ރިޒުނާ ޗީފް ޖުޑީޝަލް އެޑްމިނިސްޓްރޭޝަންގެ މަގާމުން އިސްތިއުފާ ދެއްވައިފި

ޖުޑިޝަރީގެ އިދާރީ އެންމެ އިސް މަގާމު ކަމަށްވާ، ޗީފް ޖުޑީޝަލް އެޑްމިނިސްޓްރޭޝަންގެ މަގާމުން އައިޝަތު ރިޒުނާ މިއަދު އިސްތިއުފާ ދެއްވައިފި އެވެ.

ވީ ކިހިނެއް؟ - ރިޒުނާއާ ގުޅޭ ޝަކުވާތަކެއް ޖުޑީޝަލް ސާވިސް ކޮމިޝަން (ޖޭއެސްސީ) އަށް ލިބި އެ މައްސަލަ ބަލަމުން ދަނިކޮށް ރިޒުނާގެ އިސްތިއުފާ ސިޓީ އެ ކޮމިޝަނަށް ފޮނުވީ މިއަދެވެ.

ތަފްސީލް - ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ މީޑިއާ އޮފިޝަލް 'ދައުރު'އަށް ވިދާޅުވީ އިސްތިއުފާގެ ސިޓީ ހުށައެޅުއްވިކަން ޑީޖޭއޭގެ މުވައްޒަފުން ތިބި ގްރޫޕުތަކަށް ކަށަވަރުކޮށްދެއްވައި މެސެޖު ވެސް ރިޒުނާ ފޮނުއްވި ކަމަށެވެ.

އެނގުން މުހިންމު - ޖޭއެސްސީން ރިޒުނާއާ ގުޅޭ ގޮތުން ބަލަމުން ދިޔައީ މުވައްޒަފުން ނެގުމާ ގުޅޭ ގޮތުން ހުށަހެޅި ޝަކުވާއެއް ކަމަށް އެނގިފައިވެ އެވެ.

މައްސަލައެއްގައި ގޮތެއް ނިންމުމަށް ފަހު ނޫނީ ޖޭއެސްސީން އެއްވެސް މައްސަލައެއްގެ ތަފްސީލް ނުދިނުމުގެ ސިޔާސަތު ގެންގުޅޭތީ މިކަމުގައި ވެސް ރަސްމީކޮށް އެއްވެސް ބަހެއް ނުލިބެ އެވެ.

ފަސް މަންޒަރު - ސުޕްރީމް ކޯޓުގެ ރަޖިސްޓްރާގެ މަގާމު ވެސް ފުރުއްވާފައިވާ ރިޒުނާ ޖުޑީޝަރީގެ އިދާރީ އިސް ވެރިޔާގެ މަގާމަށް އައްޔަން ކުރީ 27 ސެޕްޓެމްބަރު 2020ގަ އެވެ. އެއީ ކުރީގެ ރައްޔިތުންގެ މަޖިލީހުން ގެނައި ބަދަލަކުން އެ މަގާމު ހުސްވުމުންނެވެ.

ރިޒުނާގެ ކުރިން އެ މަގާމުގައި ހުންނެވީ އެޑިއުކޭޝަން މިނިސްޓްރީގައި ވެސް އިސް މަގާމުތަކެއް ފުރުއްވި ޑރ. އަބްދުﷲ ނަޒީރެވެ. މަޖިލީހުން ގެނައި ބަދަލަކީ ޖޭއެސްސީގެ ދަށަށް ޑީޖޭއޭ ގެންގޮސް، ޖޭއެސްސީން އާ ސީޖޭއޭއެއް އައްޔަން ކުރުމެވެ.