ފެނަކަ ހެޑް އޮފީސްފަރެެ (ދައުރު ފޮޓޯ/ މުހައްމަދު އަމާން)
ތިނަދޫ ފެން ޕްލާންޓް ހޯދީ އެންމެ އަވަހަށް މައްސަލަ ހައްލު ކުރަން: ފެނަކަ
ގދ. ތިނަދުއަށް ފެން ޕްލާންޓު ހޯދުމުގައި އަމަލުކޮށްފައިވަނީ އެންމެ އަވަހަށް މައްސަަލަ ހައްލު ކުރެވޭނެ ގޮތަށް ކަމަށް ފެނަކަ ކޯޕަރޭޝަނުން ރޭ ބުނެފި އެވެ.
ވީ ކިހިނެއް؟ - ތިދަނުއަށް ދިމާވެފައިވާ ފެނުގެ މައްސަލައަށް ހައްލު ހޯދުމަށް އަވަސް އަރުވާލައިގެން ފެން ޕްލާންޓެއް ހޯދި މައްސަލައެއް ވަނީ ފެންމަތިވެފަ އެވެ.
ތަފްސީލް - އެ މައްސަލައާ ގުޅިގެން ފެނަކަ އިން ރޭ ނެރުނު ބަޔާނެއްގައި ބުނީ، އެއީ ވަކި މަގުސަދެއްގައި ކުންފީގެ މެނޭޖުމެންޓާ މެދު ނުރަނގަޅު ތަސައްވަރެއް އުފައްދަން ދައްކަމުންދާ ވާހަކައެއް ކަމަށެވެ.
އެ ބަޔާނުގައި ބުނި ގޮތުގައި އާ މެނޭޖުމެންޓުން ހަވާލުވި އިރު ފެނަކަ އިން ހިދުމަތް ދޭ ރަށްރަށުގައި ކަރަންޓާއި ފެނުގެ ހިދުމަތް އޮތީ ވަރަށް ދަށުގަ އެވެ. އެގޮތުން ހަތް ރަށެއްގެ ހާލަތު ވަރަށް ދަށްކަން އެ ބަޔާނުގައި ވަނީ ފާހަގަކޮށްފަ އެވެ.
ޑިމާންޑާ އެއްވަރަށް ފެން ފޯރުކޮށްދިނުމަށް އެންމެ ބޮޑު ދައްޗެއް އޮތީ ތިނަދޫގައިކަން މީގެ ކުރިން ވެސް އެ ކުންފުނީގެ މެނޭޖިން ޑިރެކްޓަރު ފާހަގަކުރައްވާފައިވާ ކަމަށް ބަޔާނުގައި ބުންޏެވެ.
ފެނަކައިން ބުނީ:
-
މިހާރު ތިނަދޫގައި ހިދުމަތް ދޭ ޕްލާންޓުން އެކަނި ހިދުމަތް ދޭން ޖެހޭތީ، މިދިޔަ ދެ މަސް ތެރޭ ތިން ފަހަރަށް އަމިއްލަ ފަރާތްތަކުން ފެން ހޯދަން ޖެހުނު
-
އެއީ ބޮޑު ހަދަރެއް ކުރަން ޖެހޭ ކަމެއް؛ މިދިޔަ ދެ މަސް ތެރޭ ތިނަދުއަށް އެކަނި 4.5 މިލިއަން ރުފިޔާގެ ފެން ފޯރުކޮށްދިން
-
ހިދުމަތަށް ބުރޫއަރާ ކޮންމެ ފަހަރަކު އެ ރަށުގެ ރައްޔިތުންނަށް ބޮޑު ތަކުލީފަކާ ކުރިމަތިލާން ޖެހޭ
-
މިހާރުން މިހާރަށް މައްސަލަ ހައްލު ނުކުރެވިއްޖެ ނަމަ، ކޮންމެ މަހަކު ވެސް ފެނުގެ މައްސަލަ ކުރިމަތިވެ ރަށުގެ ރައްޔިތުންނަށް ތަކުލީފު ޖެހޭނެ
ފެނަކައިން ބުނީ އާ ފެން ޕްލާންޓެއް ހޯދުމަށް ސްޓެލްކޯ އާއި އެމްޑަބްލިއުއެސްސީއަށް ހުށަހަޅާފައިވާ ކަމަށެވެ. އެގޮތުން:
-
އެމްޑަބްލިއުއެސްސީން ބުނީ އެ ކަމަށް ފަސް ހަފްތާ ހޭދަވާނެ
-
ސްޓެލްކޯ އިން ބުނީ އެކަމަށް 180 ދުވަސް ހޭދަވާނެ
އެއާ އެކު، ފެނަކަ އިން ހިދުމަތް ހޯދާ އަމިއްލަ ކުންފުނިތަކުގެ އަތުން ކޯޓޭޝަން ހޯދި ކަމަށާއި ދެ ފަހަރަށް ފުުރުސަތު ދިނުމުން ވެސް ކޮޓޭޝަން ހުށަހެޅީ އެންމެ ކުންފުންޏަކުން ކަމަށް ފެނަކައިން ބުންޏެވެ.
ފެނަކައިން ބުނީ ތިނަދުއަށް ފެން ޕްލާންޓު ހޯދީ އެ ކުންފުނީގެ ޕްރޮކިޔުމެންޓް އުސޫލުގެ ތެރެއިން ކަމަށެވެ.
"މި ފެނެް ޕްލާންޓު އިންސްޓޯލް ކުރެވޭނީ އޭގައި ހިމެނެން ޖެހޭ ހުރިހާ ބައިތަކެއް ފުރިހަމަވެގެން ކަމުގައި ވެސް ދަންނަވަމެވެ،" އެ ބަޔާނުގައި ބުންޏެވެ.
ފެނަކައިން ބުނީ އާ ޕްލާންޓް އިންސްޓޯލް ކުރުމުން ތިނަދޫގައި 600 ޓަނުގެ ފެން އުފެއްދޭނެ ކަމަށެވެ.
ފެނަކައިން ވަނީ އެ ކުންފުންޏާ މެދު ރައްޔިތުންގެ އިތުބާރު ގެއްލި، ނުތަނަވަސްކަން އުފެދޭ ފަދަ ވާހަކަތައް ނުދައްކަން އިލްތިމާސްކޮށްފަ އެވެ. އަދި މާލީ ގޮންޖެހުންތަކާ އެކު ވެސް ރައްޔިތުންނަށް ދޭން ޖެހޭ އަސާސީ ހިދުމަތްތައް ފޯރުކޮށްދިނުމުގައި ދެމިއޮންނާނެ ކަމުގެ ޔަގީންކަން ވެސް އެ ކުންފުނިން ދިނެވެ.
ކޮމެންޓް (1)
ހަސަން343