ދަރިވަރުން މާލެ އަންނަން ބޮޑު ހަރަދެއް ކުރި ފަހުން އޭ ލެވެލް ޓޮޕް 10 ޖަލްސާ އަވަސްކޮށްފި

މިދިޔަ އަހަރުގެ އޭ ލެވެލް އިމްތިހާނުން އެންމެ މޮޅު ނަތީޖާ ހޯދި ދަރިވަރުންނަށް އިނާމު ދިނުމަށް ބާއްވާ ޖަލްސާގެ ތާރީހު ކުއްލި ގޮތަކަށް ބަދަލުކުރުމުން އަތޮޅުތަކުގައި ދިރިއުޅޭ ދަރިވަރުންނާއި ބެލެނިވެރިން ކަންބޮޑުވުން ފާޅުކުރަން ފަށައިފި އެވެ.

ވީ ކިހިނެއް؟ - މިދިޔަ އަހަރު އޭ ލެވެލް ނިންމި ދަރިވަރުންގެ ޓޮޕް 10 ޖަލްސާ ބާއްވަން މީގެ ކުރިން އެޑިއުކޭޝަން މިނިސްޓްރީން ކަނޑައަޅާފައި އޮތް ތާރީހަކީ 17 ސެޕްޓެމްބަރު 2024 އެވެ. އެއީ 15 އަދި 16ގައި ރިހާސަލް ބޭއްވުމަށް ފަހު އެވެ.

ބުނީ ކީކޭ؟ - މިކަމާ ބެހޭގޮތުން 'ދައުރު'އާ ކަންބޮޑުވުން ހިއްސާކުރި ދަރިވަރެއް ބުނީ އޮގަސްޓު ނުވަތަ ސެޕްޓެމްބަރުގައި ޓޮޕް 10 ޖަލްސާ ބާއްވާނެ ކަމަށް މިނިސްޓްރީން ބުނުމަށް ފަހު ވަކި ތާރީހެއް މިނިސްޓްރީން ޔަގީންކޮށްދިނީ މިދިޔަ އަންގާރަ ދުވަހު (3 ސެޕްޓެމްބަރުގައި) ކަމަށެވެ.

"ވަކި ތާރީހެއް މިނިސްޓްރީން އެންގީމަ އަޅުގަނޑުމެން އެ ދުވަހަށް މި ތައްޔާރުވީ. މި ދުވަސްވަރު ޓިކެޓު ވެސް ވަރަށް ބާރުބޮޑުވީމަ މޯލްޑިވިއަންއިން ޓިކެޓު ގަތީ،" އައްޑޫގައި ދިރިއުޅޭ އެ ދަރިވަރު ބުންޏެވެ.

"އަޅުގަނޑުމެން އެންމެންގެ އާއިލާ މީހުން ނުތިބޭ މާލޭގައި. އެހެންވެ ޓިކެޓުގެ އިތުރަށް މާލެ ގޮސް އެ ދުވަސްތަކުގައި ހުންނާނެ ތަނެއް ވެސް ހޯދައި، ފައިސާ ދައްކައިގެން މި ތިބީ. ގިނަ ކުދިން މި އުޅެނީ ވަޒީފާގައި އެހެންވެ ޕެއިޑް ލީވް ވެސް ހަމަޖައްސައިގެން މާލެ ދާ ގޮތަށް އޮތީ."

ދަރިވަރުންގެ ކަންބޮޑުވުމަކީ މި ހުރިހާ ކަމަކަށް ފައިސާ ދައްކައި، ޗުއްޓީ ހަމަޖައްސާފައި އޮއްވާ މިނިސްޓްރީން ކުއްލި ގޮތަކަށް ޓޮޕް 10 ޖަލްސާ އަވަސްކުރަން ނިންމުމެވެ.

"މިއަދު މިނިސްޓްރީން ދަރިވަރުންނަށް ގުޅަމުން އެބަދޭ، ޖަލްސާ 12 ސެޕްޓެމްބަރަށް އަވަސްކުރިކަން އަންގަން. އެހެންވެ ރިހާސަލްގައި ވެސް ބައިވެރިވާ ގޮތަށް އަޅުގަނޑުމެން އެބަޖެހޭ އެންމެ ލަސްވެގެން 10 ސެޕްޓެމްބަރުގައި މާލޭގައި ތިބެން. މިއީ ފަސޭހަކަމެއް ނޫން، މިހާ ކުރު މުހުލަތެއްގެ ތެރޭގައި އަދި އެހާ ބާރުބޮޑު ދުވަސްކޮޅެއްގައި ޓިކެޓު އަވަސްކުރުމަކީ،" ދަރިވަރަކު ބުންޏެވެ.

އޭނާ ބުނި ގޮތުގައި ޖަލްސާ އަވަސްކުރިކަން މިނިސްޓްރީން އަދިވެސް ހުރިހާ ދަރިވަރުންނަށް އަންގާފައެއް ނުވެ އެވެ.

ތަފްސީލު - ޓޮޕް 10 ޖަލްސާއަށް އައްޑޫއިން މާލެއަށް އަންނަ ދަރިވަރުން ބުނާ ގޮތުގައި އެކަކުގެ ދެކޮޅު ޓިކެޓަށް 3،374ރ. ހަރަދުވެ އެވެ. ޓިކެޓު އަވަސްކުރާ ނަމަ އެއީ އަދި އިތުރު ހަރަދެކެވެ.

"މިހާ ޝޯޓް ނޯޓިސްއެއްގައި ޕެއިޑް ލީވް ހަމަޖައްސުމަކީ ފަސޭހަ ކަމެއް ނޫން. ޓިކެޓާއި އެކޮމޮޑޭޝަން ބަދަލުކުރުމަކީ ބޮޑު ހަރަދެއް،" ދަރިވަރަކު ބުންޏެވެ.

"ޖަލްސާ އަވަސްކުރި ސަބަބެއް ކަމަށް މިނިސްޓްރީން ބުނީ ސެޕްޓެމްބަރު އިންޓޭކަށް ކުދިން ރާއްޖެއިން ބޭރަށް ފުރުން. އެކަމަކު މިނިސްޓްރީއަށް ވެސް އެކަން ކުރިން އެނގެންވާނެ. މިއަށްވުރެ ރަނގަޅަށް މިކަން އިންތިޒާމު ކުރެވޭނެ. ޓިކެޓާއި ހުރިހާ ކަމެއް ހަމަޖައްސާފައި ތިން ދުވަސް ތެރޭގައި ކިހިނެއް ބަދަލުކުރަނީ؟"

އަތޮޅުތަކުން ޓޮޕް 10 ޖަލްސާއަށް އަންނަ ދަރިވަރުންގެ ކަންބޮޑުވުންތަކާ ބެހޭގޮތުން އެޑިއުކޭޝަން މިނިސްޓްރީގެ ބަހެއް ހޯދަން މަސައްކަތްކުރި ނަމަވެސް، އަދި މިހާތަނަށް ޖަވާބެއް ނުލިބެ އެވެ.

މިނިސްޓްރީން ގުޅި ބައެއް ދަރިވަރުން މި ކަންބޮޑުވުންތައް ހިއްސާކުރި ނަމަވެސް، ދެން ތާރީހު ބަދަލުނުވާނެ ވާހަކަ މިނިސްޓްރީން ބުނި ކަމަށް ދަރިވަރުން ބުނެ އެވެ.

މި ޖަލްސާގައި ކޮންމެ ދަރިވަރެއްގެ ފަރާތުން އެއް ބެލެނިވެރިޔަކަށް ބައިވެރިވުމުގެ ފުރުސަތު މިނިސްޓްރީން ހަމަޖައްސައިދޭއިރު، ތާރީހު އަވަސްކުރުމާއި ބައެއް އެހެން ކަންކަމުގައި ވެސް ބެލެނިވެރިންގެ ކަންބޮޑުވުން އެބަހުއްޓެވެ.

"ކުދިންނަށް ސްކޮލަޝިޕް ދޭ ޖަލްސާ ބޭއްވީ ޖުލައި. އޮރިއެންޓޭޝަން ވެސް ހަމަ އެ މަހު. މި ދެ ޖަލްސާ (ސްކޮލަޝިޕް ޖަލްސާ އާއި ޓޮޕް 10 ޖަލްސާ) އެއް ހަފްތާއަކަށް ތާވަލުކުރި ނަމަ މާލެއަށް ދެ ދަތުރުނުކޮށް، ބޮޑު ހަރަދެއް ސަލާމަތް ކުރެވުނީސް. ކޮންމެ ފަހަރަކު ޗުއްޓީ ހަމަޖެއްސުމަކީ ވެސް އެހާ ފަސޭހަ ކަމެއް ނޫން،" ބެލެނިވެރިޔަކު ބުންޏެވެ.