ޕީޖީގެ މަގާމަށް ކުރިމަތިލި އައްބާސް ޝަރީފް، އިންޓަވިއު ދެއްވުމަށް މަޖިލީހުގެ ޖުޑިޝަރީ ކޮމިޓީގައި (ފޮޓޯ: މަޖިލީސް)
އައްބާސް ޕީޖީ ކަމަށް އައްޔަންކުރަން މަޖިލީހުގެ ކޮމިޓީން ފާސްކޮށްފި
ހުސްވެފައިވާ ޕްރޮސެކިއުޓާ ޖެނެރަލް (ޕީީޖީ)ގެ މަގާމަށް ރައީސް އޮފީހުގެ ލީގަލް ސެކްރެޓަރީ އައްބާސް ޝަރީފް އައްޔަންކުރަން އެ މަޖިލީހުގެ ޖުޑީޝަރީ ކޮމިޓީން މިއަދު ފާސްކޮށްފި އެވެ.
ވީ ކިހިނެއް؟ - ރައީސް މުހައްމަދު މުއިއްޒު މަޖިލީހަށް ފޮނުއްވީ ވެސް އައްބާސްގެ ނަން އެކަންޏެވެ. އެހެންވެ އައްބާސްއާ ގުޅޭ ގޮތުން ޝަކުވާ ހުށަހެޅުމަށް މަޖިލީހުން މިއަދުގެ މެންދުރުފަހުގެ ނިޔަލަށް ފުރުސަަތު ހުޅުވާލި އެވެ. އަދި މިއަދު މެންދުރުފަހު ކޮމިޓީއަށް އައްބާސް ހާޒިރުކޮށް އިންޓަވިއު ވެސް ކުރި އެވެ.
ތަފްސީލް - އިންޓަވިއުއަށް ފަހު އައްބާސް އައްޔަންކުރަން މަޖިލީހުގެ ތަޅުމަށް ފޮނުވަން ފާސްކުރީ ކޮމިޓީ ބައްދަލުވުމުގައި ތިއްބެވި މެންބަރުންގެ އިއްތިފާގުންނެވެ.
އިންޓަވިއުއަށް ފަހު، ކޮމިޓީގެ މުގައްރިރު އަދި މަނަދޫ ދާއިރާގެ މެންބަރު ހުސްނީ މުބާރަކް ވިދާޅުވީ:
-
އާންމުންގެ ޝަކުވާއަށް ހުޅުވާލުމުން އެއްވެސް ޝަކުވާއެއް ލިބިފައެއް ނުވޭ
-
އިންޓަވިއުއިން އައްބާސްއަށް ލިބިފައި ވަނީ 75 މާކްސް
އެނގުން މުހިންމު - ޕީޖީގެ މަގާމަށް ބޭފުޅަކު އައްޔަންކުރުމުގެ މަސައްކަތް މަޖިލީހުން ކުރަމުން ދަނީ އެ މަޖިލީހުގެ ދައުރުން ބޭރުގަ އެވެ. އެއީ ޕީޖީގެ މަގާމު ހުސްވާތާ 30 ދުވަހުގެ ތެރޭގައި އާ ޕީޖީއެއް އައްޔަންކުރަން ޖެހޭނެ ކަމަށް ގާނޫނުގައި އޮންނާތީ އެވެ.
އެގޮތުން، މާދަމާ މަޖިލީހުގެ ދައުރުން ބޭރު ހާއްސަ ޖަލްސާއެއް ބާއްވާ އިރު، ބެލެވޭ ގޮތުގައި މާދަމާގެ ޖަލްސާގައި އައްބާސްގެ ނަމަށް ވޯޓަށް އަހައި ފާސްކުރުމާ މެދު ވަކި ގޮތެއް ނިންމާނެ އެވެ.
ފަސް މަންޒަރު - ޕީޖީގެ މަގާމު ހުސްވީ ކުރިން އެ މަގާމުގައި ހުންނެވި ހުސައިން ޝަމީމު މިދިޔަ މަހު އިސްތިއުފާ ދެއްވައި އަދި މަޖިލީހުން އޭނާ ވަކިކުރަން ވެސް ނިންމުމާ ގުޅިގެންނެވެ. ޝަމީމް އިސްތިއުފާ ދެއްވީ އޭނާ މަގާމުން ވަކިކުރަން ޖުޑީޝަރީ ކޮމިޓީން ނިންމި ފަހުންނެވެ.
ޝަމީމު މަގާމުން ވަކިކުރަން މަޖިލީހުން ވޯޓު ނަގާފައި ވަނީ އިސްތިއުފާގެ ސިޓީ ރައީސް އޮފީހަށް ނުލިބޭ ކަމަށް ބުނެ އެވެ.
ކޮމެންޓް (1)
ލޮލް