ރޭ އުތުރަށް ކުރި ވިއްސާރައިގައި ރަށެއްގައި ފެންބޮޑުވެ، ފެން ހިންދުމުގެ މަސައްކަތް ކުރަނީ (ފޮޓޯ/އެންޑީއެމްއޭ)
ރޭ ވެހުނު ވާރޭގައި ކުޅުދުއްފުށީގެ 100 އަށް ވުރެ ގިނަ ގެއަށް ފެން ވަދެއްޖެ
ރާއްޖޭގެ އުތުރަށް ރޭ ކުރި ވިއްސާރައިގައި ހދ. ކުޅުދުއްފުއްޓަށް ބޮޑެތި ގެއްލުންތަކެއް ލިބިއްޖެ އެވެ.
ވީ ކިހިނެއް؟ - ހއ.، ހދ. އަދި ށ. އަތޮޅަށް ގުގުރުމާ އެކު ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް، މޫސުމާ ބެހޭ ގައުމީ އިދާރާއިން އެ ސަރަހަދަށް ރޭ ވަނީ އޮރެންޖު އެލާޓް ނެރެފަ އެވެ.
ތަފްސީލް - ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު އެކްސްގައި ކުރި ޕޯސްޓެއްގައި ބުނީ އެ ތިން އަތޮޅުގެ ހަތަރު ރަށަކަށް ވާރޭވެހި ގޭގެއަށް ފެން ވަދެގެން އެކި ވަރުގެ ގެއްލުންތައް ލިބިފައިވާ ކަމަށެވެ. އޭގެ ތެރެއިން ކުޅުދުއްފުށީގައި 57 ގެއަކަށް ފެން ވަދެ ގެއްލުން ލިބިފައިވާ ކަމަށް އެ ތަނުން ބުންޏެވެ.
ކައުންސިލްގެ ބަސް - އެކަމާ ގުޅޭގޮތުން ކުޅުދުއްފުށީ މޭޔަރު އަހްމަދު އާތިފް މިއަދު 'ދައުރު'އަށް ވިދާޅުވީ ރޭ ކުރި ވިއްސާރައިގައި އެ ރަށުގެ 100 އަށް ވުރެ ގިނަ ގެއަށް އެކިވަރުގެ ގެއްލުންތައް ލިބުނު ކަމަށެވެ. އަދި ފަސް ގެއަކުން މީހުން ބަދަލުކުރަން ޖެހުނު ކަމަށް ވެސް އޭނާ ވިދާޅުވި އެވެ.
އާތިފް ވިދާޅުވީ:
-
އިއްޔެ ހަވީރު 3 އިން ރޭ ފަތިހު 4 ޖަހަންދެން މެދުނުކެނޑި އެ ރަށަށް ވާރޭ ވެހުނު
-
މަގުތަކުގައި ފެންބޮޑުވެ ބައެއް ގެތަކުގައި ބޭނުންކުރާ ފަރުނީޗަރާއި ހިފާ ގެންގުޅޭ ތަކެއްޗަށް ގެއްލުން ލިބުނު. ގެއްލުން ހޯދަން އެސެސްމަންޓުތައް ހަދައި ތަފްސީލީ ރިޕޯޓް ހެދުމުގެ މަސައްކަތް އަންނަނީ ކުރަމުން
-
ގެސްޓު ހައުސްތަކަށް ބަދަލުކުރި މީހުންނަށް ބޭނުންވާ އެހީ އާއި ކާބޯތަކެތި ކައުންސިލުން ފޯރުކޮށްދިން
-
އެ ގެތަކަށް ލިބުނު ގެއްލުންތައް ރަނގަޅުކުރުމަށް ފަހު އެމީހުން އަނބުރާ ގެއަށް ގެންދާނެ
-
މަގުތަކުގައި ހެދުނު ފެންގަނޑު ހިންދަން އެމްއެންޑީއެފްއާ ގުޅިގެން އަންނަނީ މަސައްކަތް ކުރަމުން
ގެއްލުން ލިބުނު އެހެން ރަށްރަށުގެ ގޮތުގައި އެންޑީއެމްއޭ އިން ފާހަގަކުރީ:
-
ހއ. ހޯރަފުށީގެ ދެ ގެއަކަށް އެކި ވަރުގެ ގެއްލުންތައް ލިބުނު
-
ށ. ފީވަކުގެ ފަސް ގެއަކަށް ގެއްލުން ލިބުނު
-
ށ. ނޫމަރާގެ ފަސް ގެއަކަށް ގެއްލުން ލިބުނު