ސިނަމާލެ ބްރިޖު. މި ބްރިޖު އިފްތިތާހުކުރިތާ މިއަދަށް 6 އަހަރު ވަނީ ފުރިފައި. (ދައުރު ފޮޓޯ)
ސިނަމާލެ ބްރިޖަށް 6 އަހަރު؛ ރާއްޖެ-ޗައިނާގެ ބަދަހި ގުޅުން ދައްކުވައިދޭ ރަމްޒެއް: ރައީސް
ސިނަމާލެ ބްރިޖު (ޗައިނާ-މޯލްޑިވްސް ފްރެންޑްޝިޕް ބްރިޖު) އަކީ ހަމައެކަނި ދެ ރަށެއް ގުޅުވައިދޭ ފާލަމެއް ނޫން ކަމަށާއި މިއީ ރާއްޖެ އާއި ޗައިނާއާ ދެމެދު އޮންނަ ބަދަހި ގުޅުން ދައްކުވައިދޭ ރަމްޒެއް ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ވީ ކިހިނެއް؟ - ސިނަމާލެ ބްރިޖު އިފްތިތާހު ކުރިތާ މިއަދަށް ހަ އަހަރު ވަނީ ފުރިފަ އެވެ. އެ ބްރިޖު ރަސްމީކޮށް އިފްތިތާހު ކުރީ 30 އޮގަސްޓު 2018ގަ އެވެ.
ތަފްސީލު - ބްރިޖު ހުޅުވިފަހުން ހަ އަހަރު ފުރުމާ ގުޅިގެން ރައީސް މުއިއްޒު 'އެކްސް'ގައި ކުރެއްވި ޕޯސްޓެއްގައި ވިދާޅުވީ އިންޖިނިއަރިންގެ ކާމިޔާބު އެ މަސައްކަތަކީ ހަމައެކަނި ދެ ރަށެއް ގުޅުވައިދޭ ވަސީލަތެއް ނޫން ކަމަށެވެ.
އެ ބްރިޖަކީ، ރައީސް ވިދާޅުވި ގޮތުގައި، ރާއްޖެ އާއި ޗައިނާއިން ކަންކަމުގައި ގުޅިގެން ކުރިއަށްދިއުމާއި ދެ ގައުމުގެ ބަދަހިކަން ދައްކުވައިދޭ ހެއްކެކެވެ.
ރައީސް ވިދާޅުވި ގޮތުގައި އެ މަނިކުފާނުގެ އުންމީދަކީ، ކުރިއަށް އޮތް ޖީލުތަކަށް ވެސް މި ބްރިޖަކީ ގުޅިގެން މަސައްކަތްކުރުމުގެ މުހިންމުކަން ދައްކުވައިދޭ ދަންމަރަކަށް ވުމެވެ.
Today, we proudly celebrate the 6th anniversary of the China-Maldives Friendship Bridge, inaugurated on 30th August 2018. This remarkable feat of engineering not only connects our islands but also symbolizes the enduring partnership and mutual trust between our two great nations.… pic.twitter.com/CVCszOFd1O
— Dr Mohamed Muizzu (@MMuizzu) August 30, 2024
ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ކުރެއްްވި ޕޯސްޓުގައި ވިދާޅުވީ ސިނަމާލެ ބްރިޖަކީ ދިވެހިންގެ އާންމު ދިރިއުޅުމަށް ހެޔޮ ބަދަލުތަކަކާއި ރާއްޖޭގެ އިގްތިސާދީ ތަރައްގީއަށް ބޮޑެތި ކުރިއެރުންތަކެއް ގެނެސްދިން މަޝްރޫއެއް ކަމަށެވެ.
ޗައިނާގެ ދީލަތި އެހީއާ އެކު ހިންގި އެ މަޝްރޫއަކީ، މިނިސްޓަރު ވިދާޅުވި ގޮތުގައި ރާއްޖޭގައި އުމްރާނީ ތަރައްގީގެ މަޝްރޫއުތައް ހިންގެން ހުރި ފުރުސަތުތައް އަލުން ބަޔާންކޮށްދިން އިންގިލާބީ މަޝްރޫއެކެވެ.
"ތާވަލަށް ވުރެ ކުރިން އަދި ބަޖެޓުގެ ތެރެއިން މި މަޝްރޫއު ނިންމުމަކީ ވެސް އޭރު ހައުސިން އެންޑް އިންފްރާސްޓްރަކްޗާ މިނިސްޓަރަކަށް ހުންނެވި ރައީސް މުހައްމަދު މުއިއްޒުގެ ލީޑަޝިޕް ސާބިތުކޮށްދޭ ކަމެއް،" މުއްތަލިބު ވިދާޅުވި އެވެ.
Today marks the 6th anniversary of the inauguration of the China-Maldives Friendship Bridge (Sinamale’ Bridge), a transformative project that has profoundly impacted the lives of Maldivians and greatly enhanced the nation’s economic development. Realized through the generous… pic.twitter.com/RrHjwgq0Ci
— Abdulla Muththalib (@muththo) August 30, 2024
އެނގުން މުހިންމު - ސިނަމާލެ ބްރިޖަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އުމްރާނީ ތަރައްގީގެ އެންމެ ބޮޑު މަޝްރޫއު އެވެ. އެގޮތުން، 2015 ވަނަ އަހަރު ފެށި އެ މަޝްރޫއު ނިންމައި ސެޕްޓެމްބަރު 2018ގައި ވަނީ އެ ތަން ބޭނުން ކުރަން ފަށައިފަ އެވެ. އެ މަޝްރޫއަށް ޖުމްލަ 210 މިލިއަން ޑޮލަރު ހޭދަކުރި އިރު، އޭގެ ތެރެއިން ދެ ބައިކުޅަ އެއް ބަޔަކީ ޗައިނާގެ ހިލޭ އެހީ އެވެ.