ވެމްކޯގެ ޑީއެމްޑީގެ މަގާމަށް އައްޔަންކުރި އިބްރާހިމް ނާއިފު.
ފެނަކަ ޑީއެމްޑީގެ މަގާމުން ވަކިކުރި ނާއިފް ވެމްކޯގެ ޑީއެމްޑީއަކަށް ހަމަޖައްސައިފި
ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމުން ވަކިކުރި އިބްރާހިމް ނާއިފު، ވޭސްޓް މެނޭޖްމަންޓު ކޯޕަރޭޝަން (ވެމްކޯ)ގެ ޑެޕިއުޓީ މެނޭޖިން ޑިރެކްޓަރުގެ މަގާމަށް އައްޔަންކޮށްފި އެވެ.
ވީ ކިހިނެއް؟ - ވެމްކޯގެ ޑީއެމްޑީގެ މަގާމަށް ނާއިފު ހަމަޖެއްސިކަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން އަދި އާންމެއްނުކުރެ އެވެ.
އެހެން ނަމަވެސް ވެމްކޯގެ ސޯޝަލް މީޑިއާ އެކައުންޓުތަކުން ވަނީ ނާއިފަށް މަރުހަބާ ކިޔާ ޕޯސްޓުތަކެއް މިއަދު ހިއްސާކޮށްފަ އެވެ.
Congratulations on your new role as Deputy Managing Director, Mr Ibrahim Naif. Your leadership and vision will undoubtedly make a lasting impact#wamco pic.twitter.com/CRxU8xg7wz
— Waste Management Corporation Limited (WAMCO) (@WAMCOmv) September 17, 2024
އެނގުން މުހިންމު - ނާއިފު ކުރިން ހުންނެވީ ފެނަކައިގެ ޑެޕިއުޓީ މެނޭޖިން ޑިރެކްޓަރުގެ މަގާމުގަ އެވެ.
ނާއިފު ހިމެނޭ ގޮތަށް ފެނަކައިގެ ބޯޑުން ޖުމްލަ ތިން މެމްބަރުން ވަކިކުރީ 8 އޮގަސްޓު 2024 ގައެވެ. ނާއިފުއާ އެކު ދެން ވަކިކުރީ ޗެއާމަންގެ މަގާމުގައި ހުންނެވި އަހުމަދު ޝަހީރާއި ބޯޑު މެމްބަރުގެ ގޮތުގައި ހުންނެވި އަހުމަދު އީހާބު އެވެ.
އެ ތިން މެމްބަރުން ބޯޑުން ވަކިކުރި ސަބަބެއް ޕީސީބީއިން ނުބުނެ އެވެ.
ނާއިފު ވަކިކުރުމަށްފަހު ފެނަކަ ޑީއެމްޑީގެ މަގާމަށް އައްޔަންކުރީ ވެމްކޯގެ ޑީއެމްޑީގެ މަގާމުގައި ހުންނެވި މުހައްމަދު އަބްދުލް ކަރީމް އެވެ.
ގުޅުންހުރި - ނާއިފް އަކީ ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲގެ އަރިސްބޭފުޅެކެވެ. އަދި ރިޔާސީ އިންތިހާބުގެ ތެރޭގައި މިހާރުގެ ރައީސް މުހައްމަދު މުއިއްޒުގެ އިންތިހާބީ އެޖެންޓުގެ ގޮތުގައި ވެސް މަސައްކަތް ކުރެއްވީ ނާއިފް އެވެ.