކައުންސިލަށް މި ފަހަރު ވެސް ތަރުހީބު ކުޑަ؛ ކުރިމަތިލާން މުއްދަތު އިތުރުކޮށްފި
ހަމައެކަނި ގާނޫނީ ވަކީލުން އިންތިހާބުކުރާ މެންބަރުން ހިމެނޭ ގޮތަށް ބާ ކައުންސިލް ބަދަލުކޮށް، ހިންގާ ކޮމިޓީގައި ހުސްވެފައިވާ މަގާމަށް ކުރިމަތިލާން ހުޅުވާލި މުއްދަތު އަނެއްކާ ވެސް އިތުރުކޮށްފި އެވެ.
ވީ ކިހިނެއް؟ - ބާ ކައުންސިލްގެ ހިންގާ ކޮމިޓީގައި ކުރިން ހިމެނުނު ބަންޑާރަ ނައިބުގެ ބަދަލުގައި ވަކީލުން އިންތިހާބުކުރާ ވަކީލެއް ހިމަނާ ގޮތަށް ވަނީ ގާނޫނު ބަދަލުކޮށްފަ އެވެ. ނަތީޖާއެއްގެ ގޮތުން:
-
މިދިޔަ ހަފުތާގައި ހަފުތާއެއްގެ މުއްދަތު ދީފައި ހުސްކޮށް އޮތް މަގާމަށް ކުރިމަތިލާން ހުޅުވާލި، އެ މުއްދަތު އިއްޔެއަށް ހަމަވި
-
މުއްދަތަށް އިތުރު ދެ ހަފުތާ ހިމެނުމަށް ބާ ކައުންސިލުން ނިންމައި އިއްޔެ އިއުލާންކުރި، މުއްދަތު ދެން ހަމަވާނީ އަންނަ މަހު 9 އަށް
ކީކޭ ބުނީ؟ - ބާ ކައުންސިލްގެ ރައީސް ހުސައިން ސިރާޖު 'ދައުރު'އަށް ވިދާޅުވީ، އިތުރު ދެ ހަފުތާގެ މުއްދަތެއް ހިމެނުމަށް ނިންމީ ހިންގާ ކޮމިޓީއަށް ގަބޫލު ކުރެވޭ ފަދަ އެކަށޭނަ އަދަދަކަށް ވަކީލުން ކުރިމަތިލާން ހުށަހަޅާފައި ނެތުމުން ކަމަށެވެ.
"މަގާމަށް ކުރިމަތިލެވެން އޮތް ކަން އިތުރަށް އިޝްތިހާރުކޮށްގެން، މި ހުރިހާ ކަމަކަށް ވަގުތު ލިބޭ ގޮތަށް މި ހަމަޖެއްސީ،" ސިރާޖު ވިދާޅުވި އެވެ.
ނަމަވެސް ކުރިން ހުޅުވާލި މުއްދަތުގައި ކުރިމަތިލީ ކިތައް ވަކީލުންކަން ސިރާޖު ވިދާޅެއް ނުވެ އެވެ. އެގޮތުން:
-
ހިންގާ ކޮމިޓީގައި ހުސްވި މެންބަރުގެ މަގާމަށް އިންތިހާބު ބާއްވަނީ އަންނަ މަހުގެ 21ގައި
-
ހިންގާ ކޮމިޓީއަށް ކުރިމަތިލާން 5000 ރުފިޔާގެ ފީއެއް ދައްކަން ޖެހޭ
-
ހިންގާ ކޮމިޓީއަށް ކުރިމަތިލެވޭނީ، ފަސް އަހަރުގެ ތަޖުރިބާ ހުންނެވި ބޭފުޅުންނަށް
ފާހަގަކޮށްލެވޭ - ބާ ކައުންސިލް ވުޖޫދުވެގެން އައި އިރު، އެ ކައުންސިލްގެ ހިންގާ ކޮމިޓީއަށް ކުރިމަތިލުމުގެ ޝައުގު ބޮޑެވެ. ކޮންމެ މަގާމެއް ވެސް އޭރު ވާދަވެރިކަމެއް އޮތެވެ. ނަމަވެސް އޭގެ އެއް ދައުރު ފުރިހަމަވި ފަހުން ކުރިން އޮތް ވަރަށް ޝައުގުވެރިކަމެއް ނެތެވެ.
-
ދެވަނަ ދައުރަށް ރައީސް ކަމަށް ދެ ބޭފަޅަކު ކުރިމަތިލެއްވުން ފިޔަވައި ދެން ތިބި މަގާމުތަކަށް ވާދަވެރިކަމެއް ނެތް
-
ހިންގާ ކޮމިޓީގެ ހަ މެންބަރުންނަށް ފުރަތަމަ ކުރިމަތިލީ ފަސް ބޭފުޅުން، ނައިބު ރައީސަށް އެންމެ ބޭފުޅެއް
-
ބާ ކައުންސިލްގެ ކުރީގެ ރައީސް އިސްމާއީލް ވިޝާމް އަވަހާރަވި ފަހުން، ބޭއްވި އިންތިހާބުގައި ރައީސް ކަމަށް ކުރިމަތިލެއްވީ ދެ ބޭފުޅުން
އެނގުން މުހިންމު - ވަކީލުން ރެގިއުލޭޓް ކުރުމުގެ ކަންކަން ވަކީލުންނަށް ދޫކޮށްލުމަކީ އަބަދުވެސް ގާނޫނީ ފަންނުގެ ދާއިރާގެ ބޭފުޅުން ވަކާލާތު ކުރައްވަމުން ގެންދެވި ކަމެކެވެ. އެ ވަކާލާތުގެ ތެރެއިން ބާ ކައުންސިލް ވުޖޫދު ކުރީ 2019ގަ އެވެ.
ބާ ކައުންސިލްގައި އޭރު ހިމަނާފައިވާ ބަންޑާރަ ނައިބު އުނިކުރުމަށް މި ސަރުކާރުން ފޮނުވި އިސްލާހުގެ މަގުސަދުގައި ވެސް ބުނެފައިވަނީ ވަކީލުން އިންތިހާބު ކުރާ ބަޔަކަށް ވަކީލުން ރެގިއުލޭޓް ކުރުމުގެ ފުރުސަތު ފުރިހަމައަށް ދިނުން ކަމަށެވެ.
ފަސް މަންޒަރު - ބާ ކައުންސިލް ވުޖޫދު ކުރުމުގެ ކުރިން ވަކީލުންގެ ކަންކަން ބަލަހައްޓަމުން ގެެންދިޔައީ ސުޕްރީމް ކޯޓުންނެވެ. ސުޕްރީމް ކޯޓުގެ ކުރިން، ބަންޑާރަ ނައިބުގެ އޮފީހުން ވެސް ވަކީލުން ރެގިއުލޭޓް ކޮށްފައިވެ އެވެ.