އޭޖީން ކޯޓަށް ހާޒިރުނުވުމުން ދައުލަތަށް ލިބެންޖެހޭ 100،000ރ. ގެ މައްސަލަައެއް ބޭރުކޮށްލައިފި

މަސްތުވާތަކެތީގެ މައްސަލައެއްގައި ދައުލަތަށް ލިބެންޖެހޭ 100،000ރ. ހޯދުމަށް ސިވިލް ކޯޓަށް ހުށަހަޅާފައިވާ މައްސަލައެއް އެޓާނީ ޖެނަރަލް (އޭޖީ) އޮފީހުން ކޯޓަށް ހާޒިރުނުވެގެން އެ ކޯޓުން މިއަދު ބޭރުކޮށްލައިފި އެވެ.

މައްސަލައިގެ ފެށުން - މަހުމޫދު އަބްދުﷲ، ހިރުދުގަސްދޮށުގެ / ޅ. ނައިފަރުގެ މައްޗަށް ޑައިމޯފިން ޓްރެފިކް ކުރުމުގެ ކުށު ދައުވާ ސާބިތުވެ، އުމުރަށް ޖަލަށް ލުމާ އެކު، 100،000ރ.ގެ ޖޫރިމަނާއެއް ދެއްކުމަށް 19 މާޗް 2019ގައި ކްރިމިނަލް ކޯޓުން ހުކުމް ކޮށްފައިވެ އެވެ. މި މައްސަލާގައި ހިމެނޭ ޖޫރިމަނާގެ ފައިސާ މަސް ދުވަސްތެރޭ، މީރާ އަށް ދެއްކުމަށް އެ ހުކުުމުގައިވެ އެވެ. 

ވީ ކިހިނެއް؟ - މަހްމޫދުގެ ފަރާތުން މި ފައިސާ ދައްކާފައި ނުވާތީ، އެ ފައިސާ ހޯދުމަށް 17 އޮގަސްޓް 2022ގައި އޭރުގެ އޭޖީގެ ފަރާތުން ސިވިލް ކޯޓަށް މައްސަލައެއް ހުށަހަޅާފައިވެ އެވެ. 

ތަފްސީލް - ސިވިލް ކޯޓުގެ ހުކުމުގައި ބުނީ:

ސިވިލް ކޯޓުގެ ނިންމުމުގައި ވަނީ އޭޖީ އޮފީހުގެ ފަރާތުން އެ މައްސަލައާ ގުޅޭ އަޑުއެހުމަށް ހާޒުވެފައި ނުވަނީ މަގުބޫލު ސަބަބެއް ބަޔާންކުރުމެއް ނެތި ކަމަށެވެ. 

އެނގުން މުހިންމު - މައްސަލައިގެ ޝަރީއަތަށް ހާޒިރުވުމަށް ކޯޓުން ފޮނުވާ އަމުރު ރައްދުވެ މަގުބޫލު ސަބަބެއް ނެތި އަމުރުގައިވާ ތާރީހާ ގަޑިއަށް ކޯޓަށް ހާޒިރުނުވެއްޖެ ނަމަ ދައުވާ ފޯމު ބާތިލުކުރުމުގެ ބާރު ކޯޓަށް ލިބެ އެވެ.