ހައި ކޯޓުގެ ކުރީގެ ފަނޑިޔާރު އައްބާސް (ކ)، ކްރިމިނަލް ކޯޓުގެ ކުރީގެ އިސް ގާޒީ ހަލީމް (މ)، ކުރީގެ ޑެޕިއުޓީ ޕީޖީ މަރިޔަމް ނިހާޔަތު (ވ) - ޕީޖީގެ މަގާމަށް މި ތިން ބޭފުޅުން ކުރިމަތިލެއްވި
ޕީޖީގެ މަގާމަށް ތަޖުރިބާކާރު ތިން ބޭފުޅަކު ކުރިމަތިލައްވައިފި
ޕްރޮސެކިއުޓަ ޖެނެރަލް (ޕީޖީ) ގެ މަގާމަށް ކުރިމަތި ލެއްވުމަށް، ގާނޫނީ ދާއިރާގެ ތަޖުރިބާކާރު ތިން ބޭފުޅަކު ފޯމު ހުށަހެޅުއްވި ކަން އެނގިއްޖެ އެވެ.
ވީ ކިހިނެއް؟ - މި މަގާމު ހުސްވީ ކުރިން އެ މަގާމުގައި ހުންނެވި ހުސައިން ޝަމީމް މިދިޔަ މަހު 22ގައި މަޖިލިހުން އޭނާ ވަކިކުރުމުންނެވެ. އޭރު މަގާމުން އޭނާ އިސްތިއުފާ ވެސް ދެއްވި އެވެ. އެ މަގާމަށް ކުރިމަތިލާން މިދިޔަ މަހުގެ 27ގައި ހުޅުވާލާފައިވާ މުއްދަތު މިއަދުމެންދުރު 12 ޖަހާއިރަށް ވަނީ ހަމަވެފަ އެވެ.
ތަފްސީލް - މަގާމަށް ފޯމު ހުށަހެޅުއްވި ޝަރުއީ ދާއިރާގެ ތަޖުރިބާކާރު ތިން ބޭފުޅަކު 'ދައުރު'އަށް ވަނީ ފޯމު ހުށަހެޅުއްވި ކަން ކަށަވަރުކޮށްދެއްވައިފަ އެވެ. އެ ބޭފުޅުންނަކީ؛
-
ރައީސް އޮފީހުގެ ލީގަލް ސެކްރެޓަރީ އައްބާސް އަދި ހައި ކޯޓުގެ ކުރީގެ ފަނޑިޔާރު އައްބާސް ޝަރީފް
-
ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް
-
ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު
އިތުރު ބޭފުޅުންތަކެއް ވެސް މަގާމަށް ކުރިލައްވާފައިވީ ނަމަވެސް އަދި ކުރިމަތިލެއްވި ބޭފުޅުންގެ ނަންތައް ރައީސް އޮފީހުން ހާމައެއް ނުކުރެ އެވެ. އަދި އެ ބޭފުޅުން މަގާމަށް ފޯމް ހުށަހެޅުއްވިކަން ސީދާ ކަށަވަރެއް ނުވެ އެވެ.
ޕީޖީގެ މަގާމަށް ކުރިމަތިލުމަށް ޓަކައި ގާނޫނީ ވަކީލު އާދަމް ޝަމީމް ކުށުގެ ރެކޯޑު ސާފުކުރެއްވި ނަމަވެސް މަގާމަށް ކުރިމަތިލައްވަން ފޯމު ހުށަނާޅުއްވާ ކަމަށް މިއަދު އޭނާ 'ދައުރު'އަށް ވިދާޅުވި އެވެ.
އެނގުން މުހިންމު - ޕީޖީގެ މަގާމަށް ބޭފުޅަކު އައްޔަންކުރަން ރައްޔިތުންގެ މަޖިލީހުން ރުހުން ދިނުމަށް، ދައުރުން ބޭރު ޖަލްސާއެއް މިރޭ ބާއްވާނެ އެވެ. މަޖިލީހުގައި އޮތީ ވެރިކަންކުރާ ޕީއެންސީގެ މެޖޯރިޓީ އެވެ.
ޕީޖީގެ މަގާމަށް މީހަކު އައްޔަން ކުރުމުގެ މަރުހަލާ ކުރިއަށްދާ ގޮތަކީ:
-
ކުރިމަތިލައްވާ ބޭފުޅުންގެ ތެރެއިން ރައީސަށް ފެނިވަޑައިގަންނަވާ ނަންތައް މަޖިލީހަށް ފޮނުއްވުން
-
ރައީސް ފޮނުއްވާ ނަންތަކުގެ ތެރެއިން މަޖިލީހުން ރުހުން ދިނުމަށް ނަމެއް ފާސްކުރުން
-
މަޖިލީހުގެ ރުހުން ލިބޭ ބޭފުޅަކު ޕީޖީގެ މަގާމަށް އައްޔަންކޮށް ރައީސް މަގާމުގެ ލިޔުން އެ ބޭފުޅަކަށް ދެއްވުން
-
ޕީޖީގެ ގާނޫނުގައި އޮންނަނީ މަގާމު ހުސްވާތާ 30 ދުވަހުގެ ތެރޭގައި އާ ޕީޖީއެއް އައްޔަން ކުރަން ޖެހޭނެ ކަމަށް
ފާހަގަކޮށްލެވޭ - ޕްރޮސެކިއުޓާ ޖެނެރަލްގެ މަގާމު އުފެއްދީއްސުރެން އެއްވެސް ޕީޖީއަކަށް ފަސް އަހަރުގެ ދައުރެއް ފުރިހަމަކުރެވިފައެއް ނުވެ އެވެ. ޝަމީމް އެ މަގާމުގައި ހުންނެވީ ހަތަރު އަހަރާއި އަށް މަހާއި ހަ ދުވަހު އެވެ. ދައުރު ފުރިހަމަކުރުމާ އެންމެ ގާތްކުރެއްވީ ވެސް އޭނާ އެވެ.
ޝަމީމް މަގާމުން ވަކިކުރަން މަޖިލީހުން މިދިޔަ މަހު 22 ގައި ނިންމީ ކުރީގެ ސަރުކާރުގެ އިސް މީހުންގެ މައްޗަށް ތުހުމަތު ކުރެވޭ ބައެއް މައްސަލަތަކުގައި ދައުވާ ކުރުމަށް ފަހު ދައުވާ އަނބުރާ ގެންދިޔަ މައްސަލާގައި ސީރިއަސް ތުހުމަތުތަކެއް އޭނާއަށް އަމާޒުކޮށް މަޖިލީހުން މައްސަލަ ބެލުމަށް ފަހުގަ އެވެ.