މާލޭގެ ބޭރުތޮށި އާކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން. (ފޮޓޯ/ ފޮރިން މިނިސްޓްރީ)
މާލޭގެ ބޭރުތޮށި އާކުރަން ޖަޕާން ސަރުކާރާ އެކު ސޮއިކޮށްފި
ޖަޕާނުގެ ހިލޭ އެހީގެ ދަށުން މާލެ ވަށައިގެން ލާފައިވާ ބޭރު ތޮށި މަރާމާތުކޮށް އާކުރަން ޖަޕާނު ސަރުކާރާ އެކު މިއަދު އެއްބަސްވުމެއްގައި ސޮއިކޮށްފި އެވެ.
ވީ ކިހިނެއް؟ - 'ޑިޒާސްޓާ ރެޒިލިއަންސް އެންހޭންސްމަންޓް އިން މާލެ އައިލަންޑް'ގެ ނަމުގައި ކުރިއަށް ގެންދަން ނިންމާފައިވާ މި މަޝްރޫއުގެ 'އެކްސްޗޭންޖް އޮފް ނޯޓްސް'ގައި ސޮއިކޮށްފައިވަނީ މިއަދު ހެނދުނު ފޮރިން މިނިސްޓްރީގައި ބޭއްވި ރަސްމިއްޔާތެއްގަ އެވެ. އެގޮތުން:
-
ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ފޮރިން މިނިސްޓަރު މޫސާ ޒަމީރު
-
ޖަޕާން ސަރުކާރުގެ ފަރާތުން ސޮއިކުރެއްވީ ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު މިސިޒް ތަކެއުޗި މިދޮރި
Maldives and Japan Sign Exchange of Notes for Seawall Renovation in Malé Island
— Ministry of Foreign Affairs 🇲🇻 (@MoFAmv) September 17, 2024
📃 Press Release | https://t.co/lzQ8sZ1nP7 pic.twitter.com/MFAXGng9Eo
ފާހަގަކޮށްލެވޭ - ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމްގެ ދަށުން ކުރިއަށްގެންދިއުމަށް ހަމަޖެހިފައިވާ މި މަޝްރޫއަށް މި އެއްބަސްވުމުގެ ދަށުން ހިލޭ އެހީގެ ގޮތުގައި ޖަޕާން ސަރުކާރުން 20 މިލިއަން ޖަޕާނީސް ޔެން (140،000 ޑޮލަރު) ދޭން ވަނީ ނިންމާފަ އެވެ.
ތަފްސީލް - އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ޒަމީރު ވަނީ ކަނޑުގެ ލޮނުގަނޑު އުފުލުމާއި މޫސުމާ ގުޅުންހުރި އެހެނިހެން ކާރިސާތަކުގެ ނުރައްކަލުން ރާއްޖެ ސަލާމަތްކުރުމުގައި މި މަޝްރޫޢުގެ މުހިންމުކަމުގެ މައްޗަށް ވާހަކަ ދައްކަވައިފަ އެވެ.
އޭނާ އިތުރަށް ވިދާޅުވި ގޮތުގައި:
-
މި މަޝްރޫއަކީ އަންނަން އޮތް ޖީލުތަކަށް ދެމެހެއްޓެނިވި ރައްކާތެރިކަން ފޯރުކޮށްދޭނެ މަޝްރޫއެއް
-
2004ގެ ސުނާމީ އެރިއިރު މާލެ އާއި މާލޭގައި އުޅޭ ރައްޔިތުންގެ ސަލާމަތާއި ރައްކާތެރިކަމަށްޓަކައި، ޖަޕާނުގެ އެހީގައި 1990 ވަނަ އަހަރު ބިނާކުރި މާލޭގެ ވަށާތޮށި މުހިއްމު ދައުރެއް އަދާކުރި
އަދި ދެގައުމުގެ ދެމެދުގައި އޮތް ގާތް ރަހުމަތްތެރި ގުޅުމުގެ މައްޗަށް އަލިއަޅުއްވާލައްވައި، މިފަދަ މަޝްރޫއު ތަކުން ރާއްޖޭގެ ތަރައްްގީގެ ދަތުރުގައި ޖަޕާނުން އަދާކުރަމުންދާ މުހިއްމު ދައުރު ފާހަގަކުރައްވައި، ޖަޕާނު ސަރުކާރުން ދެއްވާ ދީލަތި އެހީތެރިކަމަށް ޒަމީރު ޝުކުރު އަދާކުރެއްވި އެވެ.