ޕޮލިސް އާދަމް ހަލީމް މަރާލި ކަމަށް ދައުވާކޮށްފައިވާ ސަމާހު، ކުރިން ބޭއްވި ޝަރީއަތުގެ މަޖިލީހެއްގައި (ފޮޓޯ: ސުޕްރީމް ކޯޓު ވީޑިއޯ ސްކްރީން ޝޮޓް)
ކާށިދޫގައި ފުލުހަކު މަރާލުން: މަރުގެ ހުކުމް ބާތިލްކޮށް މައްސަލަ އަލުން ފަށަން ސުޕްރީމް ކޯޓުން ހުކުމްކޮށްފި
މީގެ 10 އަހަރު ކުރިން ކ. ކާށިދޫގައި ޑިއުޓީއަށް ނުކުމެ ހުއްޓައި ވަޅިއަކުން ހަމަލާދީ، ޕޮލިސް އާދަމް ހަލީމް މަރާލި މައްސަލާގައި މުހައްމަދު ސަމާހު މެރުމަށް ކޮށްފައިވާ ހުކުމް ބާތިލްކޮށް، ކްރިމިނަލް ކޯޓުގައި އަލުން ޝަރީއަތް ފެށުމަށް ސުޕްރީމް ކޯޓުން މިއަދު ހުކުމްކޮށްފި އެވެ.
މައްސަލައިގެ ފެށުން - މި ހާދިސާ ހިނގީ 23 ޖުލައި 2012 ގަ އެވެ. މި މައްސަލާގައި ތުހުމަތުވާ ފަރާތަކީ މުހައްމަދު ސަމާހު، ކ. ކާށިދޫ، ސުވާސާގެ މައްޗަށެވެ. އަދި ކްރިމިނަލް ކޯޓުންނާއި ހައި ކޯޓުން ވެސް އޭނާގެ މައްޗަށް ކުށް ސާބިތުވާ ކަމަށް ހުކުމްކޮށްފައިވެ އެވެ. އެ ގޮތުން:
-
ސަމާހު މެރުމަށް ކްރިމިނަލް ކޯޓުން ހުކުމް ކުރީ 2013 ވަނަ އަހަރު
-
ހައި ކޯޓުން އެ ހުކުމް ދެމެހެއްޓީ 30 ސެޕްޓެމްބަރު 2020ގައި
ވީ ކިހިނެއް؟ - ހައި ކޯޓުގެ ހުކުމް ސުޕްރީމް ކޯޓުގައި އިސްތިއުނާފުކުރީ ސަމާހުގެ ފަރާތުންނެވެ. ކުރިން ކުށަށް އެއްބަސްވީ ފުލުހުން ބިރު ދައްކައިގެން ކަމަށް އޭނާ ތުހުމަތުކޮށްފައިވެ އެވެ.
އާދަމް ހަލީމަށް ބިރު ދައްކަން ވަޅިއެއް ހިފައިގެން ސަމާހު ދިޔައީ މަސްތުގެ ހާލަތުގައި ކަމަށް އޭނާ ބުނެފައިވެ އެވެ. އަދި އެއީ އާދަމް ހަލީމް މަރާލުމުގެ ގަސްތާއި ނިޔަތް އޮވެގެން އޭނާ ކުރި ކަމެއް ނޫން ކަމަށް ވެސް ބުންޏެވެ.
ތަފްސީލް - މިއަދު ސުޕްރީމް ކޯޓުގައި ހުކުމް ކުރުމަށް ބޭއްވި އަޑުއެހުމުގައި، ރިޔާސަތުގައި އިންނެވި ފަނޑިޔާރު ހުސްނުއްސުއޫދު ވިދާޅުވީ، ސަމާހު ކުރި ކުށަށް އެއްބަސްވީ މަޖުބޫރު ކަމެއް އޮވެގެން ކަމަށް އޭނާ ބުނާ ބުނުމަށް ބުރަދަން ދޭން ޖެހޭ ކަމަށެވެ.
ފަނޑިޔާރު ސުއޫދުގެ ރައުޔުގައި ފާހަގަކޮށްފައިވާ ކަންކަމަކީ:
-
ކުށުގެ އިއުތިރާފަކީ އިތުބާރުވެވޭ އިއުތިރާފެއް ބަލަން، އޭނާއަށް އެއްވެސް މަޖުބޫރު ކަމެއް އައިސްފައިވޭތޯ ބަލަން ޖެހޭނެ ކަމަށް.
-
ފުލުހުން ސަމާހަށް ސުވާލުކޮށްފައިވާ ގޮތާއި، ޒާތާއި، ހާލަތާއި، ތޮބީއަތާއި، ތަހުގީގަށް ގެންގުޅުނު ވައްޓަފާޅިއަށް ބެލިދާނެ ކަމަށް.
-
ހަނު ހުރުމުގެ ހައްގު ބޭނުންކޮށް، ގާނޫނީ ވަކީލެއްގެ އެހީތެރިކަމަށް އެދެފައިވަނިކޮށް، ކުއްލިއަކަށް އެ ހައްގުތައް ދޫކޮށްލީ ފުލުހުން ދިން އިރުޝާދަކުން ކަމަށް ބެލުމުގެ ފުރުސަތު އެބަ އޮތް ކަމަށް.
-
މި ހާލަތުގައި ސަމާހުގެ ބަހަށް ބުރަދަން ދޭން ޖެހޭ ކަމަށް. އަދި ސަމާހުގެ އިއުތިރާފު ކޯޓަށް ބަލައިގަނެވޭނީ އެއަށް ބާރު ދޭ އިތުރު ހެކި/ގަރީނާ ހުރި ނަމަ ކަމަށް.
-
ހަމައެކަނި އިއުތިރާފަށް ބަލައިގެން މައްސަލަ ނިންމާފައިވާތީ އިތުުރު ހެކި/ގަރީނާ ހުރި ވަރު ވަޒަން ކުރެވިފައި ނުވާ ކަމަށް.
ފަނޑިޔާރު ސުއޫދުގެ ރައުޔަށް ދެން ތިއްބެވި ފަނޑިޔާރުން ތާއީދު ކުރެއްވި އެވެ. ފަނޑިޔާރުންގެ އިއްތިފާގުން ހުކުމްކުރެއްވީ:
-
ކްރިމިނަލް ކޯޓުގައި އަލުން ޝަރީއަތް ފަށާއިރު، ސަމާހަށް އަނިޔާކުރި ކަން އެނގޭނެ ކަމަށް އޭނާ ބުނާ ހެކިން ހާޒިރުކޮށް ހެކިބަސް ނެގުމުގެ ފުރުސަތު ދިނުމަށް.
-
އިއުތިރާފަށް ބާރުދެވޭ އިތުރު ހެކި/ގަރީނާ ހުރި ކަމަށް ދައުލަތުން ބުނާތީ، ދައުލަތަށް އެ ހެކިތައް ހުށަހެޅުމުގެ ފުރުސަތު ދިނުމަށް.
މި މައްސަލަ ސުޕްރީމް ކޯޓުގައި ބައްލަވަނީ ފަސް ފަނޑިޔާރުންގެ ބެންޗަކުންނެވެ.
-
1-
ފަނޑިޔާރު ހުސްނުއްސުއޫދު (ރިޔާސަތު)
-
2-
ފަނޑިޔާރު ޑރ. އަޒްމިރަލްދާ ޒާހިރު
-
3-
ފަނޑިޔާރު އައިޝާ ޝުޖޫން މުހައްމަދު
-
4-
ފަނޑިޔާރު މަހާޒް އަލީ ޒާހިރު
-
5-
ފަނޑިޔާރު ޑރ. މުހައްމަދު އިބްރާހީމް
ކޮމެންޓް (1)
އާދަމް