ގއ. ދާންދޫ (ފޮޓޯ/ ހުވަދޫ އެޓޯލް ފޭސްބުކް)
ދާންދޫ ކައުންސިލަށް ލިބެންޖެހޭ 1.2 މިލިއަން ރުފިޔާ ނުލިބޭ: އޮޑިޓް
ބިމު ކުއްޔާއި ޖޫރިމަނާގެ ގޮތުގައި ގއ. ދާންދޫ ކައުންސިލަށް ލިބެންޖެހޭ 1.2 މިލިއަން ރުފިޔާ ނުލިބި އެބަހުރި ކަމަށް އޮޑިޓް ރިޕޯޓުން ދައްކައިފި އެވެ.
ވީ ކިހިނެއް؟ - އެކަން ހާމަވީ އިއްޔެ އާންމުކޮށްފައިވާ އެ ކައުންސިލްގެ 2022 ވަނަ އަހަރުގެ މާލީ އޮޑިޓް ރިޕޯޓުންނެވެ.
ތަފްސީލް - އޮޑިޓް ރިޕޯޓުން ދައްކާ ގޮތުގައި އެއީ 2022 ވަނަ އަހަރުގެ ނިޔަލަށް ބިމު ކުއްޔާއި ޖޫރިމަނާގެ ގޮތުގައި 12 ބިމަކުން ލިބެންޖެހޭ ފައިސާ އެވެ. އެ ފައިސާ ހޯދަން ގަވާއިދުގައި އޮންނަ ގޮތުގެ މަތިން ކައުންސިލުން މަސައްކަތްކޮށްފައި ނުވާކަން އޮޑިޓުގައި ފާހަގަކޮށްފައިވެ އެވެ.
ދައުލަތުގެ މާލިއްޔަތު ގަވާއިދުގައިވާ ގޮތުން:
-
ފައިސާ ދެއްކުމަށް ކަނޑައަޅާފައިވާ މުއްދަތުގެ ތެރޭގައި ފައިސާ ހޯދުމަށާއި އެ މުއްދަތުގައި ފައިސާ ނުދައްކައިފި ނަމަ ހަތް ދުވަހުގެ މުއްދަތެއް ފައިސާ ދައްކަން ދޭން ޖެހޭ
-
އެ މުއްދަތު ދެ ފަހަރެއްގެ މަތިން ލިޔުމުން ހަންދާންކޮށްދޭން ޖެހޭ
-
ފައިސާ ނުދައްކައިފި ނަމަ ޝަރީއަތަށް ހުށަހަޅައިގެން ފައިސާގެ މަސައްކަތް ކުރަންޖެހޭ
އެ މައްސަލައިގެ އިތުރުން ވެސް އެހެން މައްސަލަތަކެއް އެ އޮޑިޓް ރިޕޯޓުގައި ފާހަގަކޮށްފައިވެ އެވެ. އޭގެ ތެރޭގައި:
-
ބޭންކު ރިކޮންސިލިއޭޝަން ސްޓޭޓްމަންޓުގައި ހިމަނާފައިވާ ބާކީ އާއި ކައުންސިލްގެ ފޮތްތަކުން ދައްކާ ބާކީއާ ދިމާނުވުން؛ އެހެންވެ ކައުންސިލް އިދާރާގެ އެކައުންޓުތަކުގައި ހުރި 2.3 މިލިއަން ރުފިޔާއަކީ ސައްހަ އަދަދެއްކަން ކަށަވަރެއް ނުވޭ
-
ދައުލަތުގެ އާމްދަނީގެ ގޮތުގައި ބަލައިގެންފައިވާ ފައިސާ ބޭންކު އެކައުންޓަށް ޖަމާކޮށްފައެއް ނުވޭ؛ އެގޮތުން 50،140ރ. ޖަމާނުކޮށް ހުރި
-
ތިޖޫރީގައި ހުރި އާމްދަނީގެ ފައިސާއިން އިދާރާގެ ބައެއް ހަރަދުތައް ކުރުމަށް ފައިސާ ދައްކާފައިވޭ؛ އެގޮތުން، 184،378ރ. ހަރަދުކޮށްފައި ވާއިރު، އޭގެ ތެރެއިން 139،057ރ. ބޭނުންކޮށްފައި ވަނީ ޗެކް ބޭނުންނުކޮށް އަދި ފިނޭންސްގެ ހުއްދަ ނުހޯދާ
-
ބައެއް މުވައްޒަފުންގެ މުސާރައިން އެސްޓީއޯ ކްރެޑިޓް ސްކީމަށް ގިނަ ދުވަސްތަކެއް ވާންދެން ފައިސާ ކަނޑާފައެއް ނުވޭ
-
ދާންދޫ އިންޑޯ ބެޑްމިންޓަން ކޮމްޕްލެކްސް އިމާރާތުގެ މަސައްކަތުގައި ވެސް ފައިސާގެ މައްސަލަތަކެއް ހުރި
-
ބިޑް ޕާފޯމަންސް ނަގާފައެއް ނުވުން
އެނގުން މުހިންމު - ރަށު ކައުންސިލްތަކުގެ އޮޑިޓް ރިޕޯޓްތައް މިހާރު އާންމުކުރަމުން އަންނައިރު، ގިނަ ކައުންސިލްތަކުން ފައިސާއާ ގުޅޭ މައްސަލަތަކެއް ދަނީ ފެންމަތިވަމުންނެވެ. އެގޮތުން، ތ. ދިޔަމިގިލީ ކައުންސިލްގެ ތިޖޫރީން 600،000ރ. މަދުކަން ވެސް ވަނީ ހާމަވެފަ އެވެ.