ރައްޔިތުންގެ މަޖިލީހުގެ ރިޔާސަތުގައި މަޖިލިސް ރައީސް އަބްދުއްރަހީމް އަބްދުﷲ
ވަރަށް އަވަސް؛ ކުންފުނި ގާނޫނުގެ އިސްލާހުތައް އެއް ދުވަހުން ނިންމައިފި
ސަރުކާރުގެ ފަރާތުން ކުންފުންޏާ ބެހޭ ގާނޫނަށް ހުށަހަޅާފައިވާ އިސްލާހުތަކަށް މިއަދު މަޖިލީހުގައި ބަހުސްކޮށް ނިންމުމަށް ފަހު ކޮމިޓީއަށް ފޮނުވައި އެ އިސްލާހުތައް ދިރާސާކޮށް ކޮމިޓީން މިއަދު އެ ބިލްގެ މަސައްކަތް ނިންމައި ތަޅުމަށް ފާސްކުރަން ފޮނުވައިފި އެވެ.
ވީ ކިހިނެއް؟ - ދައުރުން ބޭރުން މިއަދު މަޖިލީހުގެ ޖަލްސާއެއް ބާއްވާފައި ވަނީ ކުންުފުންޏާ ބެހޭ ގާނޫނަށް ހުށަހަޅާފައިވާ އިސްލާހުތަކާ މެދު ބަހުސްކުރުމަށެވެ. މިއަދުގެ ޖަލްސާ ހެނދުނު 9 ޖެހިއިރު ފެށުމަށް ފަހު އެ ބިލްގެ ބަހުސް ކުރިއަށް ދިޔައީ ގަޑިއެއްހާއިރަށެވެ. އެއަށް ފަހު ވޯޓަށް އަހައި އެ އިސްލާހުތައް މަޖިލީހަށް ބަލައިގަނެ އިގްތިސާދީ ކޮމިޓީއަށް ފޮނުވި އެވެ.
ތަފްސީލް - މިއަދު ހެނދުނު 11:30ގައި ބޭއްވި އިގްތިސާދީ ކޮމިޓީގެ ބައްދަލުވުމުގައި ވަނީ އެ އިސްލާހުތައް އެޖެންޑާކޮށް އެއްވެސް ބަދަލެއް ނުގެނެސް ކުންފުނީގެ ގާނޫނަށް އެ އިސްލާހުތައް ގެންނަން ކޮމިޓީން ފާސްކޮށްފަ އެވެ. އަދި އެ އިސްލާހުތަކަށް ވޯޓަށް އެހުމަށް އެ ކޮމިޓީން ވަނީ މައްސަލަ އަލުން ތަޅުމަށް ފޮނުވައިފަ އެވެ.
އެގޮތަށް ފާސްވީ ކޮމިޓީއަށް ވަޑައިގެން އަށް މެންބަރުންގެ ވޯޓުންނެވެ.
ގުޅުންހުރި - މިއަދުގެ ޖަލްސާ ނިއްމާލައްވަމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި ގޮތުގައި މާދަމާ ވެސް ދައުރުން ބޭރުން މަޖިލީހުގެ ޖަލްސާއެއް ބާއްވާނެ އެވެ. ބެލެވޭ ގޮތުގައި އެ ޖަލްސާގައި އޮންނާނީ:
-
ޕްރޮސެކިއުޓާ ޖެނެރަލް ކަމަށް ޕްރޮސިކިއުޓާ ޖެނެރަލް (ޕީޖީ)ގެ މަގާމަށް ރައީސް އޮފީހުގެ ލީގަލް ސެކްރެޓަރީ އަދި ކުރީގެ ހައިކޯޓްގެ ފަނޑިޔާރު އައްބާސް ޝަރީފް އައްޔަން ކުރަން ރުހުން ދިނުން؛ ޖުޑިޝަރީ ކޮމިޓީން މިއަދު އޭނާއާ އިންޓަވިއުކުރުމަށް ހަމަޖެހިފައިވޭ
-
ދެން އޮންނާނީ ކުންފުނީގެ ގާނޫނަށް އިސްލާހު ގެނައުމަށް މިއަދު ކޮމިޓީން ފާސްކުރި ބިލަށް ވޯޓަށް އެހުން
އެނގުން މުހިންމު - ކުންފުނީގެ ގާނޫނަށް ގެންނަ އިސްލާހުތަކަކީ:
-
ހިއްސާދާރުންގެ ހާއްސަ އާންމު ޖަލްސާއަކަށް ނޯޓިސް ފޮނުވަން ޑިރެކްޓަރުންގެ ބޯޑަށް ދީފައިވާ މުއްދަތު 21 ދުވަހުން ތިން ދުވަހަށް ކުރު ކުރުމަށް
-
ހާއްސަގޮތުން ކުރާ އާންމު ޖަލްސާއެއް ބޭއްވުމަށް ހިއްސާދާރުންނަށް ދޭން ޖެހޭ ނޯޓިސް 14 ދުވަހުން ހަތް ދުވަހަށް ކުރު ކުރުމަށް
-
ޕަބްލިކް އަދި ޕްރައިވެޓް ކުންފުނިތަކުގެ މެނޭޖިން ޑިރެކްޓަރުންނާއި ޑިރެކްޓަރުންގެ މަގާމު ހުސްވެއްޖެނަމަ އެ މަގާމަށް 30 ދުވަސް ތެރޭގައި މީހުން އައްޔަން ކުރަން އެންގުމަށް ރަޖިސްޓްރާ އޮފް ކޮމްޕެނީސްއަށް ދީފައިވާ ބާރު 10 ދުވަހަށް ކުރުކުރުމަށް
ކޮމެންޓް (1)
ވާވް