ލ. ގަމުގެ މަތިން ނަގާފައިވާ ފޮޓޯއެއް. (ފޮޓޯ/ ސޯޝަލް މީޑިއާ)
ޑުރަގާއި ބަނގުރާ ހުރި ރުނބާތަކަކާ އެކު ދެ މީހަކު ހައްޔަރުކޮށްފި
މަސްތުވާތަކެއްޗާއި ބަނގުރާ ކަމަށް ޝައްކު ކުރެވޭ ރުނބާތަކަކާ އެކު ލ. ގަމުން ދެ ދިވެހިން ހައްޔަރުކޮށްފި އެވެ.
ވީ ކިހިނެއް؟ - ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނި ގޮތުގައި، އެ ދެ މީހުން ހައްޔަރުކޮށްފައި ވަނީ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގަ އެވެ. އެގޮތުން:
-
ލ. ގަމު ތުނޑީ އަވަށު ގެއެއްގައި މަސްތުވާތަކެތި ގެންގުޅެ ވިޔަފާރި ކުރާކަމަށް އަދި ބަނގުރާ ކައްކާ އޭގެ ވިޔަފާރި ކުރާ ކަމަށް އިންޓެލިޖެންސަށް ވަނީ މައުލޫމާތު ލިބިފައި
-
އެ މައުލޫމާތާ ގުޅިގެން، ކޯޓު އަމުރެއްގެ ދަށުން ފުލުހުން އިއްޔެ ވަނީ އެ ގެ ބަލާ ފާސްކޮށްފައި
ތަފްސީލް - އެ ގެ ބަލާ ފާސްކުރުމުގެ ތެރެއިން ފެނިފައިވާ ތަކެތީގެ ތެރޭގައި ފުލުހުން ބުނީ:
-
24.42 ގްރާމްގެ ހެރޮއިން ކަމަށް ޝައްކު ކުރެވޭ މަސްތުވާތަކެތި
-
ބަނގުރާ ކަމަށް ޝައްކު ކުރެވޭ ދެ ރުނބާ އަދި ފަސް ލީޓަރު ފުޅިއެއް
-
ބަނގުރާ ކައްކަން ބޭނުންކުރާ ކަމަށް ބެލެވޭ ސާމާނު
އެ މައްސަލައާ ގުޅިގެން ދެ މީހަކު ހައްޔަރުކޮށްފައިވާ އިރު، އެއީ 42 އަދި 57 އަހަރުގެ ދިވެހި ފިރިހެނުންނެވެ. ފުލުހުން ބުނި ގޮތުގައި މި މައްސަލަ އަންނަނީ އިތުރަށް ތަހުގީގު ކުރަމުންނެވެ.