ރާއްޖޭގެ ވިލުންވެރިކަން އިތުރުކުރެވޭނީ މާލީ ފުދުންތެރިކަން ލިބިގެން: ވޯލްޑް ބޭންކް

ދުނިޔެ ހޫނުވުމާއި މޫސުމީ ބަދަލުތަކުގެ ސަބަބުން ރާއްޖޭގެ ގުދުރަތީ ވަސީލަތްތަކަށް ލިބޭ ގެއްލުމުގެ ހިރާސް ބޮޑުވާނެ؛ ހާއްސަކޮށް، ފަރުތަކާއި މަސްވެރިކަމަށް މިހާރު ވެސް ކުރަމުންދާ އަސަރު ގަރުނުގެ މެދަކާ ހިސާބަށް ދާއިރު އިންތިހާއަށް ބޮޑުވާނެ

ރާއްޖޭގެ ފަރުތައް މިހާރު ވެސް ދަނީ މަރުވަމުން؛ ސީސީޑީއާރުން އަންދާޒާކުރާ ގޮތުގައި، ދުނިޔޭގެ ހޫނުމިން 2 ޑިގްރީ ސެލްސިއަސް އިން އުފުލޭ ހިސާބުން ހުރިހާ ފަރުތަކެއް މަރުވާނެ

2100 ވަނަ އަހަރު އަންނައިރު ކަނޑުގެ ލޮނުގަނޑު 0.9 މީޓަރުން އުފުލޭނެ ކަމަށް ބެލެވޭ؛ ވިލުންވެރިކުރުމުގެ މަޝްރޫއުތައް ނުހިންގިއްޖެ ނަމަ ލޮނުގަނޑު އުފުލުމުގެ ސަބަބުން ކުރިމަތިވާ އުދައެރުމާއި ފެންބޮޑުވުމެ ހާދިސާތަކުގައި ރާއްޖެއަށް ބޮޑެތި ގެއްލުންތަކެއް ލިބޭނެ

2050 އަންނައިރު ރާއްޖޭގެ ރައުސުލްމާލުގެ %3.3އަށް ގެއްލުންވެ، ޖީޑީޕީއަށް 0.7 އާއި 1.1 ބިލިއަން ޑޮލަރާ ދެމެދުގެ ގެއްލުންވާނެ

އުމްރާނީ ތަރައްގީގެ މަޝްރޫއުތަކަށް ދައުލަތުގެ ހަރަދުތައް ބޮޑުވެ، 2023ގައި ދައުލަތުގެ ދަރަނި ވަނީ ޖީޑީޕީގެ %123އަށް އަރާފައި؛ އެކަމުގެ ސަބަބުން ދަރަނި ދެއްކޭނެ ކަމުގެ ގާބިލްކަން ހުރިކަމާމެދު ކަންބޮޑުވުން އެބައޮތް

މާލީ ބުރަ ބޮޑުވުމާ އެކު ރާއްޖޭގެ ވިލުންވެރިކަން އިތުރުކުރަން ކޮންމެހެން ހިންގަން ޖެހޭ މަޝްރޫއުތައް ކުރިއަށްގެންދަން ބޮޑެތި ދަތިތަކެއް ކުރިމަތިވާނެ

އެހެންކަމުން، ވިލުންވެރިކަން އިތުރުކުރުމަށް މާލީ އިސްލާހުތައް ގެނެސް، ބޭރު ދުނިޔެއިން ފައިސާ ހޯދަން ޖެހޭ

ޖުމްލަ ގޮތުގައި މުޅި އިގްތިސޯދުގެ ކުރިއެރުން ދެމެހެއްޓުމަށްޓަކައި، ބޭރުގެ އިގްތިސޯދަށް އަންނަ ބަދަލަކާ ގުޅިގެން ރާއްޖޭގެ އިގްތިސޯދަށް ކޮށްފާނެ އަސަރުތައް ކުޑަކުރަން ދުރާލާ ފިޔަވަޅު އެޅުން - މިސާލަކަށް ބްލޭންކެޓް ސަބްސިޑިއަރީ އުވާލުމާއި ސަރުކާރު ކުންފުނިތަކުގެ ގެއްލުން ކުޑަކުރުން ފަދަ ކަންކަން

އެކި ގޮތްގޮތުން ކްލައިމެޓް ފައިނޭންސިން ހޯދުން - މިސާލަކަށް ކާބަން މާކެޓް ސްޓެރެޓެޖީއެއް އެކުލަވާލުން

ރަށްރަށާއި ބިނާވެށިތަކުގެ ވިލުންވެރިކަން އިތުރުކުރުން - މިސާލަކަށް މޫސުމަށް އަންނަ ބަދަލުތަކަށް ރިއާޔަތްކޮށް ޕްލޭން ހެދުން އަދި ކޮންމެ ރަށަކަށް ވެސް އެރަށަކަށް ކުރިމަތިވާ މައްސަލަތަކަށް ބަލައި އެކަށީގެންވާ ހައްލެއް ހޯދުން

ވެށީގެ ހާއްސަ ސިފަތަކުގެ ވިލުންވެރިކަން އިތުރުކުރުން - މިސާލަކަށް މެރިން ރިސާޗް އިންސްޓިޓިއުޓް (އެމްއެމްއާރުއައި) ފަދަ މުއައްސަސާތައް ހަރުދަނާކޮށް، ހިމާޔަތްކޮށްފައިވާ ސަރަހައްދުތައް ފުޅާކުރުން

ދިރިއުޅުމަށް ކުރާ މަސައްކަތްތަކުގައި، ހާއްސަކޮށް މަސްވެރިކަމާއި ފަތުރުވެރިކަމުގައި، ވިލުންވެރިކަން އިތުރުކުރުން - މިސާލަކަށް މޫސުމީ ބަދަލު މަސް ހިޖުރަކުރާގޮތަށް އަންނަ ބަދަލުތައް ދިރާސާކުރުމާއި މެރިކަލްޗާ ތަރައްގީކޮށް، ސިންދަފާތުކުރުން

ހަކަތަ، މޮބިލިޓީ އަދި ކުނި މެނޭޖުކުރުމުގެ ދާއިރާއަށް ތިމާވެއްޓާ ރަހުމަތްތެރި ކަންކަން ތައާރަފުކޮށް، އެކަންކަމުން ފައިދާވާގޮތް ހެދުން - މިސާލަކަށް ތެލަށް ދޭ ސަބްސިޑީ ކަނޑާލައި ރިސޯޓުތަކުގައި އިޔާދަކުރަނިވި ހަކަތަ ބޭނުންކުރަންޖެހޭ ގޮތް ހެދުން