ކުރިން ބޭއްވި އަޑުއެހުމެއްގައި ރައީސް ޔާމީން: އެމަނިކުފާނުގެ މައްޗަށް ހިންގާ ކްރިމިނަލް ކޯޓުގެ ޝަރީއަތެއް މަޑުޖައްސާލައިފި
ހައި ކޯޓުން ފޮނުވައިގެން އަލުން ފެށި ޔާމީންގެ ޝަރީއަތް މަޑުޖައްސާލައިފި
ވ. އާރަށް ކުއްޔަށް ދިނުމުގައި ހިންގި ކަމަށް ބުނާ ހިޔާނާތުގެ މައްސަލާގައި ހައި ކޯޓުން ކުރި ހުކުމުގެ ބައެއް ސުޕްރީމް ކޯޓުގައި އޮތުމުންނާއި ޝަރީއަތުގެ ކުރިން ހުށަހަޅާ ހުށަހެޅުންތަކުގައި ފުށުއަރާ ކަންކަން ހުރުމުން ކްރިމިނަލް ކޯޓުގެ ޝަރީއަތް މަޑުޖައްސާލައިފި އެވެ.
އެނގުން މުހިންމު - ދައުލަތުން ސުޕްރީމް ކޯޓުގައި އިސްތިއުނާފު ކުރީ، ކުރިން ކްރިމިނަލް ކޯޓުގައި ހިނގި ޝަރީއަތަށް ޔާމީންގެ ދިފާއީ ހެކިންގެ ވާހަކަ ނަފީކުރުމަށް ދައުލަތުން ހުށަހެޅި އާ ހެކިތައް އެއް ފަރާތް ކުރުމަށް ހައި ކޯޓުން ނިންމި ބަ އެވެ. އެ މައްސަލަ ސުޕްރީމް ކޯޓަށް ބަލައިގަތް ނަމަވެސް އަޑުއެހުންތައް އަދި ނުފަށަ އެވެ.
ވީ ކިހިނެއް؟ - ހައި ކޯޓުގެ އެންގުމުގެ މަތިން ކްރިމިނަލް ކޯޓުން ފެށި ޝަރީއަތުގައި މިއަދު ބޭއްވި އަޑުއެހުމުގައި އޮތީ ޝަރީއަތުގެ ކުރިން ދެ ފަރާތުން ހުށަހަޅާ ހުށަހެޅުންތައް ހުށަހެޅުމެވެ. މިއަދުގެ ޝަރީއަތުގެ މަޖިލިސް ކުރިއަށް ގެންދަން ޔާމީންގެ ފަރާތްޕުޅުން އިއުތިރާޒު ކުރެއްވި އެވެ.
ތަފްސީލް - ޔާމީންގެ ވަކީލު ހަމްޒާ ލަތީފް ވިދާޅުވި ގޮތުގައި ޝަރީއަތް ކުރިއަށް ގެންދަން އިއުތިރާޒު ކުރައްވާ ދެ ސަބަބަކީ:
-
1-
ދައުލަތުންނާއި ދިފާއުން ވެސް ހުށަހެޅި ޝަރީއަތުގެ ކުރިން ހުށަހަޅާ ކަންކަމުގެ ތެރޭ ސުޕްރީމް ކޯޓުގައި އޮތް ދައުލަތުގެ އާ ހެކިތަކުގެ މައްސަލައަށް އަސަރުކުރާ ފަދަ ހުށަހެޅުންތަކެއް ހިމެނުން
-
2-
ޔާމީން ތަހުގީގަށް ދެއްވި އިންޓަވިއުތަކުގެ ރެކޯޑިންތައް ހުރި ސީޑީތައް، ހުށަހެޅުންތަކުގެ ބަހުސަށް މުހިންމުވާތީ ސީޑީތައް ނުލިބި ޝަރީއަތް ކުރިއަށް ދާތީ
ސުޕްރީމް ކޯޓުގެ މައްސަލައަށް އަސަރުކުރާނެ ކަން ދައުލަތުން ވެސް ދެކެ އެވެ.
ގާޒީގެ ނިންމެވުން - ދެ ފަރާތުން ދެއްކި ވާހަކަތަކަށް ރިއާޔަތް ކުރެއްވުމަށް ފަހު މައްސަލަ ބައްލަވާ ގާޒީ އަލީ ނަދީމް ނިންމެވީ:
-
މިހާރު ކްރިމިނަލް ކޯޓަށް ހުށަހެޅިފައިވާ ކަންކަމަށް އެ ކޯޓުން ގޮތެއް ނިންމައިފި ނަމަ ސުޕްރީމް ކޯޓުގައި އޮތް މައްސަލައަށް އަސަރުކުރާނެ ކަމަށް ފެންނާތީ، ޝަރީއަތުގެ ކުރިން ހުށަހަޅާ ހުށަހެޅުންތަކުގެ ބައި މަޑުޖައްސާލަން
-
ޔާމީންގެ ފަރާތްޕުޅުން އެދިވަޑައިގެންފައިވާ ސީޑީތައް، ކްރިމިނަލް ކޯޓުން ވީހާވެސް އަވަހަށް އެމަނިކުފާނަށް ފޯރުކޮށްދިނުން
އެނގުން މުހިންމު - ޔާމީންގެ މައްޗަށް އިއްވި 11 އަހަރުގެ ޖަލު ހުކުމުގެ ޝަރީއަތް ކްރިމިނަލް ކޯޓުގައި އަލުން ފަށާފައިމިވަނީ އެ ހުކުމް ބާތިލުކޮށް މައްސަލަ އަލުން ބަލަން ހައި ކޯޓުން އެންގިތާ ހަތަރު މަސް ފަހުންނެވެ. ޔާމީންގެ ފަރާތްޕުޅުން އެދިވަޑައިގެން ދަށު ކޯޓުގެ ޝަރީއަތް ކުރިއަށް ގެންދަނީ ޔޫޓިއުބް މެދުވެރިކޮށް ލައިވްކޮށްގެންނެވެ.
ގުޅުންހުރި ކަމެއް - އާރަށު މައްސަލާގައި ޔާމީންއަށް ރިޝްވަތު ދިންކަން ސާބިތުވި ކުރީގެ މަޖިލިސް މެމްބަރު ޔޫސުފް ނައީމުގެ މައްޗަށް އިއްވާފައިވާ ތިން އަހަރު ދުވަހުގެ ޖަލު ހުކުމް ބާތިލުކޮށް އެ މައްސަލަ ވެސް އަލުން ބަލަން ހައި ކޯޓުން ވަނީ ކްރިމިނަލް ކޯޓަށް އަންގާފަ އެވެ. ނަމަވެސް އޭނާގެ މައްސަލައިގެ ޝަރީއަތް އަދި ކްރިމިނަލް ކޯޓުން ނުފަށަ އެވެ.
ކޮމެންޓް (1)
ރ ޔާމީން