ސުޕްރީމް ކޯޓުގެ ކުރީގެ ފަނޑިޔާރު އަދި ސްޓޭޓް މިނިސްޓަރު އާދަމް މުހައްމަދު (ފޮޓޯ/ ހޯމް މިނިސްޓްރީ)
ސްޓޭޓް މިިނިސްޓަރު އާދަމް މުހައްމަދަށް އަނެއްކާ ވެސް ހައި ކޯޓު ފަނޑިޔާރުންގެ ނުރުހުން
ހޯމް މިނިސްޓްރީގެ ސްޓޭޓް މިނިސްޓަރު އަދި ސުޕްރީމް ކޯޓުގެ ކުރީގެ ފަނޑިޔާރު އާދަމް މުހައްމަދަށް އަނެއްކާ ވެސް ހައި ކޯޓުގެ ޝަރީއަތެއްގައި ފަނޑިޔާރުން ފާޑުވިދާޅުވެއްޖެ އެވެ.
މައްސަލައިގެ ފެށުން - ލ. އަތޮޅު ފޮނަދޫ ކައުންސިލާއި އަމިއްލަ ފަރާތަކާ ދެމެދު ވެފައިވާ ކޮންޓްރެކްޓް އެއްބަސްވުމާ ގުޅިގެން އުފެދުނު ހިލާފެއްގެ މައްސަލައެއްގައި، ހައި ކޯޓުގައި ހިނގާ ޝަރީއަތުގައި އާދަމް މުހައްމަދު ތަމްސީލްކުުރައްވަނީ ފޮނަދޫ ކައުންސިލެވެ.
ފުރަތަމަ އަޑުއެހުމުގައި ކަން ހިނގައިދިޔަ ގޮތަކީ:
-
އިސްތިއުނާފު ނުކުތާތައް ހުށަހަޅުއްވަން 40 މިނެޓަށް ވުރެ ގިނަ ވަގުތު ހޭދަވުން.
-
އާދަމް މުހައްމަދު ނުކުތާތައް ހުށަހެޅުއްވީ، ކޯޓަށް ހުށަހަޅުއްވާފައިވާ ލިޔުމަށް ބައްލަވައިގެން އޭގައިވާ އެއްޗެއް އަކުރުން އަކުރަށް.
-
ގިނަ ވަގުތު ހޭދަވާ ގޮތަށް ނުކުތާތައް ހުށަހެޅުއްވުމުން، މައްސަލަ ބައްލަވާ ފަނޑިޔާރުންގެ ބެންޗުން ވަރަށް ބޮޑަށް ނުރުހުން ފާޅުކުރެއްވި.
ވީ ކިހިނެއް ؟ - އެ މައްސަލާގައި މިއަދު ބޭއްވި އަޑުއެހުމުގައި ކުރިއަށް ގެންދިޔައީ އިސްތިއުނާފު ރައްދުވާ ފަރާތުން ހުށަހެޅި ކަންކަމަށް ފޮނަދޫ ކައުންސިލުން ރައްދުގައި ފާހަގަ ކުރަން ބޭނުންވާ ކަންކަމަށް ވާހަކަ ދައްކަން ފުރުސަތު ދިނުމެވެ.
ތަފްސީލް - މިއަދުގެ އަޑުއެހުމުގައި ފަނޑިޔާރުން ތިން ކަމަކަށް ނުރުހުން ފާޅުކުރެއްވި:
-
1-
ދަށު ކޯޓުގައި ނުދައްކާ ވާހަކައެއް ހައި ކޯޓަށް ހުށަހަޅަން ޖެހުނު ސަބަބުތައް ވިދާޅުވި އިރު އެއްވެސް ވަރަކަށް ގާނޫނަކާ ހަވާލާ ނުދެއްވުން. އަދި ގާނޫނުން އެ ކަން ކުރެވޭނެ ކަން ނުވަތަ ނޫން ކަން ފުރަތަމަ ސާފުކޮށްނުދެވުން
-
2-
ފަނޑިޔާރުގެ ސުވާލާ ގުޅިގެން ވަށައިގެން ހިނގި ކަންކަމަށް ވާހަކަ ދައްކަވަން ފެއްޓެވުމުން، ސުވާލަށް ޖަވާބު ދެއްވުމުގެ ބަދަލުގައި ވީހާވެސް އަވަހަށް ރައްދު ހުށަހަޅުއްވައި ނިންމެވުމަށް ފަނޑިޔާރުން ދެއްވި އިރުޝާދާ އެއް ގޮތަށް އަމަލު ނުކުރެއްވުން
-
3-
ރައްދު ހުށަހަޅުއްވަން، އިސްތިއުނާފީ ނުކުތާތަކުގައި ހުރި ވާހަކަތައް ތަކުރާރުވެގެން ގޮސް، އާދަމް މުހައްމަދުގެ ވާހަކަ މިއަދު ވެސް މާ ބޮޑަށް ދިގުލައިގެން ދިޔުން
ކީކޭ ބުނީ؟ - ބެންޗުގެ ރިޔާސަތުގައި އިންނެވި ފަނޑިޔާރު މުހައްމަދު ފައިސަލް ދެން ނިންމެވީ އާދަމް މުހައްމަދަށް ފުރުސަތު ދިނުމުގައި ކުރިއާލާ ވަކި ވަގުތެއް ކަނޑައަޅުއްވާފައި ދެއްވުމަށެވެ. އެ ގޮތުން 10 މިނެޓުން ވާހަކަ ނިންމުމަށް އަންގަވައި، އެ ގޮތަށް ކުރިއަށް ގެންދެވި އެވެ.
"ދައުވާއަށް ރައްދަށް ވާހަކަ ދައްކަން ދިނީމާ، ދައުވާ ހުށަހަޅާ ގޮތަށް ހުރިހާ ވާހަކައެއް އަލިފުން ޔާއަށް ކިޔާ ގޮތަށް ދިޔައިމަ، އަޅުގަނޑުމެންނަށް ދުވަހަކު ވެސް މި ޝަރީއަތެއް ނުއެއް ނިންމޭނެ،" ފަނޑިޔާރު ފައިސަލް ވިދާޅުވި އެވެ.
އަޑުއެހުން ނިންމާލައްވަމުން ފަނޑިޔާރު ފައިސަލް ވިދާޅުވީ ދެން އޮންނަ އަޑުއެހުމުގައި ވެސް ކުރިއަށް ގެންދާނީ ވަގުތު ކަނޑައަޅައިގެން ކަމަށެވެ. އިސްތިއުނާފު ރައްދުވާ ފަރާތަށް ވެސް ރައްދުގައި ވާހަކަ ދައްކަން ފުުރުސަތު އަރުވާނީ އެ ގޮތަށް ކަމަށް ފަނޑިޔާރު ފާހަގަކުރެއްވި އެވެ.
ކޮމެންޓް (2)
ޙަސަން
ގަޜޭ